មនុស្សជាច្រើនប្រហែលជាធ្លាប់បានឮញឹកញាប់មកខ្លះៗហើយថា ចង់បានកូនមានមុខមាត់ស្អាត គួរឱ្យស្រឡាញ់ ស្អាតសង្ហា ត្រូវរស់នៅក្នុងបរិស្ថានដែលពេញទៅដោយមនុស្សម្នាដែលមានមុខមាត់ស្អាត មើលតែរូបភាពតារាភាពយន្តស្អាតៗ មនុស្សរូបស្អាត មនុស្សសង្ហា ឬអង្គុយសម្លឹងមើលតែរូបភាពកូនក្មេងស្អាតៗជាដើម។ តើជំនឿមួយនេះពិតជាបានផលល្អមែនឬ? យើងនាំគ្នាមកវិភាគមើលទាំងអស់គ្នាដូចតទៅ។
រូបភាពផូស្ទើរដែលស្ត្រីមានផ្ទៃពោះចូលចិត្តទិញទៅបិទនៅឯផ្ទះ ច្រើនតែជារូបកូនក្មេងតូចស្អាតៗគួរឱ្យស្រឡាញ់ ព្រោះពួកគេធ្លាប់បានឮជំនឿមួយដែលថា ឱ្យសម្លឹងមើលមុខកូនក្មេងស្អាតៗ ហើយកូនរបស់ខ្លួនឯងពេលកើតចេញមកក៏នឹងមានមុខមាត់ស្អាតគួរឱ្យស្រឡាញ់ដូចក្មេងនៅក្នុងរូបភាពនោះអុីចឹងដែរ។ បច្ចុប្បន្ននេះ ខាងវេជ្ជសាស្ត្របានផ្ដល់នូវការអះអាងហើយថា អារម្មណ៍របស់ម្ដាយខណៈពេលតាំងគភ៌មានផលប៉ះពាល់យ៉ាងខ្លាំងដល់ទារកក្នុងគភ៌។ បើអ្នកម្ដាយមានអារម្មណ៍ល្អ មានស្ថានភាពផ្លូវចិត្តល្អខណៈកំពុងតាំងគភ៌ រាងកាយនឹងបញ្ចេញសារធាតុអេនដូហ្វ៊ីន (Endophin) ដែលនឹងធ្វើឱ្យស្ត្រីមានគភ៌មានអារម្មណ៍សប្បាយ មានសេចក្ដីសុខ អារម្មណ៍ស្រស់ស្រាយ និងប្រាកដណាស់ថា សារធាតុនេះមានផលជាបន្តបន្ទាប់ទៅដល់ទារកក្នុងគភ៌ផងដែរ។ ធ្វើឱ្យនៅពេលម្ដាយមានសេចក្ដីសុខ ទារកក្នុងគភ៌ក៏នឹងមានសេចក្ដីសុខទៅជាមួយដែរ។
ការសម្លឹងមើលរូបភាពកូនក្មេងដែលមានមុខមាត់ស្អាតគួរឱ្យស្រឡាញ់ នឹងធ្វើឱ្យស្ត្រីមានគភ៌មានអារម្មណ៍ទន់ភ្លន់ ព្រោះស្ត្រីមានគភ៌នឹងនឹកស្រមៃថា កូនរបស់ខ្លួនឯងក៏ស្អាតគួរឱ្យស្រឡាញ់ដូចគ្នានេះដែរ ធ្វើឱ្យក្ដីកង្វល់ផ្សេងៗក្នុងមួយថ្ងៃៗថយចុះ។ រឹតតែសម្លឹងមើលរូបក្មេងស្អាតៗទាំងនោះញឹកញាប់ ស្ត្រីមានគភ៌ក៏នឹងភ្លេចអស់ភាពតានតឹងធុញថប់ រឹតតែមើលរឹតតែមានសេចក្ដីសុខ នៅពេលរឹតតែមានសេចក្ដីសុខ រាងកាយក៏នឹងរឹតតែបញ្ចេញសារធាតុអេនដូហ្វ៊ីន ធ្វើឱ្យទារកមានសេចក្ដីសុខ និងអារម្មណ៍ល្អទៅដែរ។ ផ្ទុយទៅវិញ ស្ត្រីជាម្ដាយមានអារម្មណ៍តានតឹងធុញថប់ខ្លាំង ឬមានអារម្មណ៍មួម៉ៅជាប់រហូត ទារកក៏នឹងបានទទួលផលប៉ះពាល់ដូចគ្នា ធ្វើឱ្យនៅពេលប្រសូតចេញមកហើយនឹងក្លាយជាក្មេងប៉ិនយំ យំច្រើន ពិបាកចិញ្ចឹម ឬសូម្បីតែប្រសូតមុនពេលកំណត់ក៏អាចកើតឡើងបានដែរ ដោយសារតែក្ដីធុញថប់តានតឹងធ្វើឱ្យប្រព័ន្ធខាងក្នុងរាងកាយរបស់ស្ត្រីជាម្ដាយប្រែប្រួលទៅក្នុងផ្លូវដែលអាក្រក់ហ្នឹងឯង។
ការសម្លឹងមើលរូបទេសភាព រូបតារាភាពយន្តស្អាតៗ រូបភាពសត្វផ្សេងៗ ក៏រាប់ថាជាការបន្ធូរអារម្មណ៍ទៅក្នុងផ្លូវដែលល្អដូចគ្នាដែរ ជួយបន្ថយភាពធុញថប់តានតឹងរបស់ស្ត្រីមានគភ៌បានមួយកម្រិតដែរ តែការសម្លឹងមើលរូបកូនក្មេងស្អាតៗគួរឱ្យស្រឡាញ់នឹងហុចផលដោយត្រង់ខ្លាំងជាង ដោយសារតែស្ត្រីមានគភ៌អាចនឹងនឹកស្រមៃរវាងខ្លួនឯង និងកូនបានងាយជាងការសម្លឹងមើលរូបទេសភាព ឬរូបតារា៕
