លោក Jurgen Klopp អ្នកចាត់ការទូទៅរបស់ក្រុម Liverpool បានបញ្ជាក់ថា «គ្មានក្រុមណាដែលមានអារម្មណ៍ថាមានសុវត្ថិភាពឡើយ» ក្នុងការប្រជែងពានក្របខ័ណ្ឌ Premier League និងបានបញ្ជាក់ថា ក្រុម Chelsea និង Arsenal នៅតែស្ថិតក្នុងការប្រជែង។
ក្រុមរបស់លោក Klopp នឹងឈានទៅកាន់ចំណុចពាក់កណ្តាលផ្លូវនៃរដូវកាលនេះ នាថ្ងៃទី26 ខែធ្នូ ដោយស្ថិតនៅលើកំពូលតារាង ក្រោយពីបានបង្កើនការនាំមុខរហូតដល់ 4ពិន្ទុ។ ក្រុម Chelsea និង Arsenal ដែលស្ថិតក្នុងចំណាត់ថ្នាក់លេខ4 និងលេខ5 រៀងគ្នា កំពុងតែដេញតាមពីក្រោយក្រុម Liverpool 11ពិន្ទុ ខណៈដែលនៅសល់ការប្រកួត 20លើកទៀត។
លោក Klopp បានបញ្ជាក់ថា៖ «គ្មានក្រុមណាមានអារម្មណ៍ថា ស្ថិតនៅក្រៅនៃការប្រជែងពានឡើយ»។ ក្នុងរយៈពេល 8រដូវកាលក្នុងចំណោម 10រដូវកាល ក្រុមមានពិន្ទុនាំមុខនៅថ្ងៃបុណ្យណូអែល បានបន្តដំណើររបស់ខ្លួនទៅឈ្នះពាន Premier League។
ករណីលើកលែងចំនួន 2នោះ គឺក្នុងរដូវកាលឆ្នាំ2008-2009 និង2013-2014 ហើយករណីទាំង 2លើកបានកើនឡើង ដោយសារតែក្រុម Liverpool បានភ្លាត់ស្នៀតធ្លាក់ពីកំពូលតារាង ដើម្បីបញ្ចប់ក្នុងចំណាត់ថ្នាក់លេខ2។
Liverpool មិនធ្លាប់បានឈ្នះពានអង់គ្លេសសោះ ក្នុងសម័យកាល Premier League ខណៈដែលការឈ្នះពានក្នុងស្រុកជាលើកចុងក្រោយរបស់ពួកគេ បានកើតឡើងក្នុងឆ្នាំ1990។ ស្របពេលដែលក្រុម Tottenham បានលត់ក្រុម Everton យ៉ាងចាស់ដៃក្នុងលទ្ធផល 6-1 កាលពីថ្ងៃអាទិត្យ លោក Klopp មិនរំពឹងទុកថា រាល់លទ្ធផលល្អៗទាំងអស់ នឹងកើតឡើងចំពោះក្រុមរបស់លោកក្នុងការប្រកួតដែលនៅសល់នៃរដូវកាលនេះឡើយ៕