អ្នកចាំទី Ederson របស់ក្លិប Benfica បានធ្វើដំណើរទៅដល់ទីក្រុង Manchester ហើយ ដើម្បីបំពេញការផ្ទេរក្នុងតម្លៃខ្លួន៣៥លានផោន (ស្មើនឹង៤៥លានដុល្លារ) របស់គេទៅកាន់ក្លិប Man City។
ក្លិបយក្សរបស់អង់គ្លេសមួយនេះនៅតែត្រូវធ្វើការដោះស្រាយទៅលើតម្លៃខ្លួនដ៏ស្មុគស្មាញលើបញ្ហាភាពជាកម្មសិទ្ធិភាគីទី៣ របស់អ្នកចាំទីវ័យ២៣ឆ្នាំរូបនេះ ប៉ុន្តែ Ederson បានទទួលការត្រួតពិនិត្យសុខភាពរួចជាស្រេចហើយ ដើម្បីបំពេញការផ្ទេរកាលពីថ្ងៃព្រហស្បតិ៍។ ក្លិប Benfica បានអះអាងថា ការចរចាផ្សេងៗទៅលើការដោះស្រាយលើបញ្ហាភាពជាកម្មសិទ្ធិនេះត្រូវបានបំពេញជាផ្លូវការហើយ។
Benfica បានចេញសេចក្តីថ្លែងការណ៍មួយកាលពីព្រឹកថ្ងៃព្រហស្បតិ៍ថា ពួកគេបានឈានដល់ការព្រមព្រៀងគ្នាមួយជាមួយនឹងក្លិបយក្សរបស់ក្របខ័ណ្ឌ Premier League មួយនេះ ដើម្បីលក់អ្នកចាំទី Ederson ក្នុងតម្លៃខ្លួន៤០លានអឺរ៉ូ (ស្មើនឹង ៣៥លានផោន ឬ៤៥លានដុល្លារអាមេរិក)។ កាលពីសប្តាហ៍មុន លោក Antonio Silva Campos ប្រធានអតីតក្លិបរបស់ Ederson គឺក្លិប Rio Ave បានប្រកាសថា ពួកគេនៅមានសិទ្ធិ៣០ភាគរយលើតម្លៃខ្លួនលក់ចេញរបស់អ្នកចាំទីរូបនេះ ហើយក្រុមហ៊ុនភ្នាក់ងារដោះដូររបស់លោក Jorge Mendes មានកម្មសិទ្ធិ២០ភាគរយ ខណៈដែលក្លិប Benfica មានកម្មសិទ្ធិ៥០ភាគរយ។ សម្រាប់ Man City វិញ អ្នកចាំទី Joe Hart បានចំណាយពេលក្នុងរដូវកាលនេះក្នុងនាមជាកីឡាករកម្ចីនៅឯក្លិប Torino ហើយអ្នកចាំទីអន្តរជាតិអង់គ្លេសរូបនេះ អាចនឹងចាកចេញពី Man City ក្នុងកុងត្រាជាអចិន្ត្រៃយ៍ ក្រោយពីការផ្ទេរចូលរបស់ Ederson។
Ederson នឹងក្លាយជាកីឡាករចំណូលថ្មីទី២នារដូវក្តៅនេះរបស់ Man City ក្រោយពីក្លិបមួយនេះបានចុះហត្ថលេខាជាមួយនឹងខ្សែបម្រើ Bernardo Silva របស់ក្លិប Monaco ក្នុងតម្លៃខ្លួន៤៣,៦លានផោន៕
ប្រភពពី៖ Daily Mail
