នៅពេលមុននេះបន្ដិច អ្នកនាង យុគ ចិន្តា ដែលមហាជនស្គាល់ថា តារាសិល្បៈរៀមច្បងដ៏គួរឱ្យគោរពស្រឡាញ់មួយដួងនោះ បានចេញសារនៅលើបណ្ដាញសង្គមហ្វេសប៊ុក និយាយពីរឿងសិល្បៈ និងផ្ដល់កម្លាំងចិត្តដល់ ទេព បូព្រឹក្ស ។
អ្នកថា សិល្បៈជាជ្រុងមួយនៃផ្នែកចូលរួមជួយផ្សព្វផ្សាយលើកស្ទួយនៃអិរយៈធម៌វប្បធម៌ខ្មែរ នាងខ្ញុំយុគ ចិន្តា សូមចូលរួមផ្តល់កំលាំងចិត្តលើកទឹកចិត្តដល់កញ្ញាទេព បូព្រឹក្ស ទោះបីជានាងខ្ញុំមិនបានស្ថិតក្នុងហេតុការណ៌កើតឡើងក្នុងរឿងរ៉ាវនោះក៏ដោយ ប៉ុន្តែបន្ទាប់បានឃើញវីដេអូនោះហើយ នាងខ្ញុំពិតជាមានចិត្តអាណិតអាសូរនាងយ៉ាងខ្លាំង មើលហើយមើលទៀត ស្រក់ទឹកភ្នែកតាមនាង នៅពេលដែលនាងស្រែកទ្រហ៊ោយំ រកភាពយុត្តិធម៌សំរាប់ខ្លួន….តើយុត្តិធម៌មានឬទេសំរាប់តារាចំរៀងមួយរូបនេះ?
អ្នកនាងបន្ដទៀតថា ពាក្យចាស់ពោលថា ទះដៃតែម្ខាងប្រាកដជាមិនឰទេ ! ខ្ញុំទទួលស្គាល់ពាក្យនេះ តែនៅក្នុងហេតុការណ៌នៃរឿងរ៉ាវខ្វែងគំនិតគ្នា ឬមិនគោរពតាមកិច្ចសន្យាក្នុងការងារអ្វីក៏ដោយ គួរណាស់តែនិយាយគ្នាដោះស្រាយតាមសន្តិវិធីមិនមែនប្រើទង្វើដោយយកស្រាប៊ៀរជះលើរូបនាងនៅលើវេទិកាដែលនាងកុំពុងច្រៀងនោះទេ នៅទីនេះជាទីសាធារណៈមិនមែននៅក្នុងបន្ទប់ស្ងាត់ៗទេ មនុស្សម្នាក់ៗមានតំលៃគ្រប់ៗគ្នាមិនថាបុរសឬស្រ្តី ទោះបីអ្នកមានឬអ្នកក្រ យើងរស់នៅលើផែនដីតែមួយ ។
*មនុស្សយើងតែងតែមានកុំហុស
*មួយកុំហុសដោយអចេតនា
*មួយកុំហុសដោយចេតនា
ប៉ុន្តែបើសិនមានកុំហុសកើតឡើងហើយគួរណាស់ដោះស្រាយសិន កុំប្រើកំហឹងទាំងកំរោល
ចុងក្រោយនេះ ខ្ញុំសង្ឃឹមនឹងជឿជាក់ថារឿងរ៉ាវទាំងនេះនឹងដោះស្រាយដោយសន្តិវិធីនឹងមានភាពយុត្តិធម៌ទៅអោយភាគីទាំងពី។ ដោយក្តីស្រលាញ់នឹងផ្តល់កំលាំងចិត្តពីនាងខ្ញុំ យុគ ចិន្តា ៕
