ក្រុមហ៊ុនក្នុងស្រុក WordBridge Group នឹងសហការជាមួយភ្នាក់ងារចំនួន2 របស់អង្គការសហប្រជាជាតិ គឺកម្មវិធីអភិវឌ្ឍន៍អង្គការសហប្រជាជាតិ (UNDP) និងអង្គការអភិវឌ្ឍន៍ឧស្សាហកម្មអង្គការសហប្រជាជាតិ (UNIDO) ដើម្បីបង្កើតគោលដៅជំរុញឧស្សាហូបនីយកម្ម និងដឹកជញ្ជូនសាធារណៈជំរុញការច្នៃប្រឌិតលើកកម្ពស់ថាមពលកកើតឡើងវិញ និងបង្កើនលទ្ធភាពទទួលបានលំនៅឋានក្នុងគោលបំណងជួយពង្រឹងមូលដ្ឋានគ្រឹះនៃការអភិវឌ្ឍនៅកម្ពុជាឱ្យកាន់តែប្រសើរ។
ការធ្វើឱ្យសម្រចបានដោយមានការចុះអនុស្សរណៈនៃការយោគយល់គ្នា MoUលើគម្រោងអភិវឌ្ឍន៍ចំនួន3 រួមមានគម្រោងអភិវឌ្ឍន៍លំនៅឋានតម្លៃសមរម្យ ការគ្រប់គ្រងការដឹកជញ្ជូនបៃតង និងការអភិវឌ្ឍបណ្តុំសហគ្រាសធុនតូច និងមធ្យម។
តាមរយៈ MoU នេះ UNDP នឹងជួយលើការងារមួយចំនួន ដូចជាបច្ចេកទេសទាក់ទងនឹងថាមពលពីពន្លឺព្រះអាទិត្យ ការរៀបចំគ្រប់គ្រងកាកសំណល់ សេវារថយន្តសាធារណៈ ការហ្វឹកហ្វឺនអ្នកបើកបរ ការផ្សព្វផ្សាយពីសុវត្ថិភាពតាមដងផ្លូវ និងការពន្យល់ពីរបៀបទទួលបានព័ត៌មានពីទីផ្សារសម្រាប់លក់ផលិតផលជាដើម។ ក្នុងចំណោមគម្រោងទាំង3 នេះ UNIDO នឹងជួយតែលើផ្នែកការអភិវឌ្ឍបណ្តុំសហគ្រាសធុនតូច និងមធ្យមប៉ុណ្ណោះ។ នេះបើតាមលោក យក់ សុធីរិទ្ធ ប្រធានគ្រប់គ្រងទូទៅផ្នែកលំនៅឋានតម្លៃសមរម្យរបស់ក្រុមហ៊ុន WorldBridge។
លោកឧកញ៉ាំ សៀ រិទ្ធី ប្រធានក្រុមហ៊ុន WorldBridge បានថ្លែងថា ការងារជាមួយទីភ្នាក់ងារទាំង2 នឹងផ្តោតជុំវិញគម្រោង WorldBridge ដែលមានស្រាប់ក្នុងលំនៅឋានមានតម្លៃសមរម្យ ប្រព័ន្ធដឹកជញ្ជូនបៃតង ការគ្រប់គ្រងយានយន្ត និងការបង្កើតក្រុមចង្វាក់សហគ្រាសធុនតូច និងមធ្យម។
លោកមានប្រសាសន៍ថា ការអភិវឌ្ឍសេដ្ឋកិច្ច និងកំណើនសេដ្ឋកិច្ចនាពេលអនាគតនៅក្នុងប្រទេសកម្ពុជាត្រូវតែធ្វើតាមរបៀបមួយដែលមាននិរន្តរភាព និងមានផលប៉ះពាល់ដល់សង្គម។ «ដោយចូលរួមជាមួយUNDP និងUNIDO យើងមានអារម្មណ៍ថា យើងនឹងមិនត្រឹមតែអាចសម្រេចបាននូវគោលបំណងដំបូងរបស់យើងប៉ុណ្ណោះទេ ប៉ុន្តែយើងនឹងអាចឈានទៅដល់លើស និងនាំមកនូវលទ្ធផលប្រកបដោយចីរភាពនៅក្នុងគម្រោងរបស់យើង»។
លោក Nick Beresford នាយក UNDP ប្រចាំកម្ពុជាឱ្យបានដឹងថា កិច្ចព្រមព្រៀងនេះ គឺជាការឆ្លុះបញ្ចាំងពីភាពជាដៃគូរវាងវិស័យសាធារណៈ និងវិស័យឯកជនដើម្បីជំរុញការវិនិយោគប្រកបដោយចីរភាពដែលមានឥទ្ធិពលដល់សង្គម សេដ្ឋកិច្ច និងស្របទៅតាមគោលបំណងរបស់ UNDP ក្នុងការលើកកម្ពស់ការអនុវត្តអាជីវកម្មដែលមាននិរន្តរភាព និងការវិនិយោគនៅក្នុងតំបន់។
លោកបានមានប្រសាសន៍ថា ៖ «ដោយមានផលប៉ះពាល់មួយចំនួនលើភាពជាដៃគូនេះការចុះហត្ថលេខានេះ គឺជាជំហានដ៏សំខាន់មួយក្នុងការសម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពនៅត្រឹមឆ្នាំ2030»។
លោក សុខ ណារិន តំណាងប្រចាំប្រទេសនៃអង្គការ UNIDO បានមានប្រសាសន៍ថា អនុស្សរណៈនៃការយោគយល់បានផ្តល់នូវក្របខ័ណ្ឌមួយដែលអនុញ្ញាតឱ្យទីភ្នាក់ងារនេះធ្វើការកាន់តែជិតស្និទ្ធជាមួយវិស័យឯកជនដើម្បីលើកកម្ពស់និរន្តភាពនៅក្នុងឧស្សាហកម្មក្នុងស្រុក។
លោកថ្លែងថា ដោយហេតុថា វិស័យ SME នៅកម្ពុជាតែងជួបប្រទះនឹងបញ្ហាមួយចំនួន ដូចជាកង្វះព័ត៌មានទីផ្សារ ការប្រើប្រាស់ប្រព័ន្ធបច្ចេកវិទ្យា ធនធានមនុស្ស និងបញ្ហាតម្លៃថាមពលអគ្គិសនីខ្ពស់ជាដើម។ «តាមរយៈកិច្ចសហប្រតិបត្តិការនេះ UNIDO នឹងអាចធ្វើការកាន់តែជិតស្និទ្ធជាមួយវិស័យឯកជនដើម្បីជួយអភិវឌ្ឍវិស័យ SME នៅកម្ពុជាឱ្យកាន់តែរីកចម្រើនប្រកបដោយចីរភាព»។
ការសហការគ្នានឹងចាប់ផ្ដើមនៅខែនេះជាមួយនឹងការរៀបចំផែនការសិក្ខាសាលាស្តីពី “ការអភិវឌ្ឍចង្កោមសហគ្រាសខ្នាតតូច និងមធ្យម” ដែលគ្រោងនឹងរៀបចំធ្វើឡើងនៅពាក់កណ្តាលខែកញ្ញានៅរាជធានីភ្នំពេញ៕
