ក្នុងការរស់នៅ មនុស្សម្នាក់ៗតែងតែប្រាថ្នាសេចក្តីសុខ និងភាពរីកចម្រើន តែពេលខ្លះឧបសគ្គក្នុងជីវិតបានជំរុញឱ្យពួកគេត្រូវដោះស្រាយបញ្ហាជាច្រើនរាប់មិនអស់ រហូតធ្វើឱ្យមានការនឿយហត់ ឬអស់សង្ឃឹមកើតឡើង។ បញ្ហាទាំងអស់នេះ កើតឡើងមកពីរបៀបនៃការគិត និងការរស់នៅរបស់មនុស្សម្នាក់ៗ ដែលបង្កើត ជាសកម្មភាព និង បរិស្ថានជីវិតមួយក្នុងភាពអវិជ្ជមាន។
សាស្ត្រាចារ្យនៃសាកលវិទ្យាល័យបញ្ញាសាស្ត្រកម្ពុជា ព្រះតេជគុណគូ សុភាព បានលើកឡើងថា តាមធម្មជាតិរបស់មនុស្ស វ័យកណ្តាលជាវ័យរឹងមាំ និងស្រស់បំព្រងជាងគេ តែស្ថានភាពជាក់ស្តែងមិនដូច្នេះនោះទេ ព្រោះតាមការស្រាវជ្រាវបានបង្ហាញឱ្យឃើញថា យុវវ័យ និងមនុស្សវ័យកណ្តាលជាអ្នកដែលមានបញ្ហាផ្លូវចិត្តច្រើនជាងវ័យផ្សេង។ យុវវ័យជាវ័យ ដែលស្រួចស្រាល់នឹងមានបញ្ហាក្នុងជីវិតឬបាក់ទឹកចិត្ត ព្រោះពួកគេនៅក្មេងវ័យមិនមានសមត្ថភាពគ្រប់គ្រាន់ក្នុងការទប់ស្កាត់នូវបញ្ហាក្នុងជីវិតបានល្អ។ ហើយជាធម្មជាតិមនុស្សកាន់តែធំកាន់តែមានបញ្ហាច្រើនឡើងក្នុងជីវិត ព្រោះបន្ទុកទាំងអស់បានចូលមកក្នុងខ្លួនបន្តិចម្តងៗ ដូចជាបន្ទុកនៃការសិក្សា ការងារ គ្រួសារ និងការទទួលខុសត្រូវផ្សេងៗទៀត។ ហេតុនេះយុវជន និងអ្នកគ្រប់គ្នាចាំបាច់ត្រូវយកចិត្តទុកដាក់ក្នុងជីវិត ដើម្បីអប់រំចិត្តកុំឱ្យមានស្ថានភាពភាពទន់ខ្សោយ ឬវិបត្តិដែលឈានទៅដល់គ្រោះមហន្តរាយក្នុងការរស់នៅ ដែលអ្នកខ្លះអាចឈានដល់ដំណាក់កាលធ្វើអត្ថឃាតក៏មាន។
ព្រះតេជគុណ គូ សុភាព បានមានសង្ឃដីកាថា៖ “យុវវ័យបច្ចុប្បន្នដោយសារតែរស់នៅជាមួយនឹងបណ្តាញសង្គមច្រើនពេក ហើយសន្សំរឿងមិនល្អច្រើននៅក្នុងចិត្ត ធ្វើឱ្យពួកគេឆាប់បាក់ទឹកចិត្ត ដែលនាំឱ្យខាតបង់ដល់ឱកាសអភិវឌ្ឍ៏ជាច្រើនសម្រាប់ខ្លួនឯង”។
ព្រះតេជគុណសាស្ត្រាចារ្យខាងលើបានបញ្ជាក់ផងដែរថា យុវជនមួយចំនួនមានការភ្លេចខ្លួនដែលបណ្តោយឱ្យជីវិតរបស់ពួកគេត្រូវធ្លាក់ក្នុងវិបត្តិផ្លូវចិត្តតាមរយៈការប្រើប្រាស់បច្ចេកវិទ្យា។
អ្នកជំនាញ បច្ចេកវិទ្យាបានបញ្ជាក់ថាអ្នកដែលនៅមុខបណ្តាញសង្គមច្រើនជ្រុលពេក ជាអ្នកដែលងាយនឹងមានជំងឺផ្លូវចិត្ត ហើយជាធម្មតានៅក្នុងបណ្តាញសង្គមធំៗទាំងអស់លើពិភពលោកគឺគេបង្កើតឱ្យមាន Notification ដែលវាធ្វើឱ្យយើងចង់មើល ឬចង់តាមដានជាមួយវារហូត។
ស្របពេលនេះដែរយុវជនយើងជាច្រើនបានជក់ចិត្តជាមួយនឹងបណ្តាញសង្គមខ្លាំងពេក រហូតធ្វើឱ្យបណ្តាញសង្គមដឹកនាំដំណើរជីវិត ឬគ្រប់គ្រងពួកគាត់បាន។ ហេតុនេះជាដំណោះស្រាយគឺត្រូវគ្រប់គ្រងខ្លួនឯងឱ្យបានពីការបើកមើលបណ្តាញសង្គម ព្រោះបណ្តាញដែលយើងកំពុងប្រើប្រាស់ជារបស់យើង ហើយយើងចង់បើកមើលពេលណាជាសិទិ្ធរបស់យើង កុំឱ្យវាគ្រប់គ្រងយើងថាត្រូវតែបើកមើលវាខានមិនបាននោះ។
លើសពីនេះទៅទៀត ព្រះតេជគុណបានមានសង្ឃដីកាផងដែរថា ដោយសារតែស្ថានភាពផ្លូវចិត្តមានភាពទន់ខ្សោយ យុវជនមានភាពផុយស្រួយនឹងការធ្វើអត្តឃាត ព្រោះតាមការស្រាវជ្រាវបានបញ្ជាក់ថា ក្នុងមួយថ្ងៃៗអ្នកមានវិបត្តិសម្លាប់ខ្លួនឯងចំនួន 80ម៉ឺននាក់ បើបែងចែកជាវិនាទីគឺរយៈពេល 4វិនាទី មានមនុស្សសម្លាប់ខ្លួនឯងម្នាក់ ហេតុនេះសូមយុវជនមានការប្រុងប្រយ័ត្នចំពោះការរស់នៅ។ មានយុវជនខ្លះទៀតមានបញ្ហាស្នេហាសម្លាប់ខ្លួន មនុស្សខ្លះមានបញ្ហាលុយកាក់ក៏សម្លាប់ខ្លួន ហើយមានសិស្សខ្លះមានបញ្ហាប្រឡងមិនជាប់ក៏សម្លាប់ខ្លួនដែរ ដែលបង្ហាញថា ជីវិតរបស់គាត់គឺមានតម្លៃស្មើនឹងសញ្ញាបត្រមួយតែប៉ុណ្ណោះ។
ដើម្បីបញ្ជៀសនូវបញ្ហាទាំងអស់នោះ សូមយុវជនគិតថាជីវិតគឺប្រៀបបានទៅនឹងដៃរបស់មនុស្សដែរ ដែលមាន2គឺខាងឆ្វេង និងខាងស្តាំ ហើយមនុស្សអាចសំពះបានគឺអាស្រ័យលើដៃទាំង2ផ្គុំគ្នា។ បើប្រៀបធៀបដៃស្តាំថាជាសុខ ដៃឆ្វេងអាចជាទុក្ខ ហេតុនេះជីវិតគឺជាការបូកផ្សំគ្នារវាងសុខ និងទុក្ខ មិនមានមនុស្សណាម្នាក់ចៀសផុតនោះទេ។
ដើម្បីបញ្ជៀសបញ្ហាបាន ទាល់តែមនុស្សយល់ពីភាពជាក់ស្តែងទាំងអស់នេះថា សុខ និងទុក្ខវាត្រូវតែកើតឡើង ហេតុនេះយើងម្នាក់ៗត្រូវតែត្រៀមលក្ខណៈឱ្យបានល្អដើម្បីជម្នះវាឱ្យបាន។
ដើម្បីជាដំណោះស្រាយ និងទប់ស្កាត់បញ្ហាផ្លូវចិត្តមិនល្អ យុវជនគួរធ្វើរឿងសំខាន់3យ៉ាងគឺ ទី1ត្រូវបញ្ជៀសខ្លួនពីព័ត៌មានអាក្រក់ៗដែលប៉ះពាល់ដល់ការគិត។ រឿងក្តៅក្រហាយ ឬរឿងជេបទេចដែលសម្បូរក្នុងសង្គមរបស់យើងត្រូវចៀសឱ្យឆ្ងាយ ព្រោះវាមិនធ្វើឱ្យយើងរីករាយនោះទេ។ ជាឧទាហរណ៍ មានអ្នកសារព័ត៌មានម្នាក់គាត់ធ្លាប់តែប្រមូល និងស្រាវជ្រាវពីរឿងឃាតកម្ម ឬបញ្ហាអាក្រក់ៗក្នុងសង្គម នៅទីបំផុតគាត់មើលឃើញពិភពលោកថា ខ្មៅងងឹតហើយក៏សម្លាប់ខ្លួនឯងទៅ ស្របពេលដែលពិភពជាក់ស្តែងមិនប្រាកដថាដូចអ្វីដែលគាត់បានគិតនោះទេ។
ចំណុចទី2គឺត្រូវសន្សំរឿងល្អៗទុកក្នុងចិត្ត តាមរយៈការចែករំលែករឿងល្អៗ ឬសេពគប់មនុស្សដែលមានគំនិតវិជ្ជមានសម្រាប់ការរស់នៅ ឬការសិក្សាជាដើម។ នៅពេលដែលយើងមានទម្លាប់គិតប្រកបដោយភាពវិជ្ជមាននោះយើងនឹងអាចរស់នៅប្រកបដោយភាពស្រស់ស្រាយ ហើយភាពស្រស់ស្រាយនេះក៏នឹងអាចចែករំលែកទៅមនុស្សជុំវិញខ្លួនយើងដែរ។
ចំណុចទី3គឺកម្ម មានន័យថា ជីវិតមនុស្សម្នាក់ៗកើតមកមិនដូចគ្នានោះទេ លទ្ធផលដែលកើតមានឡើងក្នុងជីវិតគឺអាស្រ័យលើសកម្មភាពដែលយើងបានធ្វើ។ ប្រសិនបើយើងព្យាយាមប្រើប្រាស់ជីវិតដោយការធ្វើល្អនោះយើងនឹងទទួលបានតែរឿងល្អៗក្នុងជីវិត តែប្រសិនបើយើងធ្វើតែអំពើអាក្រក់ ច្រណែនបំផ្លិចបំផ្លាញមិនឱ្យមនុស្សដទៃល្អជាងយើង តើអាចនឹងទទួលបានលទ្ធផលល្អយ៉ាងម៉េចកើត ព្រោះយើងកំពុងសន្សំរឿងក្តៅក្រហាយរាល់ថ្ងៃ៕
