គោលដៅអភិវឌ្ឍន៍ប្រកបដោយនិរន្តរភាព (SDG) សម្រាប់ឆ្នាំ2030 ជាគោលដៅសកលមួយដែលពិភពលោកបានដាក់ចេញដើម្បីឱ្យប្រទេសទាំងអស់លើពិភពលោកព្យាយាមគ្រប់លទ្ធភាពដើម្បីសម្រេចបាននូវសកម្មភាពសំខាន់ៗ ដូចជា ការបញ្ចប់ភាពអត់ឃ្លាន ធ្វើឱ្យសេដ្ឋកិច្ចកាន់តែប្រសើរឡើង និងសកម្មភាពសំខាន់ៗជាច្រើនទៀតដែលក្នុងនោះក៏មានវិស័យទេសចរណ៍មួយផងដែរ។
ឆ្លើយតបនឹងបញ្ហាទាំងអស់នេះ ក្រសួងទេសចរណ៍សហការជាមួយដៃគូពាក់ព័ន្ធជាច្រើនផ្សេង ទៀតបានបើកកិច្ចប្រជុំមួយកាលពីដើមខែមករានេះដើម្បីបង្កើត“បណ្តាញអ្នកជំនាញនិងសាស្ត្រាចារ្យក្នុងវិស័យទេសចរណ៍” នៅកម្ពុជា។គោលដៅសំខាន់ក្នុងការបង្កើតបណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍នេះ ដោយ ធ្វើឡើងក្នុងគោលបំណងជំរុញឱ្យមានកិច្ចសហការល្អរវាងគ្រប់ភាគីទាំងអស់ក្នុងវិស័យទេសចរណ៍នៅកម្ពុជាដើម្បីរួមគ្នាសម្រេចគោលដៅអភិវឌ្ឍន៍ប្រកបដោយ និរន្តរភាពឆ្នាំ2030 និងឆ្លើយតបជាមួយតម្រូវការជាក់ស្តែងរបស់កម្ពុជានាពេលបច្ចុប្បន្ន និងអនាគត។
រដ្ឋមន្ត្រីក្រសួងទេសចរណ៍ ឯកឧត្តម ថោង ខុន បានលើកឡើងថា កម្ពុជាកំពុងមានស្ថានភាពវិជ្ជមានខ្លាំងលើវិស័យទេសចរណ៍ តែបញ្ហាប្រឈមដែលយើងកំពុងជួបប្រទះ គឺធនធានមនុស្សក្នុងវិស័យនេះ ដែលទាមទារឱ្យយើងត្រូវពង្រឹងការអប់រំឱ្យបានច្រើនបន្ថែមទៀត។ កម្ពុជាត្រូវការអ្នកជំនាញអប់រំ សាលាបណ្តុះបណ្តាលវិស័យទេសចរណ៍ និងការចូលរួមរបស់ប្រតិបត្តិការទេសចរណ៍ដើម្បីធ្វើការបណ្តុះបណ្តាលបុគ្គលិកដែលមានស្រាប់ឱ្យកាន់តែមានសមត្ថភាពខ្ពស់ដើម្បីបំពេញតម្រូវការការងារនៅក្នុងប្រទេស និងប្រកួតប្រជែងជាមួយបណ្តាប្រទេសនានាក្នុងតំបន់។
ជាផែនការសកម្មភាពដើម្បីសម្រេចគោលដៅពង្រឹងការអភិវឌ្ឍធនធានមនុស្សផ្នែកទេសចរណ៍នៅកម្ពុជា អ្នកជំនាញទាំងអស់បានកំណត់ថា ឆ្នាំ2020ចាំបាច់ត្រូវព្យាយាមបង្កើតការងារផ្ទាល់ផ្នែកទេសចរណ៍ឱ្យបាន 1លាននាក់ ហើយត្រូវជំរុញឱ្យមានអ្នកជំនាញបន្ថែមយ៉ាងតិច50% ដែលមានសញ្ញាបត្រ ឬមានវិញ្ញាបនបត្របញ្ជាក់សមត្ថភាពស្តង់ដាជាតិ និងអាស៊ាន ដោយមានការបណ្តុះបណ្តាល និងវាយតម្លៃត្រឹមត្រូវ ព្រោះបច្ចុប្បន្ននេះអ្នកកំពុងធ្វើការងារផ្នែកទេសចរណ៍មួយចំនួនមានសញ្ញាបត្រ និងទទួលបានការអប់រំពីផ្នែកផ្សេងៗទៀតដែលមិនមែនជាជំនាញទេសចរណ៍។
ជាគោលដៅបន្ត សម្រាប់ឆ្នាំ2025 កម្ពុជាបានកំណត់ផែនការបង្កើតការងារផ្ទាល់លើវិស័យទេសចរណ៍ឱ្យបាន 1.2លាននាក់ និងត្រូវសម្រេចឱ្យបាននូវយុទ្ធនាការ “បុគ្គលិកម្នាក់ ជំនាញមួយ” ដើម្បីជំរុញឱ្យអ្នកជំនាញទេសចរណ៍ទាំងអស់មានសមត្ថភាព និងសញ្ញាបត្រត្រឹមត្រូវដើម្បីប្រើប្រាស់ក្នុងវិជ្ជាជីវៈរបស់ខ្លួន។ ចំណែកឯគោលដៅចម្បងចុងក្រោយនៅឆ្នាំ2030 គឺត្រូវសម្រេចឱ្យបាននូវគោលដៅអភិវឌ្ឍន៍ប្រកបដោយនិរន្តរភាព (SDG) ផ្នែកទី4 ដែលធានាឱ្យទទួលបាននូវការបណ្តុះបណ្តាលប្រកបដោយគុណភាព សមធម៌ និងបរិយាបន្ន ព្រមទាំងលើកកម្ពស់ឱកាសសិក្សាពេញមួយជីវិត និងគោលដៅ SDG ទី8 ដែលជំរុញកំណើនសេដ្ឋកិច្ច និងការងារសមរម្យដល់ជនគ្រប់រូបក្នុងវិស័យទេសចរណ៍តាមរយៈការបណ្តុះបណ្តាលធនធានមនុស្សឱ្យមានកម្រិតស្តង់ដារទាំងជាតិ និងអន្តរជាតិ។
បណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍ ជាបុគ្គលដែលមានតួនាទីយ៉ាងសំខាន់ក្នុងការជំរុញឱ្យគោលដៅសំខាន់នានានៅកម្ពុជាទទួលបានជោគជ័យ។ ជាផែនការសកម្មភាពរបស់ស្ថាប័ននេះ គឺតម្រូវឱ្យមានកិច្ចប្រជុំជាប្រចាំតាមពេលវេលាកំណត់ជាក់លាក់ និងរៀបចំកម្មវិធីសំខាន់ៗជាច្រើនផ្សេងទៀតដើម្បីផ្តល់ឱកាសឱ្យស្ថាប័នអប់រំផ្នែកទេសចរណ៍ សិស្ស-និស្សិត និងប្រតិបត្តិករទេសចរណ៍មានឱកាសចែករំលែក និងទទួលបានចំណេះដឹងយ៉ាងទូលំទូលាយ។
សម្រាប់គម្រោងក្នុងឆ្នាំ2019 នេះ បណ្តាញអ្នកជំនាញ និងសាស្ត្រាចារ្យក្នុងវិស័យទេសចរណ៍គ្រោងនឹងរៀបចំឱ្យមានអ្នកផ្តល់ការបណ្តុះបណ្តាលគំរូពិព័រណ៍ម្ហូបអាហារ និងការប្រឡងប្រណាំងអាហារស្អាតតាមដងផ្លូវ រួមទាំងការប្រឡងប្រណាំងសរសេរអត្ថបទស្រាវជ្រាវក្នុងវិស័យទេសចរណ៍ប្រចាំឆ្នាំ ដើម្បីចូលរួមលើកកម្ពស់ការបណ្តុះបណ្តាល និងអភិវឌ្ឍធនធានមនុស្សក្នុងវិស័យទេសចរណ៍ថែមទៀតផង។ លើសពីនេះទៅទៀតក៏បានគ្រោងនឹងដាក់ឱ្យផ្សព្វផ្សាយសៀវភៅតម្រង់ទិសការសិក្សា និងអាជីពក្នុងវិស័យទេសចរណ៍ ព្រមទាំងបានប្រកាសផ្សព្វផ្សាយជាផ្លូវការនូវចលនាប្រឡងប្រណាំងអ្នកជំនាញទេសចរណ៍គំរូ ប្រចាំឆ្នាំ2019 លើផ្នែកការិយាល័យជួរមុខ ផ្នែកម្ហូបអាហារ និងភេសជ្ជៈ ដែលលទ្ធផលជយលាភីនៃការប្រឡងប្រណាំងនេះគ្រោងនឹងប្រកាសផ្សព្វផ្សាយនៅពេលចុងឆ្នាំ៕
