ដើម្បីពង្រីកវិសាលភាពខ្លួនឱ្យកាន់តែទូលំទូលាយក្នុងការផ្តល់កម្ចីទៅដល់អតិថិជនទាំងនៅទីប្រជុំជន និងទីជនបទដាច់ស្រយាល គ្រឹះស្ថានមីក្រូហិរញ្ញវត្ថុហត្ថាកសិករបានប្រកាសលក់សញ្ញាបណ្ណរបស់ខ្លួនជាលើកដំបូង ដោយមានការគាំទ្រខ្លាំងពីអ្នកវិនិយោគិនក្នុង និងក្រៅស្រុករហូតលក់អស់100%តែម្តងក្នុងរយៈពេលខ្លីប៉ុណ្ណោះ។
លោកឧកញ៉ា ហួត អៀងតុង ប្រធានអគ្គនាយកនៃគ្រឹះស្ថានមីក្រូហិរញ្ញវត្ថុហត្ថាកសិករ លីមីតធីត មានប្រសាសន៍ថា ការប្រកាសលក់សញ្ញាបណ្ណជាលើកដំបូងនៅកម្ពុជា គឺដើម្បីកៀងគរថវិកាពីអ្នកវិនិយោគនានាដើម្បីពង្រីកទុនវិនិយោគបន្ថែមសម្រាប់ផ្តល់ប្រាក់កម្ចីទៅដល់ពលរដ្ឋទាំងនៅទីប្រជុំជន និងនៅទីជនបទឱ្យកាន់តែមានភាពទូលំទូលាយ និងប្រសើរឡើងថែមមួយកម្រិតទៀត។
លោកឧកញ៉ាបន្តថា អតិថិជនមានការគាំទ្រខ្លាំង ទាំងអ្នកវិនិយោគិនក្នុងស្រុក និងក្រៅស្រុកបានចូលរួមទិញអស់100% បន្ទាប់ពីការប្រកាសលក់ក្នុងរយៈពេលតែប្រមាណជា1ខែ រហូតមកទល់ថ្ងៃគោះជួងលក់ជាផ្លូវការ នៅក្រុមហ៊ុនមូលបត្រកម្ពុជាកាលពីសប្តាហ៍មុន។ លោកឧកញ៉ាបញ្ជាក់ថា ការប្រកាសលក់ជាលើកដំបូងនេះមានចំនួន 1,200,000សញ្ញាបណ្ណដែលក្នុងមួយសញ្ញាបណ្ណមានតម្លៃ10,000រៀល សរុបជាទឹកប្រាក់មានចំនួន 1,200ប៊ីលានរៀលស្មើនឹងជិត 30លានដុល្លារសហរដ្ឋអាមេរិក។
ការប្រកាសលក់សញ្ញាបណ្ណជាប្រាក់រៀលជាលើកដំបូងនៅកម្ពុជានេះ គឺដើម្បីរួមចំណែកលើកកម្ពស់ក៏ដូចជាចរាចរណ៍ប្រាក់រៀលខ្មែរឱ្យកាន់តែទូលំទូលាយថែមមួយកម្រិតទៀត សម្រាប់ចូលរួមកំណើនសេដ្ឋកិច្ចជាតិ ក៏ដូចជាការចូលរូមរក្សាស្ថិរភាពប្រាក់រៀល និងងាយស្រួលដល់ការគ្រប់គ្រងរូបិយវត្ថុជាតិរបស់រដ្ឋាភិបាលកម្ពុជា។
ឯកឧត្តម ហុង សុហួរ អគ្គនាយកផ្សារមូលបត្រកម្ពុជាមានប្រសាសន៍ថា ការប្រកាសលក់សញ្ញាបណ្ណទៅដល់អ្នកវិនិយោគនេះ ធ្វើឡើងក្នុងរយៈពេលកំណត់ 3ឆ្នាំ ក្នុងអត្រាការប្រាក់ 8.3ភាគរយក្នុងមួយឆ្នាំ។ ការលក់សញ្ញាបណ្ណនេះ និងផ្តល់ឱកាសដល់ហត្ថាកសិករបានកៀងគរទុនបន្ថែមពីអ្នកទិញក្នុងការពង្រីកដើមទុនរបស់ខ្លួនឱ្យកាន់តែរីកធំធាត់ឡើងថែមមួយកម្រិតទៀត ប៉ុន្តែដល់ពេលកំណត់ក្នុងរយៈពេល 3ឆ្នាំក្រោយ គ្រឹះស្ថានមីក្រូហិរញ្ញវត្ថុនឹងត្រូវសងត្រឡប់ទៅអតិថិជនរបស់ខ្លួនវិញទាំងដើម ទាំងការប្រាក់ ខុសពីការលក់ហ៊ុនដែលមិនមានការកំណត់នោះឡើយ។
ឯកឧត្តមពន្យល់ថា ការទិញសញ្ញាប័ណ្ណនេះ អតិថិជនមានឱកាសទទួលបានប្រាក់ចំណេញត្រឡប់ទៅវិញ ក្នុងអំឡុងពេល 3ឆ្នាំខាងមុខ ហើយបើសិនជាសញ្ញាបណ្ណឡើងថ្លៃ អតិថិជនក៏អាចដាក់លក់សញ្ញាបណ្ណរបស់ខ្លួនវិញមុនកាលកំណត់ខាងលើបាន ខុសពីការដាក់ប្រាក់បញ្ញើមិនសូវទទួលបានអត្រាការប្រាក់ខ្ពស់ ដូចការទិញសញ្ញាប័ណ្ណនេះទេ។
ការទិញភាគហ៊ុនមិនមានកាលកំណត់សងប្រាក់ត្រឡប់វិញនោះទេ ខាតឬចំណេញអាស្រ័យទៅលើការទិញ-លក់ភាគហ៊ុនរវាងម្ចាស់ហ៊ុន និងអ្នកទិញបន្ត មិនខុសពីការទិញលក់អចលនទ្រព្យនោះទេ បើសិនជាគាត់មានតម្រូវការលុយប្រើប្រាស់ប្រញាប់នោះ គាត់លក់ភាគហ៊ុនក្នុងតម្លៃទាបដែលនាំឱ្យខាតបង់ប្រាក់វិនិយោគ ប៉ុន្តែប្រសិនបើគាត់មិនមានតម្រូវកាប្រើប្រាស់ប្រាក់ទេ នៅពេលឱកាសហុចឱ្យ ភាគហ៊ុនឡើងថ្លៃ គាត់នឹងទទួលបានប្រាក់ចំណេញត្រឡប់មកវិញមិនខាន។
លោកជំទាវ ជា សិរី អគ្គនាយិកាបច្ចេកទេសនៃធនាគារជាតិនៃកម្ពុជាមានប្រសាសន៍ថា ការចុះបញ្ជីលក់ជាផ្លូវការនូវសញ្ញាបណ្ណសាជីវកម្មរបស់គ្រឹះស្ថានមីក្រូហិរញ្ញវត្ថុ ហត្ថាកសិករ លីមីតធីតនេះ បានឆ្លុះបញ្ចាំងឱ្យឃើញពីភាពរីកចម្រើននៃវិស័យហិរញ្ញវត្ថុ និងធនាគារនៅកម្ពុជា ដោយបច្ចុប្បន្នវិនិយោគិន ស្ថាប័នហិរញ្ញវត្ថុ និងសហគ្រាសវិនិយោគនានាមានជម្រើសជាឧបករណ៍វិនិយោគច្រើនជាងមុន ហើយគ្រឹះស្ថានផ្ទាល់ក៏មានលទ្ធភាពក្នុងការស្វែងរកទុនវិនិយោគបន្ថែមជាមួយនឹងថ្លៃចំណាយទាបសម្រាប់បំពេញតម្រូវការកំណើនឥណទាន។
ទន្ទឹមនេះ ការចេញផ្សាយសញ្ញាបណ្ណសាជីវកម្មជាប្រាក់រៀល បានឆ្លុះបញ្ចាំងឱ្យឃើញពីស្មារតីខ្ពស់របស់គ្រឹះស្ថានក្នុងការជួយគាំទ្រ និងលើកកម្ពស់គោលនយោបាយជំរុញការប្រើប្រាស់ប្រាក់រៀលរបស់ធនាគារជាតិនៃកម្ពុជា។ ឆ្លៀតឱកាសនេះ លោកជំទាវបានមានប្រសាសន៍លើកទឹកចិត្តដល់គ្រឹះស្ថានហិរញ្ញវត្ថុទាំងអស់ឱ្យបន្តយកចិត្តទុកដាក់ខ្ពស់ក្នុងការចូលរួមចំណែកលើកកម្ពស់វិស័យធនាគារ និងហិរញ្ញវត្ថុនៅកម្ពុជា៕
