លោកតា លី ឈីងយ៉ុន ត្រូវបានសារព័ត៌មានចិនអះអាងថា ជាមនុស្សដែលមានអាយុវែងជាងគេបំផុតនៅក្នុងពិភពលោកនេះ ហើយបានធ្វើឱ្យមនុស្សជាច្រើនចាប់អារម្មណ៍ និងកើតចម្ងល់ថា ហេតុអ្វីលោកតាមានអាយុវែងម្លេះ? តើពិតដូចជាអ្វីដែលគេនិយាយដែរឬទេ? ថាតើលោកតាមានអាថ៌កំបាំងរក្សាសុខភាពអ្វីខ្លះ? ។ ជាការពិតណាស់ ភាគច្រើនគេមើលឃើញថា មនុស្សចាស់ជនជាតិជប៉ុនដែលមានអាយុរស់នៅបានយូរអង្វែងជាងគេ 122 ឆ្នាំ និង 6 ថ្ងៃ។ តែចំណែកបុរសចំណាស់ខាងលើនេះវិញ អាចថែរក្សាអាយុជីវិតបានវែងមិនធម្មតាឡើយ។
សៀវភៅកំណត់ហេតុរបស់លោក លី ឈីងយ៉ុន បានរៀបរាប់ថា បានកើតក្នុងឆ្នាំ 1677 និង មរណភាពក្នុងឆ្នាំ 1933 សរុបមានអាយុ 256ឆ្នាំ ហើយក៏មានការស៊ើបអង្កេតពីលោក វ៉ី ជុងឈាន ដែលបានរកឃើញសំបុត្រអបអរបុណ្យកំណើតជូនលោកគម្រប់ខួបទី 150ឆ្នាំ និង ខួបទី 200ឆ្នាំ ។ លោកតា លី ឈីងយ៉ុន ជាអ្នកជំនាញខាង ឱសថបុរាណចិន ដូចជា វល្លិស្មៅជាដើម លើសពីនេះ គាត់ក៏ជាអ្នកពូកែខាងទ្រឹស្ដីជីកុងផងដែរ ។ ហើយកត្តាទាំងពីរនេះដែលអាចឱ្យគាត់រស់រានមានអាយុយឺនយូរដូចនេះ។ លោកបានរៀបរាប់ពីរូបមន្តសម្ងាត់ដើម្បីឱ្យមានអាយុវែងនេះទៅកាន់ស្ដេចត្រាញ់ វ៉ី ប៉ីហ្វូ សម័យសាធារណរដ្ឋចិន 1916 – 1927 មាន4ចំណុចគឺ ៖ ធ្វើចិត្តឱ្យស្ងប់, អង្គុយឱ្យដូចអណ្ដើក ,ដំណើររហ័សដូចព្រាបហើរ ,ដេកដូចសុនក។
ជាពិសេសជាងនេះទៅទៀត លោកតាបានដើររុករកឱសថរុក្ខជាតិបុរាណចិនតាំងពីលោកមានអាយុ10ឆ្នាំមកម្ល៉េះគឺ បានទៅដល់ដែនដី កាន់ស៊ូ, ទីបេ, អណ្ណាម, ថៃ និង ម៉ាន់ជូ ដើម្បីប្រមូលរុក្ខឱសថទាំងនោះ មកប្រើប្រាស់ បង្កើនអាយុរបស់លោក៕
