គម្រោងផ្លូវល្បឿនលឿន ភ្នំពេញ-ព្រះសីហនុបានបង្ហាញនូវក្តីរំពឹងថា នឹងអាចបើកការដ្ឋានសាងសង់នៅក្នុងអំឡុងខែកុម្ភៈ ឬយូរបំផុតនៅដើមខែមីនាខាងមុខ។ នេះបើយោងតាមព័ត៌មានពីសន្និបាតបូកសរុបការងាររបស់ក្រសួងសាធារណការ និងដឹកជញ្ជូន។
ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានបញ្ជាក់ឱ្យដឹងថា ការរំពឹងថា ការសាងសង់ផ្លូវល្បឿនលឿនភ្នំពេញ-ព្រះសីហនុអាចបើកការដ្ឋាននៅខែកុម្ភៈខាងមុខនេះ គឺដោយសារគ្រឿងចក្រដែលមានតម្លៃប្រមាណ 100លានដុល្លារនោះនឹងត្រូវបញ្ជូនមកដល់កម្ពុជានៅដំណាច់ខែមករានេះ ចំណែកឯអ្នកបច្ចេកទេស និងវិស្វករចិនប្រហែល 200នាក់ បានមកដល់រួចរាល់ហើយ ដើម្បីត្រៀមបើកការដ្ឋានផ្លូវល្បឿនលឿនមួយខ្សែនេះ។
តែទោះជាយ៉ាងណា លោកទេសរដ្ឋមន្ត្រីបានបញ្ជាក់ថា ចំពោះគម្រោងសាងសង់ផ្លូវល្បឿនលឿននេះ រាជរដ្ឋាភិបាលមិនទាន់បានដោះស្រាយផលប៉ះពាល់បញ្ហាដីធ្លីរួចរាល់នៅឡើយ ដោយក្រសួងសាធារណការកំពុងតែរៀបចំជំរុញការងារនេះជាមួយក្រសួងសេដ្ឋកិច្ច និងហិរញ្ញវត្ថុ ដើម្បីឱ្យអាចបើកការដ្ឋានបាន។
សូមជម្រាបថា ផ្លូវល្បឿនលឿននេះគ្រោងនឹងចំណាយថវិកាប្រមាណជាង 1,900លានដុល្លារ អាមេរិកដែលនឹងសាងសង់ដោយក្រុមហ៊ុនចិនក្រោមរូបភាពវិនិយោគត្រូវអនុវត្តតាមទម្រង់សាងសង់-ប្រតិបត្តិ-ផ្ទេរ (BOT)។ ការវិនិយោគលើគម្រោងផ្លូវល្បឿនលឿននេះនឹងប្រើប្រាស់រយៈពេលសាងសង់ប្រមាណជា 48ខែ។ ផ្លូវល្បឿនលឿនរាជធានីភ្នំពេញ-ខេត្តព្រះសីហនុនេះ ជាខ្សែផ្លូវថ្មីទាំងស្រុងដែលមានប្រវែងសរុបប្រហែល 193គីឡូម៉ែត្រ។ ផ្លូវនេះនឹងត្រូវសាងសង់ជា 4គន្លង មានសួនច្បារខណ្ឌកណ្តាល ដោយចេញពីភ្នំពេញនៅត្រង់ចំណុចផ្លូវក្រវាត់ក្រុងទី3 មានផ្លូវបំបែកប្តូរទិស (InterChange) ភ្ជាប់មកផ្លូវជាតិលេខ4 ចំនួន 7កន្លែងមានស្ពានវែង-មធ្យមចំនួន 56កន្លែង(ប្រវែង4,417ម៉ែត្រ)ស្ពានខ្លី 33កន្លែង(ប្រវែង750ម៉ែត្រ)ដែលគិតជាសរុបមានស្ពានចំនួន 89កន្លែង ស្ពានរំលង 321កន្លែង កន្លែងឈប់សម្រាក 4កន្លែង និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត។
សូមបញ្ជក់ថា គម្រោងផ្លូវល្បឿនលឿនរាជធានីភ្នំពេញ-ខេត្តព្រះសីហនុ(Phnom Penh-Sihanoukville Expressway)នេះ ឆ្លងកាត់ 4រាជធានី-ខេត្ត រួមមានរាជធានីភ្នំពេញ ខេត្តកណ្តាល ខេត្តកំពង់ស្ពី ខេត្តកោះកុង និងខេត្តព្រះសីហនុ ក្នុងនោះមានឆ្លងកាត់ 6ស្រុក 1ខណ្ឌ 2ក្រុង 31ឃុំ/សង្កាត់ និង110ភូមិ។
បើតាមគម្រោង ផ្លូវល្បឿនលឿននេះនឹងក្រាលបេតុងកៅស៊ូ AC មានប្រវែងសរុបជាង 190គីឡូម៉ែត្រ(គិតរួមទាំងស្ពាន និងលូទាំងអស់) ហើយមានទទឹងសរុប 24.5ម៉ែត្រ ក្នុងនោះមានគន្លងផ្លូវរថយន្ត(2×3.75ម៉ែត្រ) សងខាង ជាយផ្លូវកៅស៊ូ 2 (2×2.5ម៉ែត្រ)សម្រាប់ម៉ូតូ ជាយផ្លូវដីក្រហម 2(2×0.75) សម្រាប់ថ្មើរជើង និងសួននៅអ័ក្សកណ្តាលទ្រូងផ្លូវប្រវែង 3ម៉ែត្រ។
ផ្លូវនេះមានកន្លែងសម្រាប់ឈប់សម្រាកចំនួន 4កន្លែង និងស្ថានីយប្រេងឥន្ធនៈចំនួន 3កន្លែង។ ផ្លូវនេះក៏មានរបងអមតាមសងខាងផ្លូវ ដើម្បីការពារសត្វពាហនៈឆ្លងកាត់ និងរបាំងការពារសំឡេងរំខាន សរុបប្រវែងប្រហែល 57.19គីឡូម៉ែត្រ ព្រមទាំងមានកន្លែងសម្រាប់មនុស្ស និងសត្វព្រៃឆ្លងកាត់ចំនូន 352កន្លែងផងដែរ។
គម្រោងសាងសង់ផ្លូវល្បឿនលឿនរាជធានីភ្នំពេញ-ខេត្តព្រះសីហនុបានចុះហត្ថលេខាលើកិច្ចព្រមព្រៀងសម្បទានកាលពីថ្ងៃទី11 ខែមករា ឆ្នាំ2018 ក្រោមអធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម លី ខឺឈាងនាយករដ្ឋមន្ត្រីនៃសាធារណរដ្ឋប្រជាមានិតចិន។
បច្ចុប្បន្នគម្រោងនេះឈានដល់ដំណាក់កាលបង្កើតគណៈកម្មការសម្រាប់ការដោះស្រាយផលប៉ះពាល់ដែលមានសមាសភាពចូលរួមពីក្រសួងសេដ្ឋកិច្ច និងហិរញ្ញវត្ថុ និងក្រសួងសាធារណការ និងដឹកជញ្ជូន៕
