ក្រុមអត្តពលិកសម្តែងលើផ្ទៃទឹករបស់ចិន បានបញ្ចប់ក្នុងចំណាត់ថ្នាក់លេខ1 និងលេខ2 ក្នុងវិញ្ញាសាលោតសម្តែងកម្ពស់10ម៉ែត្រ ផ្នែកនារី កាលពីថ្ងៃព្រហស្បតិ៍ ខណៈដែលកីឡាការិនី Si Yajie បានឈ្នះមេដាយមាសដើម្បីការពារពានរង្វាន់ក្នុងព្រឹត្តិការណ៍ Asian Games របស់នាងយ៉ាងជោគជ័យ។
Si វ័យ19ឆ្នាំ ដែលជាម្ចាស់មេដាយប្រាក់អូឡាំពិក ហាក់មិនបានបង្ហាញពីការស្ថិតជាគូប្រជែងដ៏ខ្លាំងរបស់កីឡាការិនី Zhang Jiaqi វ័យ14ឆ្នាំឡើយ ប៉ុន្តែក្រោយមក នាងដណ្តើមបានជ័យជម្នះដ៏មិននឹកស្មានដល់មួយលើគូប្រជែងវ័យក្មេងរបស់នាង។
ក្រោយពីទទួលជ័យជម្នះជាមួយនឹងពិន្ទុសរុប 405,45កីឡាការិនី Si បានឲ្យដឹងថា៖ «ខ្ញុំមានអារម្មណ៍ពិតជារំជួលចិត្តណាស់ ខ្ញុំមិនបានរំពឹងទុកថា ខ្ញុំទទួលបានជ័យជម្នះឡើយ»។ Zhang ដែលមានរហស្សនាមថា Little Fu Mingzia នោះ បានបង្ហាញពីការសម្តែងយ៉ាងល្អ នៅពីមុខអ្នកគាំទ្រចិនដ៏ច្រើនកុះករ។
ប៉ុន្តែ ទីបំផុត បទពិសោធរបស់ Si បានជួយឱ្យនាងទទួលបានជ័យជម្នះ ហើយនាងបានឈ្នះជាមួយនឹងការមានពិន្ទុនាំមុខជាមធ្យម 8,5រាល់ការប្រកួតទាំង5ជុំ។ Zhang ដែលត្រូវបានឡោមព័ទ្ធដោយអ្នកយកព័ត៌មានជាច្រើននោះ បានឲ្យដឹងថា៖ «ខ្ញុំមានអារម្មណ៍ស្ថិតក្រោមសម្ពាធបន្តិច»។
គិតត្រឹមព្រឹកនេះ ចិន នៅតែបន្តនាំមុខដាច់នៅលើតារាង ក្រោយពីបានឈ្នះមេដាយមាស ក្នុងព្រឹត្តិការណ៍ Asian Games មកទល់ពេលនេះ ចំនួន112 ដោយដេញតាមពីក្រោយដោយជប៉ុន ដែលឈ្នះមេដាយមាស59 ខណៈដែលកូរ៉េខាងត្បូង និងម្ចាស់ផ្ទះឥណ្ឌូនេស៊ី ស្ថិតក្នុងចំណាត់ថ្នាក់លេខ3 និងលេខ4 ជាមួយនឹងមេដាយមាស39 និង30រៀងៗខ្លួន៕
ប្រភពពី៖ Channel News Asia