ទឹកប្រាក់ហិរញ្ញប្បទានចំនួនជាង 260លានដុល្លារត្រូវបានសាធារណរដ្ឋប្រជាមានិតចិនផ្តល់ឱ្យកម្ពុជាក្នុងកិច្ចសហប្រតិបត្តិការរវាងកម្ពុជា និងចិន ដែលទឹកប្រាក់នេះត្រូវបាន ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងលោក Deng Boqingអនុប្រធានទីភ្នាក់ងារចិនសម្រាប់កិច្ចសហប្រតិបត្តិការបានចុះហត្ថលេខារួមគ្នាលើកិច្ចព្រមព្រៀងក្របខ័ណ្ឌចំនួន2។ នេះបើយោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ។
កិច្ចព្រមព្រៀងក្របខ័ណ្ឌចំនួន2 នោះរួមមាន៖
1- កិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ច និងបច្ចេកទេសនូវហិរញ្ញប្បទានឥតសំណងចំនួន 1,200លានយន់ (ជាង174លានដុល្លារ)។ថវិកានេះនឹងត្រូវប្រើប្រាស់សម្រាប់អនុវត្តគម្រោងលើកកម្ពស់ជីវភាពប្រជាជន និងគម្រោងសាងសង់ហេដ្ឋារចនាសម្ព័ន្ធសំខាន់ៗ។
2-កិច្ចព្រមព្រៀងក្របខ័ណ្ឌស្តីពីឥណទានសម្បទានជាប្រាក់យន់ចិន សម្រាប់គម្រោងអភិវឌ្ឍន៍អាងទឹករក្សាក្នុងខេត្តព្រះវិហារដែលមានចំនួន 622លានយន់ (ជាង 90លានដុល្លារ)។
ការចុះកិច្ចព្រមព្រៀងខាងលើធ្វើឡើងក្នុងអំឡុងដំណើរទស្សនកិច្ចរបស់លោក Deng Boqingអនុប្រធានទីភ្នាក់ងារចិនសម្រាប់កិច្ចសហប្រតិបត្តិការ នៃសាធារណរដ្ឋប្រជាមានិតចិន នៅកម្ពុជាពីថ្ងៃទី12 ដល់ថ្ងៃទី15 ខែធ្នូ ឆ្នាំ2018។ ខណៈដែលគណ:ប្រតិភូចិន បានចូលជួបសម្តែងការគួរសម និងពិភាក្សាការងារជាមួយអគ្គបណ្ឌិតសភាចារ្យ អូន ព័ន្ធមុនីរ័ត្ន។
ពិធីចុះហត្ថលេខានាពេលនេះ គឺសបញ្ជាក់ឱ្យឃើញនូវកិច្ចសហប្រតិបត្តិការល្អក្នុងក្របខ័ណ្ឌភាពជាដៃគូយុទ្ធសាស្រ្តគ្រប់ជ្រុងជ្រោយកម្ពុជា-ចិន ដែលធ្វើឱ្យរដ្ឋាភិបាលនៃប្រទេសទាំង2 កម្ពុជា-ចិន បន្តពង្រឹងកិច្ចសហប្រតិបត្តិការលើគ្រប់វិស័យ ក្នុងការជំរុញធ្វើឱ្យប្រសើរឡើងនូវកំណើនសេដ្ឋកិច្ច និងកំណើនជីវភាពរបស់ប្រជាជននៃប្រទេសទាំង2។
គួរបញ្ជាក់ថា គិតត្រឹមថ្ងៃទី13 ខែធ្នូ ឆ្នាំ2018 ទំហំហិរញ្ញប្បទានសហប្រតិបត្តិការពីរដ្ឋាភិបាល នៃសាធារណរដ្ឋប្រជាមានិតចិន នឹងមានចំនួនសរុបប្រមាណ 5,800លានដុល្លារអាមេរិកហើយ ក្នុងនោះឥណទានសម្បទានមានសរុបចំនួនប្រមាណ 4,400លានដុល្លារអាមេរិក និងហិរញ្ញប្បទានក្នុងក្របខ័ណ្ឌនៃកិច្ចសហប្រតិបត្តិការសេដ្ឋកិច្ច និងបច្ចេកទេសចំនួនប្រមាណ 1,400លានដុល្លារអាមេរិក៕
