មុនចាប់ផ្តើមរកស៊ីចំណុចសំខាន់បំផុតដែលត្រូវមាន គឺគំនិតអាជីវកម្ម ហើយវាគឺជាចំណុចសំខាន់បំផុតព្រោះដំណាក់កាលចាប់ផ្តើមនេះទាមទារឱ្យមានការយកចិត្តទុកដាក់ និងហេតុផលច្បាស់លាស់ដើម្បីរកស៊ី ដោយដាក់ចិត្ត ដាក់កាយ បញ្ចេញអស់នូវកម្លាំងថាមពល និងជាពិសេសថវិកាដើម្បីធ្វើវាឱ្យជោគជ័យ។
លោក សេង ពិសិដ្ឋ អគ្គនាយកក្រុមហ៊ុន Anussa Event plainer បានលើកឡើងថា ជំនួញមិនខុសពីជំនាញនោះទេ គឺចាំបាច់ត្រូវការការត្រៀមខ្លួនឱ្យបានល្អ រៀនសូត្រឱ្យបានច្បាស់លាស់ និងរៀបចំឱ្យហ្មត់ចត់ បើមិនដូច្នោះទេយើងនឹងខកចិត្ត។ មានអ្នកខ្លះឃើញគេជោគជ័យ ហើយចេះតែនឹកគិតថាគំនិតរបស់ខ្លួនអាចដើរបាន ឬអាចកើតជាលុយបាន ក៏ខ្ចីលុយឪពុកម្តាយ លក់ផ្ទះ លក់ឡាន ដើម្បីធ្វើជំនួញ បន្ទាប់មកកន្លះឆ្នាំក្រោយ មានបញ្ហាបែកបាក់គ្រួសារ ព្រោះអ្វីដែលគាត់គិត មិនដូចអ្វីដែលចេញមកជាលទ្ធផលជាក់ស្តែងនោះទេ។ ហេតុនេះមុននឹងធ្វើជំនួញត្រូវគិតឱ្យបានច្បាស់លាស់ជាមុនសិនថា តើយើងរួចរាល់ហើយឬនៅសម្រាប់ការធ្វើជំនួញ? បើមិនទាន់រួចរាល់ទេសូមសន្សំសិនទៅ។ សន្សំកន្លែងនេះគឺត្រូវសន្សំធនធាន សន្សំកម្លាំង សន្សំបទពិសោធ និងសន្សំទំនាក់ទំនង ដើម្បីចេញប្រឡូកក្នុងការរកស៊ីដែលពោរពេញដោយគ្រោះថ្នាក់ និងការប្រកួតប្រជែង។
លោក សេង ពិសិដ្ឋ បាននិយាយថា៖ “ជំនួញមិនមែនសម្រាប់គ្រប់គ្នាទេ តែជំនួញគឺសម្រាប់មនុស្សពូកែ តែសហគ្រិនភាពអាចប្រើប្រាស់សម្រាប់គ្រប់គ្នាបាន”។
អគ្គនាយកក្រុមហ៊ុនខាងលើបានលើកឡើងផងដែរថា នៅស្រុកណាក៏ដូចស្រុកណាដែរ អ្នកដែលអាចទទួលជោគជ័យបានទាល់តែជាអ្នកខ្លាំង និងពូកែ ដែលមានសមត្ថភាពក្នុងការធ្វើការងារលំបាកៗតស៊ូ ហើយស្វិតស្វាញខ្លាំងជាមួយនឹងអ្វីដែលខ្លួនធ្វើ។ ហេតុនេះជាអ្នកជំនួញចាំបាច់ត្រូវតែហ្មត់ចត់ហើយខ្លាំងអាចប្រឈមមុខជាមួយនឹងរឿងលំបាកៗជាច្រើននៅក្នុងពិភពអាជីវកម្មជាក់ស្តែងមិនមែនគ្រាន់តែគិតនោះទេ តែជាអ្នកធ្វើសកម្មភាពជាក់ស្តែង និងដោះស្រាយបញ្ហាជាក់ស្តែង។ ជាអ្នករកស៊ីកុំគិតថាគេស្រួល ហើយកុំគិតថាធ្វើវាទាន់មានឱកាសព្រោះគ្មានទេឱកាសស្រាប់ៗសម្រាប់អ្នករកស៊ី តែបើគេជាអ្នករកស៊ីពិតប្រាកដគេនឹងក្លាយជាអ្នកបង្កើតឱកាស។ ពេលខ្លះយើងគិតថា គំនិតរបស់យើងអាចរកស៊ីបាន ហើយអាចធ្វើឱ្យយើងក្លាយជាអ្នកមាន តែពេលអនុវត្តជាក់ស្តែងទើបយើងដឹងថា ការរកស៊ីទូលំទូលាយខ្លាំងណាស់ ព្រោះមានហេតុផល 100ផ្សេងគ្នាដែលធ្វើឱ្យយើងបរាជ័យ តែមានហេតុផលត្រឹមតែ2 ឬ3ប៉ុណ្ណោះដែលធ្វើឱ្យយើងជោគជ័យ ហេតុនេះកុំជ្រួលជ្រើមដោយគ្មានមូលដ្ឋាន។
ចំណុចល្អសម្រាប់អ្នកទូទៅដែលមិនទាន់ចេញរកស៊ី គឺអាចកសាងសហគ្រិនភាពដើម្បីធ្វើខ្លួនឱ្យក្លាយជាបុគ្គលសំខាន់ក្នុងស្ថាប័ន និងកសាងកេរ្តិ៍ឈ្មោះឱ្យល្អ (personal branding) ពីឥឡូវឱ្យហើយ ព្រោះប្រសិនបើយើងមានគំនិតសហគ្រិនភាពយើងនឹងព្យាយាមធ្វើរឿងល្អៗជាច្រើនដើម្បីជួយស្ថាប័នរហូតយើងក្លាយជាមនុស្សដែលសមជាងគេក្នុងការដំឡើងប្រាក់ខែ ឬតួនាទី ហើយយើងក៏ជាមនុស្សដែលមិនបំផើមក្រុមហ៊ុនគេចោលនោះទេ។ មនុស្សដែលចេះសាងឈ្មោះល្អ ជាអ្នកដែលមានទំនាក់ទំនងល្អ មិនមែនសប្បាយដូចយុវជនយើងមួយចំនួនដែលកំពុងសប្បាយចេញពីមួយកន្លែងទៅមួយកន្លែងដោយហេតុផលគ្រាន់តែប្រាក់ខែខុសគ្នាបន្តិចបន្តួច ឬមិនពេញចិត្តនឹងកន្លែង ដែលធ្លាប់ធ្វើការនោះទេ តែគេភាគច្រើនជាអ្នកដែលបានបង្កើតសមិទ្ធផលល្អ និងរៀនសូត្រយ៉ាងល្អិតល្អន់ ស្របពេលដែលគេកសាងទំនាក់ទំនងល្អសម្រាប់ការធ្វើអាជីវកម្មជាក់ស្តែង។ ពេលនោះយើងនឹងលែងគិតថា ការរកស៊ីមិនមែនត្រង់ភ្លឹងដែលគ្រាន់តែគិតហើយធ្វើ ក៏ជោគជ័យនោះទេ តែវាពោរពេញដោយភាពបត់បែនខ្ពស់បំផុត។
លោក ហ៊ុន ចាន់សាន ស្ថាបនិក និងជានាយកស្ថាបត្យកររបស់ក្រុមហ៊ុន Re-Edge Architecture & Design ការធ្វើអាជីវកម្ម គឺចាំបាច់ត្រូវតែធ្វើ មានហេតុផលច្បាស់លាស់ ហើយប្រភេទអាជីវកម្មនោះត្រូវតែជាអ្វីដែលមានន័យសម្រាប់ជីវិតយើង និងស្របទៅតាមជំនាញដែលយើងមាន។ លោកបានបញ្ជាក់ផងដែរថា ដោយសារតែឪពុកម្តាយលោកជាអ្នកមានធនធាន លោកក៏បានទៅសិក្សានៅបរទេសដោយចំណាយធនធានផ្ទាល់ខ្លួន ហើយក្រោយបញ្ចប់ការសិក្សា តាមពិតទៅលោកអាចធ្វើការងារនៅបរទេសបាន តែដោយសារតែលោកគិតថា អាជីពជាស្ថាបត្យករ គឺមានលក្ខណៈផ្ទាល់ខ្លួន ប្រសិនបើលោកធ្វើបម្រើការងារនៅបរទេស លោកគ្រាន់តែជាអ្នកជំនាញធ្វើការឱ្យគេតែប៉ុណ្ណោះ ហេតុនេះលោកក៏បានមកកម្ពុជាវិញដើម្បីធ្វើជាសាស្ត្រាចារ្យ មុនពេលប្រឡូកក្នុងអាជីវកម្មផ្ទាល់ខ្លួន។
លោក ហ៊ុន ចាន់សាន បាននិយាយថា៖ “ខ្ញុំជឿថាអ្នកទាំងអស់គ្នាប្រហែលបានឃើញភាពជោគជ័យរបស់ខ្ញុំ បានឃើញនូវអ្វីដែលខ្ញុំបានទទួល ហើយប្រហែលជាឆ្ងល់ហើយថា ហេតុអ្វីបានជាខ្ញុំធ្វើបាន?។ តែអ្នកទាំងអស់គ្នាអាចភ្លេចពីឧបសគ្គដែលខ្ញុំបានជួបយ៉ាងច្រើន”។
លោក ចាន់សាន បានលើកឡើងផងដែរថា បើនិយាយពីអាជីវកម្មរបស់លោក គឺបែងចែកចេញជា 2ដំណាក់កាល។ ដំណាក់កាលដំបូង គឺជាដំណាក់-កាលដែលធ្វើអាជីវកម្មជាមួយនឹងម្ចាស់ភាគហ៊ុនដទៃទៀត និងដំណាក់កាលទី2 គឺដំណាក់កាលដែលមានសេរីភាពក្នុងការគ្រប់គ្រងក្រុមហ៊ុនដោយខ្លួនឯង។ ដំបូងឡើយក្រុមហ៊ុនរបស់លោកមានម្ចាស់ហ៊ុនធំៗចំនួន 3នាក់ដោយក្នុងនោះលោកជាស្ថាបត្យករ ម្នាក់ទៀតជាវិស្វករ និងម្នាក់ទៀតជាអ្នកដែលមានជំនាញរកស៊ី។ តែក្រោយមកដោយសារតែមានបញ្ហាមួយចំនួនដែលជាបញ្ហាផ្ទៃក្នុង ដែលមានភាពយឺតយ៉ាវក្នុងការសម្រេចការងារនានាមុននឹងយកផលិតផលឱ្យអតិថិជន និងបញ្ហាផ្សេងទៀតដែលអ្នកជំនាញខាងរកស៊ីមិនសូវឱ្យតម្លៃខាងស្ថាបត្យកម្ម គឺគេគិតតែពីការរកលុយឱ្យបានច្រើនស្របពេលដែលលោកគិតពីការផ្តោតលើមោទនភាពនៃអាជីព ក៏ធ្វើឱ្យមានការប្រេះឆា។ ម្យ៉ាងវិញទៀត ដៃគូអាជីវកម្មគេនៅពេលដែលរកស៊ីយូរៗទៅក៏មានគំនិតចង់ធ្វើអ្វីផ្សេង និងស្របពេលដែលមានការលូកដៃពីឪពុកម្តាយរបស់គាត់ក៏ធ្វើឱ្យមានបញ្ហាកើតឡើង រហូតដល់ទ្រាំរយៈពេល 4ឆ្នាំជាមួយគ្នា មុននឹងសម្រេចចិត្តបែកគ្នា។
ក្នុងកាលៈទេសៈនោះ ដោយសារតែលោកជាអ្នកស្រឡាញ់អាជីវកម្មស្ថាបត្យកម្មនេះខ្លាំង ហើយឈ្មោះដែលដាក់នោះមានន័យខ្លាំងសម្រាប់ជីវិតលោកត្រូវទទួលបន្ទុកទិញហ៊ុនពីដៃគូក្នុងរយៈពេលខ្លី។ ដំណាក់កាលនោះ គឺជាដំណាក់កាលលំបាកមួយ ហើយអ្វីដែលកាន់តែប្រឈមទៅទៀតនោះ គឺលោកត្រូវលូកដៃទៅក្នុងរឿងជាច្រើនទៀតដូចជាត្រូវទៅគ្រប់គ្រងផ្នែកបច្ចេកវិទ្យាព័ត៌មានសម្រាប់ក្រុមហ៊ុន ផ្នែកទីផ្សារ ផ្នែកហិរញ្ញវត្ថុ ផ្នែករដ្ឋបាល និងផ្នែកផ្សេងៗទៀតរបស់ក្រុមហ៊ុនបន្ថែមពីលើផ្នែកស្ថាបត្យកម្មដែលលោកមានជំនាញ។ នៅពេលនោះមានកំហុសជាច្រើនបានកើតឡើងនៅក្នុងដំណើរការក្រុមហ៊ុន តែលោកនៅតែមានគំនិតមួយថា បើគេគិតថាគាត់មិនអាចធ្វើបាន លោកនឹងត្រូវបង្ហាញថា អាជីពជាស្ថាបត្យករក៏អាចគ្រប់គ្រងអាជីវកម្ម ឬដើរតួជាអាជីវករបានដែរ។ ហេតុនេះបន្តិចម្តងៗ លោកបានប្រែក្លាយបញ្ហាប្រឈមទាំងនោះដោយទ្រាំសិក្សាពីផលលំបាកទាំងអស់នោះរហូតដំណើរការក្រុមហ៊ុននោះដោយមានតុល្យភាព៕