ខ្សែបម្រើស្លាប Ali Adnan បានស៊ុតបាល់ពិន័យ Free-kick នៅនាទីចុងក្រោយយ៉ាងល្អ ខណៈដែលក្រុមអតីតម្ចាស់ជើងឯកអ៊ីរ៉ាក់ បានធ្វើការវាយបកតាមពីក្រោយ 2លើក ដើម្បីផ្តួលក្រុមជម្រើសជាតិវៀតណាមក្នុងលទ្ធផល 3-2 ក្នុងព្រឹត្តិការណ៍ Asian Cup កាលពីថ្ងៃអង្គារ។
វាបានក្លាយជាការបញ្ចប់ក្នុងលទ្ធផលដ៏ខកចិត្តមួយសម្រាប់វៀតណាម ក្នុងការរងបរាជ័យក្នុងទីក្រុងអាប៊ូដាប៊ី ប៉ុន្តែក្រុមជម្រើសជាតិអ៊ីរ៉ាក់ ពិតជាស័ក្តិសមក្នុងការដណ្តើមបានជ័យជម្នះ ក្រោយពីកីឡាករ HumamTareq បានជួយឱ្យពួកគេតាមស្មើនៅនាទីទី60 ។
លោក SreckoKatanec គ្រូបង្វឹកនៃក្រុមជម្រើសជាតិអ៊ីរ៉ាក់បានឱ្យដឹងថា៖ «តង់ទី១ ពិតជាបានផ្តល់នូវការភិតភ័យ។ យើងមិនបានបង្ហាញពីអ្វីដែលយើងបានធ្វើក្នុងការហ្វឹកហាត់ឡើយ ពោលគឺគ្មានថាមពល និងគ្មានការលេងជាបុគ្គលទាល់តែសោះ។ វាប្រហែលជាការរំជួលចិត្តក្នុងការប្រកួតទី1 ខណៈដែលកីឡាករបានធ្លាក់ចូលក្នុងសម្ពាធបន្តិច»។
គ្រូបង្វឹកសញ្ជាតិស្លូវេនីរូបនេះបានឱ្យដឹងថា៖ «ខ្ញុំបានដឹងថា វានឹងក្លាយជាការប្រកួតដ៏តានតឹង។ ប៉ុន្តែ រឿងដ៏សំខាន់បំផុតនោះគឺថា ការដណ្តើមបាន 3ពិន្ទុ»។ ស្របពេលជាមួយគ្នានេះ ក្រុមម្ចាស់ជើងឯក 3សម័យកាល អារ៉ាប៊ីសាអ៊ូឌីត បានបង្ហាញពីភាពខ្លាំងរបស់ខ្លួន ខណៈដែលពួកគេបានយកឈ្នះលើក្រុមសល់សមាជិកត្រឹមតែ 10នាក់ កូរ៉េខាងជើងយ៉ាងងាយ ក្នុងលទ្ធផល 4-0 ក្នុងការប្រកួតបើកឆាកក្នុងពូល E របស់ពួកគេ។
វាបានក្លាយជាការបង្ហាញពីទម្រង់លេងមួយដែលបានធ្វើឱ្យអារ៉ាប៊ីសាអ៊ូឌីត ស្ថិតក្នុងនាមជាក្រុមដ៏ខ្លាំងមួយក្នុងយុទ្ធនាការប្រចាំទ្វីបមួយនេះ រួមជាមួយនឹងក្រុមជម្រើសជាតិអ៊ីរ៉ង់ ដែលបានលត់ក្រុមយេម៉ែន 5-០ កាលពីថ្ងៃចន្ទ៕
ប្រភពពី៖ Channel News Asia
