បន្លែផ្កាខាត់ណាត្រូវបានទទួលស្គាល់ថា ជាប្រភេទបន្លែមួយដែលមានតម្រូវការនៅលើទីផ្សារច្រើន ទើបមានកសិករជាច្រើនបាននាំគ្នាសង្វាតដាំបន្លែនេះដើម្បីផ្គត់ផ្គង់ទីផ្សារ ព្រោះបន្លែនេះកំពុងមានតម្រូវការខ្ពស់នៅក្នុងទីផ្សារទំនើបផង និងក៏មានតម្រូវការដោយខានមិនបាននៅតាមបណ្តាអាហារដ្ឋាន និងភោជនីយដ្ឋានជាច្រើនផងដែរ ហើយតម្លៃវាក៏ខ្ពស់គួរសមដែរ។
ជាមធ្យមក្នុង 1ឆ្នាំ ពលរដ្ឋកម្ពុជា1នាក់បរិភោគបន្លែអស់ប្រមាណ 100គីឡូក្រាម។ ក្នុងមួយឆ្នាំៗកម្ពុជាមានតម្រូវការប្រើប្រាស់បន្លែជាង 93ម៉ឺនតោន ក្នុងនោះកម្ពុជាមានសមត្ថភាពផលិតបន្លែដោយខ្លួនឯងបានប្រមាណតែ 42ម៉ឺនតោនប៉ុណ្ណោះ ដែលចំនួននេះមិនអាចផ្គត់ផ្គង់គ្រប់គ្រាន់ទៅនឹងតម្រូវការចាំបាច់ និងការកើនឡើងក្នុងការប្រើប្រាស់ប្រចាំថ្ងៃនៅកម្ពុជាបានទេ ដូច្នេះកម្ពុជាត្រូវនាំចូលបន្លែពីប្រទេសជិតខាងជាង50ម៉ឺនតោនទៀតក្នុងមួយឆ្នាំ។
លោកស្រី ចាន់ ផលលឿន អគ្គនាយករងនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទបានឱ្យដឹងថា៖“ប្រទេសកម្ពុជាបានចំណាយប្រាក់សរុបអស់ចំនួនជាង 200លានដុល្លារអាមេរិកក្នុងមួយឆ្នាំៗទៅលើការនាំចូលបន្លែយ៉ាងច្រើនពីប្រទេសវៀតណាម ថៃ និងចិនដើម្បីយកមកផ្គត់ផ្គង់ដល់តម្រូវការនៅក្នុងស្រុក ក្នុងនោះរួមមានដូចជា ផ្កាខាត់ណា មើមការ៉ុត ដំឡូងបារាំង ខ្ទឹមស ខ្ទឹមក្រហម និងផ្កាស្ពៃធំៗជាដើម”។
លោកស្រី ចាន់ ផលលឿន បានឱ្យដឹងបន្តទៀតថាការនាំចូលបន្លែដែលមានតម្លៃដ៏ច្រើនសន្ធឹកសន្ធាប់នេះ គឺដោយសារតែមានបញ្ហាកត្តាអាកាសធាតុ និងបញ្ហានៃការកង្វះចំណេះដឹងផ្នែកបច្ចេកទេសរបស់ប្រជាកសិករកម្ពុជា។ លោកស្រីបន្ថែមថា “ក្រសួងកសិកម្មកំពុងទទួលបានគម្រោងមួយ គឺគម្រោងជំរុញផលិតកម្មស្បៀងដែលនឹងអនុវត្តនៅតាមខេត្តគោលដៅចំនួន8 ក្នុងការធ្វើផលិតកម្មបន្លែ និងខេត្តគោលដៅចំនួន 11ទៀត សម្រាប់ការធ្វើផលិតកម្មស្រូវក្រអូបដើម្បីធ្វើការនាំចេញ”។
ដោយឡែកអ្នកជំនាញខាងទីផ្សារបន្លែនៅកម្ពុជាលោក ទួត សេងហ័ង អ្នកជំនាញទីផ្សារសមាគមត្រសក់ផ្អែមសៀមរាបមានជ័យបានប្រាប់ឡារ៉ែនពាណិជ្ជថា ក្រៅពីបន្លែជាច្រើនមុខ ផ្កាខាត់ណាជាបន្លែដែលទទួលបានផលប្រភេទទី 4របស់សមាគមយើងបានដែលបានដាំនៅលើផ្ទៃដីប្រមាណជាង 20ហិកតា។
លោកបានឱ្យដឹងថា ផ្កាខាត់ណា ជាប្រភេទរុក្ខជាតិបន្លែផ្តល់ផ្កា ដែលមានរដូវកាលសម្រាប់ដាំរបស់វា។ យោងទៅតាមប្រទេសកម្ពុជាយើងមានរដូវត្រជាក់រយៈពេលខ្លីចន្លោះពីខែតុលា ដល់ខែកុម្ភៈ ជាការដាំដុះបានល្អពីខែវិច្ឆិកាដល់ខែធ្នូហើយពេលខាត់ណាឈានចូលរដូវក្តៅ មិនអំណោយផលដល់ប្រភេទពូជធ្ងន់ឡើយ វាសមស្របតែពូជស្រាល និងពូជកណ្តាល ដែលមានអាយុកាល55-75ថ្ងៃប៉ុណ្ណោះ។ វាអាចដុះលូតលាស់បានចាប់ពីវាលរាបដល់ខ្ពង់រាប ប៉ុន្តែផ្ទៃដីរយៈកម្ពស់សមស្របមានពី800-1200ម៉ នឹងធ្វើឱ្យមានទិន្នផលខ្ពស់ ។ ផ្កាខាត់ណាគេចាត់បញ្ចូលទៅក្នុងដំណាំដែលត្រូវការសីតុណ្ហភាពទាប ព្រោះតម្រូវការមធ្យមប្រចាំថ្ងៃរបស់វាគឺពី15-20អង្សាសេ ។
ដោយសារតែមានការទទួលទានច្រើន និងតម្រូវការក៏ច្រើនដែរនោះ ទើបធ្វើឱ្យបន្លែនេះមិនមានស្ថិរភាពតម្លៃទៀងទាត់នោះទេ ដោយវានឹងប្រែប្រួលទៅតាមពេលវេលាមមាញឹកដែលមានតម្រូវការខ្ពស់ ដូចជារដូវបុណ្យទានផ្សេងៗ ពិសេសក្នុងឱកាសបុណ្យភ្ជុំបិណ្ឌម្តងៗ ចូលឆ្នាំចិន និងចូលឆ្នាំខ្មែរ ផ្កាខាត់ណានឹងលក់បានថ្លៃ ក្នុង1គីឡូក្រាមស្មើនឹង 6,000រៀល ទៅ12,000រៀល តែលោក សេងហ័ង ក៏បានបញ្ជាក់ដែរថា ក្នុងរដូវដែលសម្បូរបន្លែផ្កាខាត់ណា តម្លៃដែលលក់ចេញបាន 1គីឡូថ្លៃត្រឹមតែ3,500-4,000រៀលប៉ុណ្ណោះក៏គាត់ទទួលបានចំណូលសរុប ស្មើនឹង 32000000រៀលដែរ ដែលបច្ចុប្បន្នបន្លែផ្កាខាត់ណា របស់សមាគមលោក បានត្រូវយកមកផ្គត់ផ្គង់នៅទីផ្សារទំនើបឡាក់គី ផ្សារអង្គរ និងផ្សារកសិករនៅខេត្តសៀមរាប និងនៅភ្នំពេញ300Kgក្នុង1ថ្ងៃផងដែរ។
លោកក៏បានប្រាប់ឡារ៉ែនពាណិជ្ជដែរថា នាថ្ងៃខាងមុខនឹងមានការសាងសង់ផ្សារទំនើបបន្ថែមទៀតនៅខេត្តសៀមរាប រួមទាំងផ្សារម៉ាក្រូនៅខេត្តសៀមរាបផង សមាគមនឹងបន្ថែមនូវតម្រូវការដែលទីផ្សារទំនើបទាំងនោះចង់បាន។ លោកបានបន្ថែមថាលោកក៏មានមហិច្ឆតា ក្នុងការពង្រីកការដាំដុះដំណាំបន្លែផ្កាខាត់ណា ដើម្បីបំពេញសេចក្តីត្រូវការរបស់ប្រជាពលរដ្ឋ និងអាហារដ្ឋានដែលកំពុងកើនឡើងផង ដោយការផ្គត់ផ្គង់នេះត្រូវតម្រូវឱ្យសមាគមលោកនឹងពង្រីកគម្រោងការដាំដុះឱ្យបានដល់100ហិកតា៕
