គ្រាន់តែបង្ហាញរូប Poster មួយសន្លឹកពីរឿងខ្នាតខ្លី របស់បវរកញ្ញាចក្រវាលកម្ពុជា រឿន ណាត នៅលើបណ្ដាញសង្គមហ្វេសប៊ុកមិនបានប៉ុន្មានម៉ោងផង ស្រាប់មានហ្វេនៗចាប់អារម្មណ៍យ៉ាងភ្លូកទឹកភ្លូកដី។ រឿងខ្លីនេះ នាងទើបតែថតចប់រួចរាល់និងត្រៀមបញ្ចេញ ដែលជាស្នាដៃសម្ដែងលើកដំបូងបំផុត ក្រៅពីការបង្ហាញទេពកោសល្យជាតារាម៉ូដែលនៅលើឆាក។
រឿងខ្លីនេះមានចំណងជើងថា « រឹងមាំ » ជាការបើកទំព័រអាជីពសម្ដែងដំបូង និងមានដៃគូសម្ដែងជាមួយតារាសម្ដែងសាច់ដុំកង់ៗ Sool Cool ក្រោមវណ្ណកម្មរបស់ផលិតកម្ម សាស្ត្រា ។ តារាស្រីរូបនេះ បានប្រាប់អ្នកសារព័ត៌មានថា មួយរឿងដំបូងនេះចាយពេលថតអស់រយៈតែ4ថ្ងៃទេ តែពិតជាលំបាកខ្លាំងជាងការដើរបង្ហាញម៉ូដទៀត ព្រោះថា អ្នកដឹកនាំសម្ដែងតម្រូវឱ្យនាងសម្រក់ទឹកភ្នែកច្រើន ហើយមានឈុតខ្លះនាងយំឡើងពេញមួយថ្ងៃក៏មានដដែរ ព្រោះដើម្បីឈុតឆាកកាន់តែចាក់ដោតអារម្មណ៍អ្នកទស្សនាឱ្យស្រក់ទឹកភ្នែកតាម។
រឿន ណាត បានបញ្ជាក់ទៀតថា ដោយសារតែនាងសម្ដែងដំបូង ភាពអៀនខ្មាស ណែបណិតជាមួយតួឯកប្រុសគឺនៅតែមាន និងធ្វើឱ្យនាងសម្ដែងខុសជាច្រើនដង។ តែយ៉ាងណាមិញ នាងរំពឹងថា ការសម្ដែងរឿងខ្លីដំបូងនេះទទួលបានការចាប់អារម្មណ៍ខ្លាំងពីសំណាក់ហ្វេនៗ៕
