ការធ្វើការងារជាក្រុមជាជំនាញដ៏សំខាន់មួយដែលម៉ាស៊ីនមិនអាចធ្វើជំនួសមនុស្សបាន ហើយវាក៏ជាការងារចាំបាច់មិនអាចខ្វះបានផងដែរសម្រាប់គ្រប់ៗគ្នា មិនថាសិស្ស-និស្សិត បុគ្គលិកក្រុមហ៊ុន ម្ចាស់អាជីវកម្ម ឬអ្នកគ្រប់គ្រងនោះទេ។ នៅពេលមនុស្សអាចធ្វើការងារជាក្រុមបានល្អ ពួកគេនឹងអាចបង្កើតសមិទ្ធផលប្រកបដោយប្រសិទ្ធភាពខ្ពស់ ព្រោះគេអាចប្រមូលថាមពលរបស់មនុស្សគ្រប់គ្នាដើម្បីសម្រួចលើការងាររួមមួយ។
និស្សិតផ្នែកវិស្វកម្ម និងជាសមាជិកក្រុមតស៊ូមតិយុវជនដើម្បីគណនេយ្យភាពសង្គម យុវជន លឹម ម៉េងហ៊ាង បានលើកឡើងថា ការធ្វើការងារជាក្រុមជាវិធីដ៏សំខាន់ក្នុងការធ្វើឱ្យយើងម្នាក់ៗមានថាមពលកាន់តែខ្លាំងដើម្បីសម្រេចគោលដៅនានា និងជម្នះការលំបាក ទាំងការដោះស្រាយបញ្ហាក្នុងការសិក្សា និងការប្រកួតប្រជែងសំខាន់។ ដើម្បីធ្វើការងារជាក្រុមឱ្យបានល្អ សមាជិកក្រុមម្នាក់ៗត្រូវចេះបែងចែករចនាសម្ព័ន្ធក្រុមឱ្យបានច្បាស់លាស់ ដើម្បីធ្វើយ៉ាងណាបែងចែកតួនាទីគ្នាឱ្យបានច្បាស់លាស់។ សមាជិកក្រុមម្នាក់ៗ រួមទាំងប្រធានក្រុមផង សុទ្ធតែមានតួនាទីសំខាន់រៀងៗខ្លួនហេតុនេះ នៅពេលយើងបែងចែកតួនាទីគ្នាច្បាស់លាស់តាមរចនាសម្ព័ន្ធហើយ យើងនឹងដឹងពីដែនកំណត់នៃការធ្វើការងារ ហើយងាយស្រួលក្នុងការជួយគ្នានៅពេលសមាជិកណាម្នាក់មានបញ្ហា ឬត្រូវការជំនួយថែមទៀតផង។ ចំណុចសំខាន់មួយផ្សេងទៀត គឺការចូលរួមសម្របសម្រួល និងដោះស្រាយបញ្ហានៅពេលកើតមានឡើងដោយមិនបានព្រាងទុក។
យុវជន លីម ម៉េងហ៊ាង បាននិយាយថា៖ “មនុស្សម្នាក់ៗមានអត្តចរិត និងការយល់ឃើញមិនដូចគ្នាទេ ហេតុនេះជម្លោះ និងការខ្វែងគំនិតគ្នាច្បាស់ជាមានមិនអាចចៀសផុតបានឡើយ តែអ្វីដែលសំខាន់ គឺយើងចេះចូលរួមក្នុងការសម្របសម្រួល។ មនុស្សជាច្រើនប្រហែលជាគិតថា ការងារនេះជាភារកិច្ចរបស់ប្រធានក្រុមតែតាមពិតទៅវាជាភារកិច្ចសំខាន់របស់សមាជិកទាំងអស់គ្នា ព្រោះជម្លោះកើតឡើងពីការមិនយល់គ្នា ក្រោយពេលយើងបង្ហាញពីព័ត៌មានលម្អិត និងចូលរួមស្វែងរកចំណុចខ្វែងគំនិតបាន ក្រុមទាំងមូលនឹងមានភាពស្ងប់ស្ងាត់ ដែលអនុញ្ញាតឱ្យប្រធានក្រុមអាចមានភាពងាយស្រួលក្នុងការដឹកនាំក្រុម”។
អ្នកតស៊ូមតិខាងលើបានលើកឡើងផងដែរថាសម្រាប់ប្រធានក្រុមវិញ ការលើកទឹកចិត្តជារឿងសំខាន់មួយដែលត្រូវយកចិត្តទុកដាក់ ព្រោះការធ្វើការងារមិនមែនចេះតែរលូនដូចការនឹកឃើញនោះទេ។ មានពេលខ្លះការធ្វើលើកទី1បរាជ័យ និងមានកំហុសច្រើនហេតុនេះប្រសិនបើប្រធានក្រុម ចេះលើកទឹកចិត្ត សមាជិកម្នាក់ៗអាចនឹងមានថាមពលខ្លាំងឡើងវិញដើម្បីតស៊ូជាមួយបញ្ហារហូតសម្រេចគោលដៅ។ ជាធម្មតាក្រុមនីមួយៗបែកបាក់ គឺនៅពេលនេះឯង ឆន្ទៈដែលធ្លាប់តែខ្លាំងពីមុនអាចនឹងរលាយ ឬបែកខ្ញែកក្រោយពេលជួបបញ្ហា ហើយមិនមានការលើកទឹកចិត្តដែលរុញជម្លោះឱ្យកើតឡើងយ៉ាងងាយស្រួល។
យុវជន វណ្ណ កុម្ភៈ សមាជិកអ្នកតស៊ូមតិខាងលើមួយរូបផងដែរបានលើកឡើងថា ដើម្បីសម្រួចថាមពលឱ្យកាន់តែខ្លាំងក្នុងការធ្វើការងារជាក្រុម សមាជិកម្នាក់ៗចាំបាច់ត្រូវមានស្មារតីរួមក្នុងការរក្សាទឹកចិត្តឱ្យនៅតែមានកម្លាំងតាំងពីដើមរហូតដល់ចប់។ វាជារឿងលំបាក ព្រោះជាធម្មតាការធ្វើអ្វីក៏ដោយក៏វាមានដំណាក់កាលខ្ពស់ និងធ្លាក់ចុះដែរ ហេតុនេះការធ្វើការងារជាក្រុមក៏រមែងមានសភាពប្រែប្រួលទៅតាមបញ្ហាឯកជនរបស់សមាជិកម្នាក់ៗ ដែលទាមទារឱ្យសមាជិកឧស្សាហ៍ជួបគ្នា និងព្យាយាមរំឭកគ្នាឱ្យបានគោលដៅរួម កុំឱ្យភ្លេចពីទឹកចិត្តនៅពេលចាប់ផ្តើមសកម្មភាពឆ្ពោះទៅរកគោលដៅរួម។
យុវជន វណ្ណ កុម្ភៈ បាននិយាយថា៖ “ការរក្សាទឹកចិត្តជារឿងសំខាន់ណាស់សម្រាប់ការងារគ្រប់យ៉ាង។ សម្រាប់មនុស្សយើងម្នាក់ៗពេលខ្លះមានការធ្លាក់ទឹកចិត្ត ឬភ្លេចពីគោលដៅរបស់ខ្លួន ហេតុនេះសម្រាប់ក្រុមក៏តែងតែជួបបញ្ហានេះផងដែរ។ ប្រសិនបើយើងមិនបានតាមដានការអនុវត្តឱ្យបានល្អទេនោះ វានឹងធ្វើឱ្យមេរោគនេះវាយប្រហារដល់សាមគ្គីភាពរបស់ក្រុមបានយ៉ាងងាយ”។
អ្នកតស៊ូមតិខាងលើបានលើកឡើងបន្ថែមថា ការរក្សាទំនាក់ទំនងល្អពីអ្នកជំនាញខាងក្រៅក៏ជាវិធីសំខាន់មួយផងដែរដើម្បីធ្វើការងារក្រុមឱ្យទទួលបានជោគជ័យ។ ថ្វីដ្បិតតែក្នុងក្រុមការងារនីមួយៗសុទ្ធតែប្រមូលផ្តុំអ្នកជំនាញក៏ដោយ តែពេលខ្លះគ្មានមនុស្សណាខ្លាំងគ្រប់មុខនោះទេ ហេតុនេះនៅពេលសមាជិកម្នាក់ៗមានទំនាក់ទំនងល្អ គាត់អាចជួយស្វែងរកអ្នកជំនាញដើម្បីជួយដោះស្រាយបានយ៉ាងល្អនៅពេលណាសមាជិកម្នាក់ៗអស់លទ្ធភាពដើម្បីដោះស្រាយ៕
