ព្រះពុទ្ធបដិមាមួយអង្គនេះ ជាព្រះពុទ្ធរូបថ្មខ្សាច់ដែលនៅសល់តែព្រះកេសប៉ុណ្ណោះ ចំពោះតួខ្លួនរបស់បដិមាបានបាត់ទៅហើយ។ ព្រះពុទ្ធបដិមានេះមានរចនាប័ទ្មសម័យក្រុងអយុថ្យា បានកប់តួព្រះកេសជាប់នៅក្នុងឫសឈើតាំងពីសម័យបុរាណកាលមកម្ល៉េះ ដែលជាឫសដើមពោធិ៍ធំក្បែប្រាង្គអារាមបុរាណ។
បើតាមការតំណាលបានឱ្យដឹងថា ព្រះកេសព្រះពុទ្ធបដិមានេះ បានដាច់ចេញពីតួខ្លួននាសម័យសង្គ្រាម ខណៈសង្រ្គាមបានវាយបំបែកទីក្រុងអយុថ្យា ហើយព្រះកេសព្រះពុទ្ធបដិមាបានផ្លោងខ្ទាតមកទាក់ជាប់នឹងមែកឈើ រួចក្រោយមកក៏ធ្លាក់មកដី និងត្រូវឫសដើមឈើរុំជាប់តែម្ដង មើលឃើញតែព្រះភ័ក្ដ្រប៉ុណ្ណោះ។ តែបច្ចុប្បន្ន ដើមពោធិ៍ដ៏ធំមួយនេះ បានប្រែក្លាយជាកន្លែងទេសចរណ៍បុរាណដ៏មានសក្ដានុពលទាក់ទាញភ្ញៀវអន្ដរជាតិមកទស្សនាយ៉ាងច្រើនកុះករ មានទីតាំងស្ថិតនៅក្នុងខេត្តអយុថ្យា ក្នុងបរិវេណវត្ត «ម៉ាហាថាត»។
ភ្ញៀវទេសចរជាតិ និងអន្ដរជាតិអាចចូលទស្សនាបានជារៀងរាល់ថ្ងៃចាប់ពីម៉ោង 08.30–16.30 ល្ងាច ដោយជនជាតិថៃត្រូវទិញសំបុត្រចូលទស្សនាក្នុងតម្លៃ 10បាត និងសម្រាប់ជនបរទេសតម្លៃ 50បាត។ ហើយចាប់ពីម៉ោង 19.30. – 21.00យប់ នឹងមានការសម្ដែងរបាំបុរាណ និងសិល្បៈចម្រុះជូនភ្ញៀវទេសចរទស្សនាកម្សាន្ដទៀតផង។
កុំឱ្យខកខាន សូមទស្សនារូបភាពខាងក្រោមនេះ ៖
