កីឡាករវាយកូនបាល់ Kei Nishikori និងកីឡាការិនី Naomi Osaka បានបង្កើតប្រវត្តិសាស្ត្រក្នុងព្រឹត្តិការណ៍ US Open កាលពីថ្ងៃពុធ នៅពេលដែលពួកគេបានក្លាយជាបុរស និងស្ត្រីជប៉ុនដំបូងគេ ក្នុងការឈានទៅដល់វគ្គពាក់កណ្តាលផ្តាច់ព្រ័ត្រនៃកម្មវិធីប្រកួត Grand Slam តែមួយ។
Nishikori បានឈានទៅវគ្គ 4នាក់ចុងក្រោយនៃវិញ្ញាសាផ្នែកបុរស ក្រោយពីបានយកឈ្នះក្នុងលទ្ធផល 2-6, 6-4, 7-6 (7/5) 4-6 និង6-4 លើកីឡាករ Marin Cilic ដែលធ្លាប់បានផ្តួលរូបគេក្នុងវគ្គផ្តាច់ព្រ័ត្រកាលពីឆ្នាំ2014។ នៅមុននេះបន្តិច កីឡាការិនី Osaka បានផ្តួលកីឡាការិនីអ៊ុយក្រែន ក្នុងលទ្ធផល 6-1 និង6-1ក្នុងវគ្គ1/4ផ្តាច់ព្រ័ត្រនៃវិញ្ញាសាឯកត្តជននារី។ Nishikori នឹងត្រូវឈានទៅប្រកួតក្នុងវគ្គពាក់កណ្តាលផ្តាច់ព្រ័ត្រនៃព្រឹត្តិការណ៍ US Open ជាលើកទី3 របស់ខ្លួន ក្រោយពីឈានទៅវគ្គ1/2 កាលពីឆ្នាំ2014 និងឆ្នាំ2016។ កីឡាករវ័យ 29ឆ្នាំរូបនេះ ក៏បានឈានទៅវគ្គ 8នាក់ចុងក្រោយនៃកម្មវិធី Grand Slam 3លើកចុងក្រោយ ដែលក្នុងនោះរាប់បញ្ចូលទាំងពាន Wimbledon នៅឆ្នាំនេះ ផងដែរ ដើម្បីក្លាយជាបុរសជប៉ុនដំបូងគេក្នុងការសម្រេចបាននូវសមិទ្ធផលបែបនេះក្នុងរយៈពេល 23ឆ្នាំ។
កីឡាការិនី Osaka វ័យ 20ឆ្នាំ គឺជាស្ត្រីជប៉ុនដំបូងគេក្នុងការឈានទៅវគ្គ 4នាក់ចុងក្រោយនៃកម្មវិធី Grand Slam ចាប់តាំងពីកីឡាការិនី Kimiko Date ធ្វើបានក្នុងព្រឹត្តិការណ៍ Wimbledon កាលពីឆ្នាំ1996 ក្នុងរយៈពេល 1ឆ្នាំ នៅមុនពេលនាងបានចាប់កំណើត។ Osaka ធ្លាប់បានឈានទៅប្រកួត Australian Open វគ្គ 16នាក់ចុងក្រោយ កាលពីខែមករា ដែលជាកំណត់ត្រាដ៏ល្អបំផុតកាលពីមុនរបស់នាងក្នុងព្រឹត្តិការណ៍ធំៗ៕
ប្រភពពី៖ Channel News Asia
