កាលពីរសៀលថ្ងៃទី28 មករា សពរបស់តារាចម្រៀង ខេមរៈ ស្រីពៅ ត្រូវបានដង្ហែដោយក្បួនរថយន្ត និងក្បួនអ្នកថ្មើរជើង យ៉ាងច្រើនកុះករបានចូលរួមដង្ហែសពរបស់នាងដែលទើបដឹកមកពីមន្ទីរពេទ្យនៅប្រទេសឥណ្ឌា យកទៅបូជាក្នុងវត្តសំរោងអណ្ដែត។ ពិធីដង្ហែក្បួនសពរបស់នាង ក្រៅពីសាច់ញាតិបងប្អូន នៅមានការចូលរួមពីអ្នកដំណើរដែលធ្វើចរាចរណ៍តាមដងផ្លូវផងដែរ។
មិនត្រឹមតែសាច់ញាតិបងប្អូន ក្រុមគ្រួសារ និងអ្នកសិល្បៈប៉ុណ្ណោះទេដែលបានសម្តែងនូវក្តីអាណិតអាសូរ និងសោកស្តាយ ស្រណោះចំពោះការបាត់បង់តារាចម្រៀងសំនៀងមានទឹកដម ខេមរៈ ស្រីពៅនោះ អ្នកគាំទ្រទាំងអស់ក៏បានសម្ដែងនូវក្ដីរំជួលចិត្តគ្រប់គ្នាផងដែរក្នុងអំឡុងពេលនៃពិធីបូជាសពតារាស្រីរូបនេះ។ នៅក្នុងនោះ មហាជនសង្កេតឃើញថា បន្ទាប់ពីសាកសពបានដង្ហែទៅដល់វត្តសំរោងអណ្តែតហើយ ខណៈពេលរៀបចំពិធីការដើម្បីបូជាសព និងស្ដាប់អំពីប្រវត្តិដ៏កម្សត់របស់ស្រីពៅនោះ សម្រែកទ្រហោយំទួញសោកសង្រេងរបស់មហាជនអ្នកគាំទ្រ និងតារាសិល្បៈ ព្រមទាំងក្រុមគ្រួសារនៃសពជាច្រើននាក់ផងនោះបានបន្លឺឡើងយ៉ាងទ្រហឹង បង្ហាញពីការអាឡោះអាល័យចំពោះតារាស្រីរូបនេះជាខ្លាំង ប្រៀបបាននឹងការជូនដំណើរនាងជាលើកចុងក្រោយដែរ៕
សូមជម្រាបផងដែរថា ពិធីបុណ្យប្រាំពីរថ្ងៃរបស់តារាស្រី ខេមរៈ ស្រីពៅ នឹងធ្វើឡើងនៅថ្ងៃទី 30 ខែមករា ឆ្នាំ 2019 នេះ៕
សូមស្ដាប់ប្រវត្តិកម្សត់របស់ ខេមរៈ ស្រីពៅ ខាងក្រោមនេះ៖
