កញ្ញា អៀរ ម៉ីលិ ជាតារាសម្ដែងមួយដួង ដែលទទួលបានការគាំទ្រខ្លាំងគួរសមពីសំណាក់ទស្សនិកជន ខណៈដែលតារាស្រីដួងនេះ ត្រូវបានគេសង្កេតឃើញថា ជារឿយនាងតែងតែត្រូវប៉ាន់ខ្លាំងជាមួយនឹងការថតខ្សែភាពយន្ត។ បើទោះបីជាស្រីស្រស់រូបនេះទើបតែប្រឡូកចូលក្នុងសិល្បៈក្ដី តែប្រជាប្រិយភាព និងសម្រស់វិញហាក់មានភាពលេចធ្លោខ្លាំងគួរឱ្យកត់សម្គាល់។
បន្ទាប់ពីតារាសម្ដែងស្រីសិចស៊ីសាច់សខ្ចី អៀរ ម៉ីលិ ហៅអូនម៉ី បានបង្ហាញពីមុខមាត់គូស្នេហ៍របស់នាងជានិស្សិតមកពីបរទេសដែលមិនត្រឹមតែមានចំណេះដឹងខ្ពស់ និងមានរូបរាងសង្ហានោះទេ តែអ្វីដែលគួរឱ្យចាប់អារម្មណ៍នោះគឺ ពួកគេទាំងពីរនាក់ជាតារាសិល្បៈវ័យក្មេង និងចូលចិត្តសម្ញែងភាពផ្អែមល្ហែម ដែលធ្វើមហាជនច្រណែនចំពោះភាពស្អិតល្មួតរបស់ពួកគេទាំងពីរលើសពីស្ករតាំងម៉ែទៅទៀត(អូហូ!…)។ ថ្មីៗនេះ នាងបានបង្ហើ់បប្រាប់អ្នកសារព័ត៌មានអំពីទំនាក់ទំនងស្នេហារបស់នាង នៅពេលដែលសង្សារត្រូវឃ្លាតឆ្ងាយទៅបន្ដការសិក្សានៅឯបរទេសវិញ។
តារាស្រីនិយមតែងខ្លួនសិចស៊ីបានបង្ហើបប្រាប់ថា អាចចាត់ទុកថាគូស្នេហ៍របស់ខ្លួន ថ្វីដ្បិតតែមានវ័យក្មេងទើប 21ឆ្នាំមែន តែអត្តចរិតល្អ និងមិនដែលរករឿងឈ្លោះប្រចណ្ឌឡើយ ពេលឃើញនាងសម្ដែងក្នុងឈុតស្និទ្ធស្នាលជាមួយតួប្រុសក្ដី។ ជាសំណាងល្អមួយសម្រាប់រូបនាងផ្ទាល់ ព្រោះសង្សារបណ្ដូលចិត្តម្នាក់នេះទុកសិទ្ធិសេរីភាព ឱ្យតម្លៃ និងផ្ដល់កិត្តិយស ព្រមទាំងស្រឡាញ់ក្រុមគ្រួសាររបស់នាងណាស់។ ចំពោះការសម្ដែងវិញ រឹតតែមិនដែលរញ៉េរញ៉ៃទៅទៀត ព្រោះគេដឹងថា នោះគ្រាន់តែជាការងារសម្ដែងប៉ុណ្ណោះ។ អៀ ម៉ីលិ បានទម្លាយថា តាមពិតគូស្នេហ៍ខ្លួនគ្មានរថយន្ត និងគ្មានទ្រព្យស្តុកស្ដម្ភទេ ហើយមានបុរសជាកូនអ្នកមានជាច្រើនតាមស្រឡាញ់នាង តែនាងមិនខ្វល់ទេ សុខចិត្តប្រគល់ក្ដីស្រឡាញ់ឱ្យទៅសង្សារម្នាក់នេះ ព្រោះអត្តចរិតគេល្អ។ រីឯចាស់ទុំទាំងសងខាងវិញ ក៏ពេញចិត្ត និងដឹងឮពីទំនាក់ទំនងរបស់ពួកគេទាំងពីរដែរ។
បើទោះជាមានការចុះសម្រុងគ្នាបានល្អ និងយល់ចិត្តថ្លើមគ្នាបែបនេះក្ដី តែកញ្ញា អៀ ម៉ីលិ បានបញ្ជាក់ថា មិនទាន់មានគម្រោងភ្ជាប់ពាក្យភ្លាមៗនោះទេ ដោយរង់ចាំមើលចិត្តគ្នាបន្តទៀតសិន។ ស្រីស្រស់រូបនេះ បានបន្តប្រាប់ទៀតថា បើសិនជាខ្លួនចូលរោងការមែននោះ ប្រហែលជាសិល្បៈត្រូវទុកចោលមួយឡែកសិន ដើម្បីមានពេលរៀបចំជីវិតគ្រួសារឱ្យបានល្អ៕
