កីឡាករប្រណាំងរថយន្ត Lewis Hamilton នឹងខិតកាន់តែកៀកទៅជិតកំណត់ត្រារបស់ Michael Schumacher ហើយ ប្រសិនបើរូបគេឈ្នះពាន Formula One ពិភពលោកជាលើកទី5 នៅចុងសប្តាហ៍នេះ ក្នុងទីក្រុង Austin ប៉ុន្តែ រូបគេបានបញ្ជាក់ប្រាប់កាលពីថ្ងៃពុធថា ការតាមស្មើកំណត់ត្រារបស់អតីតកីឡាករដ៏ឆ្នើមរបស់អាល្លឺម៉ង់រូបនេះ មិនបានស្ថិតក្នុងផែនការរបស់គេឡើយ។
កីឡាកររបស់ក្រុម Mercedes រូបនេះកំពុងស្ថិតនៅពីក្រោយកំណត់ត្រានៃការឈ្នះពានពិភពលោកចំនួន 7លើករបស់ Schumacher ត្រឹមតែ 2លើកទៀតប៉ុណ្ណោះ ប្រសិនបើរូបគេរកបាន 8ពិន្ទុច្រើនជាងកីឡាករ Sebastian Vettel របស់ក្រុម Ferrari ក្នុងទីក្រុង Austin នៅថ្ងៃអាទិត្យនេះ។ ប៉ុន្តែ Hamilton បានបញ្ជាក់ថា រូបគេបានសម្រេចនូវមហិច្ឆតាក្នុងជីវិតរបស់គេកាលពីឆ្នាំ2015រួចហើយ ដែលនៅពេលនោះរូបគេបានតាមស្មើកំណត់ត្រារបស់តារាឆ្នើមក្នុងដួងចិត្តរបស់គេ គឺលោក Ayrton Senna ម្ចាស់ជើងឯកពិភពលោក 3សម័យកាលរបស់ប្រេស៊ីល ដែលបានស្លាប់កាលពីឆ្នាំ1994 ហើយថា ការតាមឱ្យស្មើកំណត់ត្រារបស់ Schumacher មិនបានស្ថិតក្នុងគោលដៅរបស់គេឡើយ។
Hamilton បានប្រាប់បណ្តាញសារព័ត៌មាន Reuters ថា៖ «និយាយឱ្យត្រង់ទៅ នោះមិនមែនជាគោលដៅរបស់ខ្ញុំឡើយ។ ខ្ញុំបានចាប់ផ្តើមជាមួយនឹងគោលដៅដើម្បីតាមស្មើលោក Ayrton Senna ឬតាមស្មើលោក Ayrton Senna ដែលជាមនុស្សធ្វើឱ្យខ្ញុំចង់ធ្វើតាម។ ខ្ញុំបានតាមស្មើកំណត់ត្រារបស់គាត់កាលពី 2ឆ្នាំមុន។ ហេតុនេះ ចាប់តាំងពីពេលនោះមក ខ្ញុំមិនមានគោលដៅផ្សេងឡើយ»៕
ប្រភពពី៖ Channel News Asia
