អគ្គនាយកដ្ឋានពន្ធដារ (GDT ឬThe General Department of Taxation) បានប្រកាសថា អគ្គនាយកដ្ឋានមានគោលបំណងបង្កើនប្រាក់ចំណូលពីការប្រមូលពន្ធចំនួន19% ជាមួយយុទ្ធសាស្ត្រថ្មីមួយសម្រាប់រយៈពេល 4ឆ្នាំខាងមុខដោយផ្អែកលើនិរន្តរភាព និងការប្រកួតប្រជែងដោយយុត្តិធម៌នៅក្នុងវិស័យឯកជន។ នេះបើយោងតាមសេចក្តីថ្លែងការណ៍របស់ GDT កាលពីពេលថ្មីៗនេះ។
អាជ្ញាធរពន្ធដារបានបង្ហាញពីផែនការរបស់ខ្លួនក្នុងអំឡុងជំនួបជាមួយវិស័យឯកជនកាលពីពេលថ្មីៗនេះ ដែលផែនការនេះជាផ្នែកមួយនៃយន្តការដើម្បីឱ្យភាគីទាំងពីរបានចូលមកអង្គុយនៅឯតុចរចា និងថា ការឱ្យក្រុមហ៊ុនជាច្រើនចូលរួមក្នុងក្របខ័ណ្ឌច្បាប់នេះ គឺចាំបាច់ដើម្បីសម្រេចគោលដៅប្រមូលពន្ធ។
ឯកឧត្តម គង់ វិបុល អគ្គនាយកនៃអគ្គនាយកដ្ឋានពន្ធដារបានមានប្រសាសន៍ថា ការធ្វើសេចក្តីព្រាងយុទ្ធសាស្ត្រថ្មីសម្រាប់ការប្រមូលពន្ធសម្រាប់ឆ្នាំ2019-2023 ជិតត្រូវបានបញ្ចប់ហើយដោយផែនការថ្មីនេះនឹងផ្តោតលើការបង្កើនការប្រមូលពន្ធប្រកបដោយចីរភាព ខណៈពេលកំពុងពង្រឹងការប្រកួតប្រជែងដោយយុត្តិធម៌ និងយុត្តិធម៌សង្គម។ “សម្រាប់ឆ្នាំ2019ខាងមុខ GDTបានសិក្សាពីកំណែទម្រង់នៃការគណនាពន្ធមូលដ្ឋានលើការផ្ទេរកម្មសិទ្ធិអចលនទ្រព្យ ពន្ធពិសេសលើទំនិញ និងសេវាកម្មពន្ធសាធារណៈ និងដំណើរការសវនកម្ម ដើម្បីធានាថា យើងបន្តបង្កើនចំណូលរបស់យើងពីការអនុវត្តការប្រមូលពន្ធ”។
លោក តែ តាំងប៉រ ប្រធានសហព័ន្ធសមាគមសហគ្រាសធុនតូច និងមធ្យមកម្ពុជាបានថ្លែងថា ព័ត៌មានលម្អិតពីផែនការប្រមូលពន្ធថ្មីនេះ គឺមានការខ្វះខាតច្រើន។ ពួកគេមិនបានផ្តល់ព័ត៌មានលម្អិតច្រើនទេ។ អ្វីដែលយើងដឹងគឺថា ពួកគេកំពុងព្យាយាមប្រមូលពន្ធ19%បន្ថែមទៀត។ លោកបានមានប្រសាសន៍ថា៖ “នេះមិនមែនមានន័យថា ពួកគេនឹងដំឡើងពន្ធនោះទេ តែផ្ទុយទៅវិញពួកគេនឹងផ្តោតលើការបង្កើនសមត្ថភាពប្រមូលពន្ធរបស់ខ្លួនដើម្បីសម្រេចគោលបំណងរបស់ពួកគេ”។
លោក ហូ វណ្ឌី ក្រុមប្រឹក្សាភិបាលសម្ព័ន្ធទេសចរណ៍ជាតិកម្ពុជាបានប្រាប់ថា៖“ក្រុមហ៊ុនឯកជនជាច្រើនទៀតត្រូវតែអនុវត្តតាមតម្រូវការពន្ធដើម្បីជួយអភិវឌ្ឍប្រទេសជាតិ។ យើងនឹងបន្តធ្វើការដើម្បីស្វែងរកដំណោះស្រាយចំពោះបញ្ហាជុំវិញរឿងពន្ធដារ និងលើកទឹកចិត្តជាមួយនឹង GDT ដើម្បីបង្កើនប្រាក់ចំណូលពន្ធ”។ ការទទួលបានក្រុមហ៊ុនជាច្រើនទៀតឱ្យមកចុះបញ្ជីជាមួយនាយកដ្ឋានពន្ធដារ គឺសំខាន់សម្រាប់កំណើនសេដ្ឋកិច្ច។
នៅក្នុងវេទិកាពន្ធ លោក Arnaud Darc ប្រធាន EuroCham បានថ្លែងថា ការប្រមូលពន្ធលើប្រាក់ចំណូលគួរតែត្រូវបានពិនិត្យឡើងវិញ ដោយលោកបានបន្ថែមថា ការយកពន្ធបែបនេះកំពុងធ្វើឱ្យមានការព្រួយបារម្ភយ៉ាងខ្លាំងក្នុងចំណោមអ្នករកស៊ីក្នុងវិស័យឯកជន។ លោកបាននិយាយថា ពួកគេបានចាត់ទុកផែនការនេះថាជារឿង “មិនយុត្តិធម៌ និងត្រូវបានដាក់កំហិត” ដោយGDT តែEuroChamបានអំពាវនាវឱ្យមានភាពយុត្តិធម៌ និងគាំទ្រដល់ក្រសួងសេដ្ឋកិច្ច និងហិរញ្ញវត្ថុនៅក្នុងការជំរុញរបស់ខ្លួនដើម្បីអនុវត្តយន្តការប្រមូលប្រាក់ចំណូលប្រកបដោយយុត្តិធម៌ និងមិនរើសអើង។
លោក ច្រឹក សុខនីម អគ្គនាយកក្រុមហ៊ុន Century21មេគង្គបានថ្លែងប្រាប់ឡារ៉ែនតាមរយៈទូរស័ព្ទថា សម្រាប់រឿងពន្ធនៅក្នុងវិស័យអចលនទ្រព្យ គឺគេគ្រោងដើម្បីធ្វើបច្ចុប្បន្នភាពតម្លៃដីធ្លី។ ពោលគឺមិនមែនជាការដំឡើងពន្ធទេ។ ចំពោះគោលការណ៍នៃការប្រមូលពន្ធឱ្យត្រឹមត្រូវតាមបទដ្ឋានគឺខាងពន្ធដារគ្រោងប្រមូលឱ្យបានតាមផែនការដើម្បីឱ្យបានកើន19%។
លោកអគ្គនាយកបានបញ្ជាក់ថា ដោយឡែកការពាក់ព័ន្ធការធ្វើបច្ចុប្បន្នភាពតម្លៃដីធ្លី គឺដោយសារតែការធ្វើកន្លងមក បានកន្លងហួសច្រើនឆ្នាំមកហើយ។ឧទាហរណ៍ដី1កន្លែងតម្លៃ1ម៉ែត្រការ៉េ 50$ឥឡូវតម្លៃលក់លើទីផ្សារឡើងដល់ 70$-100$ទៅហើយ ដូច្នេះគេហៅថាធ្វើបច្ចុប្បន្នភាពលើតម្លៃអចលនវត្ថុ។ ប៉ុន្តែការគ្រោងនេះមិនទាន់ចាប់ផ្តើមទេ ហើយវានឹងមិនមានបញ្ហាអ្វីទេ ព្រោះកំណត់ច្បាប់នៅដដែល គេគ្រាន់តែធ្វើបច្ចុប្បន្នភាពតម្លៃប៉ុណ្ណោះ។ ការប្រមូលជាចំណូលវាអាចកើនឡើង បើប្រថាប់ត្រា 4%ដូចគ្នា វាមានតម្លៃខុសគ្នាហើយ ហើយវានឹងកើនឡើងដោយស្វ័យប្រវត្តិ ព្រោះគេធ្វើឱ្យសមាមាត្រទៅលើទីផ្សារ។
សូមបញ្ជាក់ថា តាមរយៈការអនុវត្តគោលនយោបាយសារពើពន្ធ ព្រមទាំងធ្វើទំនើបកម្មពន្ធដារ ដោយអនុវត្តស្របតាមយុទ្ធសាស្ត្រ កៀរគរចំណូលរយៈពេលមធ្យម 2014-2018 ជាលទ្ធផលនៃការគ្រប់គ្រងប្រមូលចំណូលពន្ធ និងអាករគ្រប់ប្រភេទឆ្នាំ2017 សម្រេចបាន115,2% នៃផែនការច្បាប់។ ដោយឡែកក្នុងឆ្នាំ2018 គិតត្រឹមថ្ងៃទី26 ខែតុលា អគ្គនាយកដ្ឋានពន្ធដារបានប្រមូលចំណូលពន្ធ និងអាករសរុប (តាមប្រព័ន្ធអនឡាញ) បាន97,44% នៃផែនការកំណត់ដោយច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ2018៕
