កីឡាការិនីហែលទឹក Rikako Ikee របស់ជប៉ុនបានឈ្នះមេដាយមាសទី5 របស់ខ្លួនក្នុងព្រឹត្តិការណ៍ Asian Games កាលពីថ្ងៃព្រហស្បតិ៍ ខណៈដែលតារាឆ្នើម Son Heung-min របស់ក្របខ័ណ្ឌ Premier League បានបោះ1ជំហានទៀតឆ្ពោះទៅកាន់ការប្រជែងដណ្តើមមេដាយមាស ដែលនឹងធ្វើឱ្យរូបគេរួចផុតពីការបំពេញការតព្វកិច្ចយោធា។
Ikee បានជួយឱ្យជប៉ុនទទួលបានជ័យជម្នះក្នុងការប្រកួតហែលទឹកបណ្តាក់ផ្នែកនារីចម្ងាយ 4x100m ដើម្បីតាមស្មើកំណត់ត្រានៃការឈ្នះមេដាយមាស5 របស់កីឡាការិនីជប៉ុន Yoshimi Nishigawa ក្នុងព្រឹត្តិការណ៍ Asian Games តែមួយ ស្របពេលដែលកីឡាករ Joseph Schooling របស់សិង្ហបុរី ក៏បានទទួលជ័យជម្នះក្នុងការប្រកួតហែលទឹកបែបមេអំបៅចម្ងាយ 50ម៉ែត្រដែរ។
ម្ចាស់មេដាយមាសអូឡាំពិក ដែលបានឈ្នះត្រឹមមួយចុងម្រាមដៃលើកីឡាករចិន Wang Peng នោះបានឱ្យដឹងថា៖ «ខ្ញុំមិនបានដឹងពីអ្នកដែលបានទទួលជ័យជម្នះឡើយ រហូតដល់ទីចុងក្រោយ ខ្ញុំបានក្រឡេកមើលទៅលើតារាង ហើយពេលនោះខ្ញុំស្ទើរតែមិនជឿសោះ»។
Son បានធ្វើជាប្រធាននៃក្រុមម្ចាស់ការតំណែងជើងឯកកូរ៉េខាងត្បូងនៅពេលក្រុមគេដណ្តើមបានជ័យជម្នះក្នុងលទ្ធផល 2–០ ក្នុងការប្រកួតនៅ Cikarang ក្បែរដ្ឋធានីហ្សាការតា ដើម្បីធ្វើដំណើរទៅកាន់ការប្រកួតដ៏ស្វិតស្វាញមួយទៀតជាមួយនឹងក្រុមជម្រើសជាតិអ៊ូសបេគីស្ថាន។
ការមិនអាចដណ្តើមបានមេដាយមាសក្នុងព្រឹត្តិការណ៍កីឡាអាស៊ីមួយនេះ នឹងមិនគ្រប់គ្រាន់ក្នុងការធ្វើឱ្យខ្សែប្រយុទ្ធ Son វ័យ 26ឆ្នាំរបស់ក្លិប Tottenham Hotspur រួចផុតពីការបំពេញការតព្វកិច្ចយោធារយៈពេល21ខែឡើយ ហើយអាចនឹងធ្វើឱ្យប៉ះពាល់ដល់អាជីពរបស់គេ។
ខ្សែប្រយុទ្ធរូបនេះបានឱ្យដឹងថា៖ «ខ្ញុំគិតថា យើងគឺជាក្រុមខ្លាំង ប៉ុន្តែ អ៊ីរ៉ង់ក៏ជាក្រុមខ្លាំងមួយផងដែរ។ វាពិតជាសំខាន់ណាស់ក្នុងការមានភាពខ្លាំងផ្នែកស្មារតី។ សម្ពាធពិតជាមានក្នុងក្រុម ប៉ុន្តែខ្ញុំគិតថា យើងមានការជឿជាក់ខ្លាំងជាងអ៊ីរ៉ង់»៕
ប្រភពពី៖ Channel News Asia
