លោក Thomas Tuchel ដែលជាគ្រូបង្វឹកបានប្រកាសកាលពីថ្ងៃចន្ទថា ខ្សែប្រយុទ្ធ Neymar និងKylian Mbappe នឹងចូលលេងឱ្យក្រុម Paris Saint-Germain ពេលជួបក្រុម Liverpool ក្នុងការប្រកួតដ៏សំខាន់នៃក្របខ័ណ្ឌ Champions League នៅរាត្រីនេះ ក្រោយពីបានជាសះស្បើយពីរបួសរៀងៗខ្លួន។
ក្នុងសន្និសីទសារព័ត៌មានមួយនាកីឡដ្ឋាន Parc des Princes លោក Tuchel បានឱ្យដឹងថា៖ «ពួកគេរឹងមាំគ្រប់គ្រាន់ហើយ ពួកគេមិនមានបញ្ហាឡើយ ពួកគេបានចូលរួមហ្វឹកហាត់ពេញលេញនៅថ្ងៃនេះ និងម្សិលមិញ វាគ្មានបញ្ហាអ្វីឡើយ ពួកគេនឹងលេងក្នុងជម្រើសដំបូងនៅថ្ងៃស្អែកនេះ»។
គ្រូបង្វឹករូបនេះបានបន្ថែមទៀតថា៖ «ប្រសិនបើពួកគេមិនមានភាពរឹងមាំទេនោះ ពួកគេមិនអាចលេងបានឡើយ ប៉ុន្តែ ពួកគេមិនបានតវ៉ាអ្វីឡើយកាលពីថ្ងៃម្សិលមិញ និងនៅថ្ងៃនេះ ហើយសម្រាប់ខ្ញុំពេលនេះ វាគ្មានការប្រថុយប្រថានអ្វីឡើយ»។
ក្រុម PSG នឹងឈានទៅកាន់ការប្រកួតនេះដោយស្ថិតក្នុងចំណាត់ថ្នាក់លេខ3 ក្នុងពូល C ហើយការបរាជ័យនៅពេលប្រកួតជាមួយនឹងក្រុមម្ចាស់ជើងឯករងកាលពីរដូវកាលមុន Liverpool បូករួមទាំងក្រុម Napoli យកឈ្នះលើក្រុមRed Star Belgrade លើទឹកដីខ្លួនឯងផងនោះ នឹងធ្វើឱ្យក្រុមមានម្ចាស់កម្មសិទ្ធិជាជនជាតិកាតាមួយនេះធ្លាក់ចេញយ៉ាងឆាប់រហ័ស។
លទ្ធផលរបស់ PSG ក្នុងក្របខ័ណ្ឌអឺរ៉ុប មិនបានទទួលជោគជ័យឡើយ ខណៈដែលពួកគេបានរងបរាជ័យ 3-2 នៅលើទឹកដីក្រុម Liverpool កាលពីខែកញ្ញា មុននឹងបានបញ្ចប់ក្នុងលទ្ធផលស្មើ 2លើកជាមួយនឹងក្រុម Napoli។
ការដណ្តើមបានជ័យជម្នះ 6-1 លើក្រុម Red Star កាលពីខែមុន គឺជាជ័យជម្នះតែមួយរបស់ក្រុមបារាំងមួយនេះ ក្នុងការប្រកួត 7លើកចុងក្រោយនៃក្របខ័ណ្ឌChampions League ដែលមិនមែនជាទម្រង់លេងដ៏រឹងមាំរបស់ក្រុមឈ្នះពាន 1ឡើយ។ ការប្រកួតនេះនឹងចាប់ផ្តើមនៅម៉ោង 3ទៀបភ្លឺ៕
ប្រភពពី៖ Sport24
