ថ្មីៗនេះ ផ្ទុះការសង្ស័យពីបណ្ដាអ្នកគាំទ្រថា ហេតុអ្វីបានជានៅតាមរោងការឮតែតារាចម្រៀងស្រី រ័ត្ន រចនា ច្រៀងតែបទ «មេម៉ាយសប្បាយចិត្ត» ។ តារាចម្រៀងស្រីរូបនេះ បានប្រាប់អ្នកសារព័ត៌មាននៅពេលថ្មីៗនេះ ចម្រៀងតែមួយបទទេ បានធ្វើឱ្យជីវិតរបស់អ្នកនាងផ្លាស់ប្ដូរសឹងតែ 360 ដឺក្រេតែម្ដង ពោលគឺឡើងកូដ មានកម្មវិធីអញ្ជើញពេញៗថ្ងៃ សឹងតែរកពេលសម្រាកមិនបាន រហូតដល់ត្រូវបានអញ្ជើញទៅសម្ដែងទៅប្រទេសក្រៅចំនួន 3 ប្រទេសបន្តបន្ទាប់គ្នាថែមទៀតផងដែរ។
ជាការពិតណាស់ តារាចម្រៀងស្រី រ័ត្ន រចនា ត្រូវបានគេទទួលស្គាល់ផងដែរថា បច្ចប្បន្ននេះជីវភាពរបស់នាងគ្រាន់បើជាងមុនច្រើន ដោយសារតែមានការងារធ្វើច្រើន ។ តារាស្រីរូបនេះថែមទាំងសារភាពថា ពីមុននាងច្រៀងមួយខែ មិនឃើញសល់លុយសោះ តែពេលនេះ ច្រៀងត្រឹមតែមួយសប្តាហ៍ អាចមានលទ្ធភាពសល់លុយ និងអាចជួយដោះស្រាយជីវភាពបានយ៉ាងស្រួល ។ ស្របពេលដែលជីវភាពចាប់ផ្តើមធូរធារ រ័ត្ន រចនា ក៏មានសំណាងបានចេញទៅសម្តែងនៅក្រៅប្រទេសផងដែរ ជាក់ស្តែងនៅបំណាច់ឆ្នាំមុននេះ នាងត្រូវចេញទៅ សម្តែងនៅប្រទេស កូរ៉េ រួមជាមួយតារាចម្រៀងជាច្រើនរូបទៀត ។
អ្វីដែលកាន់តែគួរឱ្យចាប់អារម្មណ៍ជាងនេះទៅទៀតនោះ គឺ ម្ចាស់បទមេម៉ាយសប្បាយចិត្តជំនាន់ថ្មីនេះ ទើបតែទិញរថយន្តប្រណិត ហាយឡែនឌឺ ពណ៌សមួយគ្រឿងដែលមានតំលៃជិត2 ម៉ឺនដុល្លារ ដែលធ្វើឱ្យមានការភ្ញាក់ផ្អើលខ្លាំងមិននឹកស្មានដល់។ មុននេះបន្តិច ប្រភពគណនីរបស់ រ័ត្ន រចនា បានបង្ហោះសារឱ្យដឹងថា « បងប្អូនខ្លះគាត់ឆ្ងល់មិនត្រឹមតែឆ្ងល់ទេជេរខ្ញុំទៀតថា ច្រៀងជិតងាប់ទៅវិញចេះតែមួយបទហ្នឹងទេអី ទៅណាក៏ឮតែច្រៀងបទហ្នឹង ខ្ញុំបានបងប្អូនជាច្រើនស្គាល់និងឱ្យតំលៃតាមរយះបទមួយនេះខ្ញុំទៅដល់ទីណាក៏ពួកគាត់សំណូមពរឱ្យខ្ញុំច្រៀងដែរ កុំជេរខ្ញុំអី »។
សូមជម្រាបថា អ្នកនាងមេម៉ាយសប្បាយចិត្តគ្រោងត្រៀមចេញ Original Song ផ្ទាល់ខ្លួន ក្រោមទឹកដៃអ្នកនិពន្ធម្នាក់ដែលធ្លាប់សាងកេរ្តិ៍ឈ្មោះល្បីល្បាញនៅថោនគឺលោក យឹម តាស្រង់ ។ អ្នកនាងថា ដោយសារតែមហាជនមួយចំនួនចង់ឃើញនាង មានចម្រៀងផ្ទាល់ខ្លួនច្រៀងទើបសម្រេចចិត្តធ្វើបទ Original song បំពេញចិត្តមហាជនតែម្ដងទៅ។ ការចេញចម្រៀងថ្មីលើកដំបូងនេះនាង សង្ឃឹមថានឹងទទួលបានការគាំទ្រពីពុកម៉ែបងប្អូនផងដែរ៕
