អស់រយៈពេលជាង 10 ឆ្នាំមកហើយ ដែលអ្នកនិពន្ធបទចម្រៀងដ៏ល្បីឈ្មោះប្រចាំផលិតកម្មថោនគឺ លោក យឹម តាស្រង់ បានចាកចេញពីទ្រនំសិល្បៈរបស់ខ្លួនយ៉ាងស្ងាត់ៗ ដែលគ្មានអ្នកគាំទ្រណាបានដឹងច្បាស់ឡើយ។ ការចាកចេញរបស់លោក មិនមែនទៅកាន់ទ្រនំដែលធំហើយប្រសើជាមុននោះតែ តែលោកថា លោកនៅតែមានទំនាក់ទំនងនិងទ្រនំចាស់ដដែល ហើយនៅតែប្រាស្រ័យគ្នាយ៉ាងល្អប្រសើរដូចដើម។
អ្នកនិពន្ធរូបនេះ បានងាកមកបើក្រុមហ៊ុនផលិតចម្រៀងដោយខ្លួនឯងមានឈ្មោះថា «Home Music » ដែលបានប្រមូលតារាចម្រៀងល្បីនៅលើបណ្ដាញសង្គមហ្វេសប៊ុកមានដូចជា កុមារា ឃឿន បូរី អ្នកនាង រ័ត្ន រចនា និងកញ្ញា Autumn Allen រួមទាំងតារាចម្រៀងកំប្លែងជាច្រើនរូបទៀត។ Home Music របស់លោក យឹម តាស្រង់ បានបញ្ចេញបទចម្រៀងបែបកំប្លែងៗ និងកន្ទ្រាក់អារម្មណ៍ជាច្រើនបទហើយនៅលើបណ្ដាញសង្គមយូធូប។
លោកបន្ដថា នេះជាឆន្ទៈរបស់លោក គឺធ្វើអ្វីដែលខ្លួនឯងចង់ធ្វើ និងបំពេញក្ដីស្រលាញ់ខ្លួនឯង ដែលប្រឡូកក្នុងវិស័យនេះយូរឆ្នាំ មិនបានតាំងចិត្តចង់ប្រកួតប្រជែងនឹងក្រុមហ៊ុន ឬផលិតកម្មណានោះឡើយ ដោយលោកធ្វើវាឡើងដោយខ្លួនឯង តាមក្ដីស្រលាញ់និងចំណង់ចំណូលចិត្តប៉ុណ្ណោះ៕
