ប្រជាជនកម្ពុជាអាចនឹងមានភាពងាយស្រួលកាន់តែខ្លាំងក្នុងការស្នើសុំមើលពីរបាយការណ៍ឥណទានផ្ទាល់ខ្លួនពីការិយាល័យឥណទានកម្ពុជា(CBC) នៅទូទាំងប្រទេសបន្ទាប់ពីស្ថាប័នដ៏សំខាន់មួយនេះបានចាប់ដៃគ្នាជាមួយធនាគារអេស៊ីលីដាភីអិលស៊ី ដើម្បីផ្តល់សេវាកម្មពិនិត្យសុខភាពហិរញ្ញវត្ថុ ឬដែលយើងស្គាល់ជាទូទៅថា ពិនិត្យមើលរបាយការណ៍ឥណទានផ្ទាល់ខ្លួន។
លោក អឿ សុធារ័ត្ន ប្រធាននាយកប្រតិបត្តិនៃការិយាល័យឥណទានកម្ពុជា (CBC) បានលើកឡើងថា ក្នុងរយៈពេលជាង 6ឆ្នាំនៃប្រតិបត្តិការ CBC បានចាប់ផ្តើមជាមួយរបាយការណ៍ឥណទានអតិថិជនដែលអនុញ្ញាតឱ្យសមាជិករបស់យើងអាចស្វែង-យល់ពីអតិថិជនរបស់ពួកគេកាន់តែច្បាស់ និងធ្វើការសម្រេចចិត្តលើឥណទានប្រកបដោយប្រសិទ្ធភាព និងការទទួលខុសត្រូវ។ បន្ថែមពីលើនេះ ប្រព័ន្ធមួយនេះក៏អាចជួយដល់អតិថិជនទូទៅក្នុងការស្នើសុំ និងស្វែងយល់ពីព័ត៌មានឥណទានរបស់ពួកគេកាន់តែប្រសើរឡើង ដែលនឹងជួយពួកគេក្នុងការត្រៀមខ្លួនសម្រាប់ការស្នើកម្ចី។ មិនតែប៉ុណ្ណោះប្រព័ន្ធនេះក៏ចូលរួមចំណែកដល់ស្ថិរភាពនៃវិស័យហិរញ្ញវត្ថុ និងសេដ្ឋកិច្ចផងដែរ។
លោក អឿ សុធារ័ត្ន បាននិយាយថា៖ “ដោយមើលឃើញពីសារៈសំខាន់នៃរបាយការណ៍ឥណទានចំពោះប្រជាជនកម្ពុជា និងដើម្បីផ្តល់ភាពងាយស្រួលដល់ប្រជាជននៅតាមបណ្តាខេត្ត ការិយាល័យឥណទានកម្ពុជា បានបង្កើតសេវាកម្មនេះឡើងដោយធ្វើកិច្ចសហប្រតិបត្តិការអាជីវកម្មជាមួយធនាគារអេស៊ីលីដា ភីអិលស៊ី ក្នុងការផ្តល់សេវាត្រួតពិនិត្យសុខភាពហិរញ្ញវត្ថុនេះ ដោយជំហានដំបូងយើងដាក់ឱ្យដំណើរការនៅតាមសាខារបស់ធនាគារអេស៊ីលីដាចំនួន 5ខេត្ត-ក្រុង ហើយគ្រោងនឹងពង្រីកឱ្យបានទូទាំងប្រទេសនៅចុងឆ្នាំ2019 នេះ”។
លោកបណ្ឌិត អុិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បានលើកឡើងថាធនាគារអេស៊ីលីដា ភីអិលស៊ី មានក្តីសោមនស្សរីករាយ ដោយបានចាប់ដៃគូសហប្រតិបត្តិការជាមួយការិយាល័យឥណទានកម្ពុជា ក្នុងការបម្រើសេវាត្រួតពិនិត្យសុខភាពហិរញ្ញវត្ថុដល់ប្រជាជនកម្ពុជាឱ្យបានកាន់តែទូលំទូលាយតាមរយៈការស្នើសុំឆែករបាយការណ៍ឥណទានផ្ទាល់ខ្លួននៅតាមសាខានៃធនាគារអេស៊ីលីដា ភីអិលស៊ីទាំង 5សាខា។
លោកបណ្ឌិត អុិន ចាន់នី បាននិយាយថា៖“សេវានេះនឹងជួយដល់អតិថិជនក្នុងការស្វែងយល់ពីស្ថានភាពហិរញ្ញវត្ថុរបស់ខ្លួន ព្រោះនៅពេលប្រជាជនបានដឹងច្បាស់ពីស្ថានភាពផ្ទាល់ខ្លួនលើលទ្ធភាពនៃការខ្ចីពីស្ថាប័នហិរញ្ញវត្ថុហើយ គាត់នឹងអាចគ្រប់គ្រងស្ថានភាពរបស់គាត់បានល្អ ហើយចៀសវាងបាននូវការខ្ចីហើយមិនមានលទ្ធភាពបង់សងមកវិញដែលបង្កការលំបាកដល់ខ្លួនគាត់ផ្ទាល់ផង និងដល់គ្រឹះស្ថានហិរញ្ញវត្ថុដែលផ្តល់កម្ចីសម្រាប់គាត់ផង”។
គួរបញ្ជាក់ផងដែរថា សេវាត្រួតពិនិត្យហិរញ្ញវត្ថុគឺជាសេវាកម្មមួយរបស់ CBC ដែលអនុញ្ញាតឱ្យប្រជាពលរដ្ឋទូទៅអាចពិនិត្យមើលរបាយការណ៍ឥណទាន ឬលទ្ធភាពក្នុងការប្រើប្រាស់ឥណទានដោយខ្លួនឯងតាមរយៈភ្នាក់ងារដៃគូយុទ្ធសាស្ត្ររបស់ CBC។ ដើម្បីប្រើប្រាស់សេវាកម្មនេះ អតិថិជនគ្រាន់តែយកអត្តសញ្ញាណប័ណ្ណ ឬលិខិតឆ្លងដែនច្បាប់ដើមដែលនៅមានសុពលភាព ហើយអញ្ជើញទៅកាន់សាខាទាំង5 របស់ធនាគារអេស៊ីលីដា ភីអិលស៊ី ដូចជាទីស្នាក់ការកណ្តាល សាខាសៀមរាប សាខាកំពង់ស្ពឺ និងសាខាខេត្តកណ្តាល។
សូមរំឭកថា ដោយចាប់ផ្តើមដំណើរការជាផ្លូវការនៅឆ្នាំ2012 CBCបានបម្រើដល់សមាជិក និងអតិថិជនជាមួយនឹងសេវាកម្មស្នូល គឺរបាយការណ៍ឥណទានអតិថិជន។ ប្រព័ន្ធនេះបានចូលរួមចំណែកជាប្រយោជន៍យ៉ាងច្រើនដល់ភាគីពាក់ព័ន្ធ រួមមានប្រជាជន ស្ថាប័នហិរញ្ញវត្ថុ និងវិស័យហិរញ្ញវត្ថុ៕
