មហាជនជាច្រើនជាអ្នកគាំទ្រ កំពុងសោកសៅ និងអាល័យចំពោះមរណភាពរបស់កញ្ញាខេមរៈ ស្រីពៅ នឹកស្មានមិនដល់ និងគួរឱ្យរន្ធត់ចិត្តជាខ្លាំង ព្រោះកញ្ញាបានលាចាកទៅយ៉ាងស្ងាត់ៗ និងឃ្លាតពីសិល្បះមួយរយៈធំ ហើយស្រាប់តែបាត់បង់ជីវិតដោយសារជំងឺជំងឺសួត និងក្រលៀន និងផុតដង្ហើមនៅរសៀលម៉ោង1 ក្នុងថ្ងៃទី25 ខែមករា ឆ្នាំ2019 នេះ។
ប៉ុន្មានម៉ោងមុននេះ លោក ខេមរៈ ភារុណ ដែលត្រូវជាបងប្រុសរបស់ ខេមរៈ ស្រីពៅ កំពុងតែវិលវុលនឹកអាណិតប្អូនស្រីរបស់លោកជាខ្លាំង ដោយលោកបានបន្ដបង្ហោះសារ និងរូបភាពជាច្រើនអំពីប្អូនស្រី។ ជាក់ស្តែងពេលទៅដល់ប្រទេសឥណ្ឌាដើម្បីនាំសពប្អូនស្រីមកប្រទេសកំណើតវិញ លោកបានយកនំ និងទឹកមួយដប ហើយបានបង្ហោះសារដ៏គួរឱ្យសង្វែកចិត្តថា«អូនផឹកទឹកអោយច្រើនចាំបងនាំអូនទៅផ្ទះយើងទៅជួបបងប្អូនយើងវិញ»។
សូមជម្រាបដែរថា សពរបស់តារាចម្រៀង ខេមរៈ ស្រីពៅ នឹងត្រូវដឹកតាមយន្តហោះ ចេញពីប្រទេសឥណ្ឌានៅម៉ោង12រំលងអាធ្រាត្រ ថ្ងៃទី26 ទី 27 (យប់នេះ) ខែមករានេះ ដោយត្រូវប្រើរយៈពេលហោះហើរ រហូតដល់ទៅ 10ម៉ោង ទើបមកដល់ប្រទេសកម្ពុជា នៅថ្ងៃស្អែកដើម្បីរៀបចំធ្វើបុណ្យតាមប្រពៃណី។ ដោយយកមកធ្វើបុណ្យនៅឯគេហដ្ឋាន នៅមុខសួនសុបិន្តចំការព្រីង ខណ្ឌសែនសុខ រាជធានីភ្នំពេញ៕
