ក្រសួងសេដ្ឋកិច្ច និងហិរញ្ញវត្ថុបានការពារ និងពន្យល់ពីការបង្កើនថវិកានៅឆ្នាំក្រោយដែលបានស្នើឡើងនោះ ដោយនិយាយថា វាស្របទៅនឹងកំណើនសេដ្ឋកិច្ចរបស់ប្រទេស។ ការពន្យល់នេះត្រូវបានធ្វើឡើងនៅមុខអ្នកចូលរួមមកពីព្រឹទ្ធសភារដ្ឋសភា និងក្រសួងពាក់ព័ន្ធផ្សេងទៀត និងត្រូវបានសង្ខេបអំពីសេចក្តីព្រាងថវិកាឆ្នាំ2019 ក្នុងអំឡុងពេលសិក្ខាសាលាស្តីពីការកសាងគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈសម្រាប់ពង្រាងច្បាប់ស្តីពីថវិកាជាតិឆ្នាំ2019។
ឯកឧត្តម វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានថ្លែងថា ផលប៉ះពាល់នៃសេដ្ឋកិច្ចពិភពលោកមកលើប្រទេសកម្ពុជាត្រូវបានសរសេរបញ្ចូលក្នុងសេចក្តីព្រាងនៃថវិកា។ លោកបានកត់សម្គាល់ថា សមិទ្ធផលពីមុនៗ រួមមានសន្តិភាព ស្ថិរភាពនយោបាយ ការអភិវឌ្ឍសេដ្ឋកិច្ចសង្គម និងសាមគ្គីភាពជាតិ ក៏ត្រូវបានគេយកចិត្តទុកដាក់ផងដែរនៅក្នុងសេចក្តីព្រាងនោះ។
សូមបញ្ជាក់ថា កាលពីថ្ងៃទី26 ខែតុលា ទីស្តីការគណៈរដ្ឋមន្ត្រីបានអនុម័តសេចក្តីព្រាងថវិកាជាតិប្រមាណ 6.7 ពាន់លានដុល្លារសម្រាប់ឆ្នាំ2019 ពោលគឺកើនឡើង 11,4% លើសឆ្នាំ2018។ យោងតាមសេចក្តីព្រាងថវិកាឆ្នាំ2019 នឹងមានប្រហែល 6.7ពាន់លានដុល្លារ គឺកើនឡើងពី 6.09ពាន់លានដុល្លារក្នុងឆ្នាំ2018 ។
រដ្ឋបាលទូទៅត្រូវបានគ្រោងនឹងទទួលបាន605.29លានដុល្លារ។ 1.1ពាន់លានដុល្លារសម្រាប់ផ្នែកសន្តិសុខ និងការពារ។ 1.78ពាន់លានដុល្លារសម្រាប់សុខុមាលភាពសង្គម។ 1.62ពាន់លានដុល្លារសម្រាប់សេដ្ឋកិច្ច និង1.25ពាន់លានដុល្លារ គឺសម្រាប់មូលនិធិសង្គ្រោះបន្ទាន់។
ក្រសួងអប់រំ យុវជន និងកីឡានឹងទទួលបានកញ្ចប់ថវិកាខ្ពស់បំផុតចំនួន 899.67លានដុល្លារបន្ទាប់មកក្រសួងកិច្ចការសាធារណៈមានទឹកប្រាក់ចំនួន 735.7លានដុល្លារ ក្រសួងការពារជាតិចំនួន593.71លានដុល្លារ ក្រសួងមហាផ្ទៃចំនួន 454.88លានដុល្លារ និងក្រសួងសុខាភិបាលចំនួន 447.4 លានដុល្លារ។
ថវិកានេះបានកើនឡើងជារៀងរាល់ឆ្នាំដោយមានទឹកប្រាក់ 6.03ពាន់លានដុល្លារក្នុងឆ្នាំ2018 ធៀបនឹងឆ្នាំ2017 ដែលមានចំនួន 5.23ពាន់លានដុល្លារ។ ផលិតផលក្នុងស្រុកសរុបរបស់ប្រទេសកម្ពុជាមានការកើនឡើងក្នុងអត្រា 7% ជារៀងរាល់ឆ្នាំដោយវិស័យសំណង់ និងវិស័យទេសចរណ៍រួមចំណែកច្រើនបំផុត។
កំណើនសេដ្ឋកិច្ចរបស់ប្រទេសកម្ពុជាក្នុងឆ្នាំ2019 នឹងស្ថិតក្នុងរង្វង់ 7.1% ស្របពេលផលិតផលក្នុងស្រុកសរុប(ផសស)របស់ប្រទេសកម្ពុជានឹងកើនដល់ប្រមាណ27,222លានដុល្លាអាមេរិក ហើយប្រាក់ចំណូលសម្រាប់មនុស្សម្នាក់នឹងកើនឡើងដល់ 1,706ដុល្លារអាមេរិកក្នុងមួយឆ្នាំ។ កំណើននេះត្រូវបានទ្រទ្រង់ដោយការលូតលាស់នៃវិស័យសំខាន់ៗចំនួន3 រួមមាន វិស័យឧស្សាហកម្ម វិស័យសេវាកម្ម និងវិស័យកសិកម្ម។ នេះបើយោងតាមឯកសារស្តីពីសេចក្តីព្រាងច្បាប់ថវិកាឆ្នាំ2019។
នៅក្នុងឆ្នាំ2019ខាងមុខ វិស័យធំៗចំនួន3 នៅតែបន្តរក្សាកំណើនល្អ ក្នុងនោះកំណើននៃវិស័យឧស្សាហកម្មនឹងបន្តរក្សាភាពរឹងមាំ ដែលនឹងសម្រេចបានក្នុងអត្រាកំណើនប្រចាំឆ្នាំក្នុងរង្វង់10% ដែលគាំទ្រដោយភាពរឹងមាំនៃវិស័យសំណង់។ វិស័យកាត់ដេរនឹងបន្តរក្សាកំណើនដូចឆ្នាំកន្លងទៅ ស្របគ្នានឹងសម្ទុះកំណើនខ្ពស់នៃវិស័យកម្មន្តសាលមិនមែនកាត់ដេរទាំងសម្រាប់នាំចេញ និងបម្រើក្នុងទីផ្សារក្នុងស្រុក។ រីឯវិស័យកសិកម្មវិញ អាចសម្រេចបានក្នុងកំណើនរង្វង់ 1.8% ដែលទ្រទ្រង់ដោយអនុវិស័យដំណាំ និងជលផល ក្នុងនោះអនុវិស័យដំណាំត្រូវបានរំពឹងថា នឹងមានកំណើនប្រហែលឆ្នាំកន្លងទៅ គឺដោយសារអំណោយផលនៃកត្តាអាកាសធាតុភាពល្អប្រសើរឡើងនៃប្រព័ន្ធធារាសាស្ត្រ និងកំណើនឡើងនៃតម្លៃអង្ករនៅលើទីផ្សារអន្តរជាតិ ព្រមទាំងការកើនឡើងនៃដំណាំកសិផលដែលបម្រើឱ្យការនាំចេញដូចជាកៅស៊ូ និងផ្លែចេកជាដើម ចំណែកពាក់ព័ន្ធអនុវិស័យនេសាទ និងអនុវិស័យចិញ្ចឹមសត្វវិញក៏ត្រូវបានរំពឹងថា មានកំណើនល្អឡើងដែរ។
របាយការណ៍ដដែលបានឱ្យដឹងទៀតថា វិស័យសេវាកម្មនៅកម្ពុជាក៏ត្រូវបានរំពឹងថា នឹងបន្តមានកំណើនប្រមាណ7% គាំទ្រដោយកំណើននៃអនុវិស័យសណ្ឋាគារ និងភោជនីយដ្ឋានដែលឆ្លុះបញ្ចាំងតាមរយៈកំណើនខ្ពស់នៃចំនួនភ្ញៀវទេសចរអន្តរជាតិ។ ចំណែកវិស័យលក់ដុំ-រាយនឹងរក្សាកំណើនបានល្អដែលគាំទ្រដោយកំណើននៃការប្រើប្រាស់ក្នុងស្រុកដោយសារកំណើនប្រាក់ចំណូលរបស់ប្រជាជន។ រីឯវិស័យអចលនទ្រព្យក៏ត្រូវបានរំពឹងថានឹងបន្តមានកំណើនខ្ពស់ ស្របតាមនិន្នាការនៃអនុវិស័យសំណង់ដែរ ខណៈដែលអនុវិស័យដឹកជញ្ជូនក៏ត្រូវបានរំពឹងថា នឹងបន្តរក្សាកំណើនបានដូចគ្នា។
អតិផរណាមធ្យមប្រចាំឆ្នាំត្រូវបានប៉ាន់ប្រមាណថា នឹងស្ថិតក្នុងកម្រិតគ្រប់គ្រងបាន គឺក្នុងអត្រា3.1%នៅឆ្នាំ2019 គឺស្របតាមកំណើនរំពឹងទុកនៃកំណើនយឺតនៃតម្លៃប្រេងលើទីផ្សារអន្តរជាតិ និងកំណើនយឺតជាងមុននៃតម្លៃម្ហូបអាហារ។ ចំពោះអត្រាប្តូរប្រាក់រៀលវិញ គឺស្ថិតក្នុងរង្វង់ 4,050រៀលក្នុង1ដុល្លារនៅឆ្នាំ2019។
ចំណែកទុនបម្រុងអន្តរជាតិ ត្រូវបានរដ្ឋាភិបាលរំពឹងថា នឹងបន្តកើនឡើងដល់ប្រមាណ11,059លានដុល្លារដែលធានាការនាំចេញបាន5-6ខែនៅក្នុងឆ្នាំ2019ខាងមុខនេះ។ ទោះបីយ៉ាងនេះក្ដី កម្ពុជានឹងត្រូវបន្ដប្រឈមនឹងហានិភ័យដែលបណ្ដាលមកពីកត្តាខាងក្រៅ និងកត្តាខាងក្នុងមួយចំនួនដែលអាចនឹងធ្វើឱ្យប៉ះពាល់ដល់កំណើនសេដ្ឋកិច្ចរបស់កម្ពុជា។
អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានបញ្ជាក់ថា ការកសាងសេចក្តីព្រាងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ2019 មានគោលដៅគាំទ្រដល់ការអនុវត្តកម្មវិធីនយោបាយរបស់រាជរដ្ឋាភិបាល ជាពិសេសការអនុវត្តអាទិភាពគោលនយោបាយសំខាន់ៗ និងវិធានការកែទម្រង់ជាក់ស្តែងនានាដែលនឹងត្រូវផ្តើមអនុវត្តនៅក្នុងឆ្នាំ2019ខាងមុខ៕
