កសិករដាំមៀនបានបង្ហាញពីក្តីរីករាយ ខណៈដែលរដូវប្រមូលផលមៀនមកដល់ ដើមមៀនបានផ្តល់ផ្លែច្រើនដែលមានសាច់ក្រាស់ល្អ មានរសជាតិឈ្ងុញឆ្ងាញ់ និងមានការគាំទ្រខ្លាំងពីអ្នកបរិភោគនៅលើទីផ្សារ និងលក់បានថ្លៃខ្ពស់ទ្វេដង បើធៀបនឹងមៀននាំចូលពីប្រទេសជិតខាង។
អ៊ំស្រី សួស សំអាត រស់នៅក្នុងភូមិចំពុះក្អែក សង្កាត់ព្រែកថ្មី ដែលទើបកាត់ចេញពីខេត្តកណ្តាលចូលមកទឹកដីខណ្ឌមានជ័យ រាជធានីភ្នំពេញកាលពីប៉ុន្មានឆ្នាំកន្លងទៅនេះ មានប្រសាសន៍ថា ដើមឡើយអ៊ំស្រីរស់នៅសហរដ្ឋអាមេរិកជាមួយកូនៗឯណោះទេ ប៉ុន្តែដោយសារចង់រស់នៅស្រុកខ្មែរជាង ទើបអ៊ំស្រីបានមកទិញដីរបស់អ្នកភូមិខាងលើដែលមានទទឹង 10ម៉ែត្រ និងបណ្តោយ 160ម៉ែត្រ ដែលមានដើមមៀនផ្លែស្រាប់ និងដំណាំគួបផ្សំផ្សេងៗមួយចំនួនទៀត។
ក្រោយពីទិញដី និងមករស់នៅទីនេះមិនបានមួយឆ្នាំផង ដើមមៀនក៏ចាប់ផ្តើមហុចផល ហើយអាចបេះលក់បានបណ្តើរៗតាំងពីពេលនោះមក ដោយមានការគាំទ្រច្រើនពីអ្នកធ្វើដំណើរឆ្លងកាត់ភូមិ តែងឈប់រថយន្ត-ម៉ូតូទិញជាហូរហែឥតដាច់ និងលក់មិនដែលសល់ទេ ហើយថែមទាំងលក់បានថ្លៃជាងមៀនធម្មតានៅលើទីផ្សារទៀតផង។ ពោលគឺ ពេលដើមរដូវ 1គីឡូថ្លៃ 15,000 ទៅ20,000រៀល និងកណ្តាលរដូវនេះអាចមានតម្លៃចន្លោះពី10,000 ទៅ15,000រៀល។ “មៀនរបស់អ្នកភូមិចំពុះក្អែក ក៏ដូចជាអ្នកភូមិកោះក្របីដែរ គឺជាមៀនធម្មជាតិពិតៗ មិនប្រើថ្នាំគីមីបញ្ជាឱ្យចេញផ្លែនោះទេ វាមានសាច់ក្រាស់ និងមានរសជាតិផ្អែមឈ្ងុយ ហើយមានបងប្អូនខ្មែរយើងមកទិញដល់ផ្ទះ មិនបាច់យកទៅលក់នៅផ្សារនាំលំបាកទេ គឺបេះលក់តែមុខផ្ទះខ្លួនឯងក៏មានអ្នកធ្វើដំណើរមកឈប់ទិញជាហូរហែជាប់មិនដាច់រៀងរាល់ថ្ងៃ” អ៊ំស្រី សំអាត បន្ថែម។
ក្រោយពីឃើញមៀនខ្មែរផ្លែល្អ និងមានការគាំទ្រច្រើនដូច្នេះ អ៊ំស្រីបានទិញដីអ្នកភូមិនៅទល់មុខនោះទៀត ហើយដាំមៀនឱ្យបានកាន់តែច្រើនឡើង ដែលរហូតមកទល់សព្វថ្ងៃ អ៊ំស្រីដាំបានប្រមាណជិត 20ដើមទៀតហើយ ដែលដើមតូចៗអាចប្រមូលផលបានប្រហែល100 ទៅ200គីឡូ និងដើមធំអាចបានចន្លោះពី 200គីឡូ ទៅ400គីឡូក្នុងមួយឆ្នាំៗ ដោយមួយឆ្នាំៗ វានឹងផ្តល់ផល 2ដង។ លើកទី1 ចាប់ផ្តើមផ្លែ ចន្លោះពីខែមករា ដល់ខែមេសា និងលើកទី2 ផ្តល់ផលចន្លោះពីខែមិថុនា ដល់ខែកញ្ញារៀងរាល់ឆ្នាំនីមួយៗ ដូច្នេះគ្រាន់តែប្រមូលផលមៀនក្នុងមួយឆ្នាំៗ ក៏អាចធ្វើឱ្យជីវភាពគ្រួសារបានធូរធារដែរ មិនចាំបាច់ចំណាយលុយទិញថ្នាំគីមីបាញ់នោះទេ គ្រាន់តែជួលគេឱ្យឡើងកាច់មែកចាស់ចេញ មែកថ្មីក៏នឹងលាស់ស្លឹកខ្ចីឡើង ហើយផ្តល់ផ្លែផ្កាច្រើនមិនខាន។
ជាមួយគ្នានេះដែរ អ្នកស្រី សុខ វណ្ណី អាជីវករទិញផ្លែមៀនលក់បន្ត ក៏បានឱ្យដឹងដែរថា មៀនហុចផលតិចនៅរដូវប្រាំង ចន្លោះពីខែមករា ដល់ខែមេសា និងហុចផលច្រើនពេលចេញផ្លែលើកទី2 ចន្លោះពីខែមិថុនា ដល់ខែកញ្ញា។ អ្នកស្រីបន្តថា នៅពេលដែលមៀនមិនសូវឱ្យផល ផ្លែមៀនខ្មែរលក់បានតម្លៃខ្ពស់ជាពិសេសក្នុងរដូវបុណ្យទាន ដូចជាចូលឆ្នាំចិនយើងអាចលក់បានចន្លោះពី 20,000រៀល ទៅ30,000រៀលក្នុងមួយគីឡូក្រាម ឬបើមានតម្រូវការខ្លាំងអាចលក់រាយបានដល់ 40,000រៀលក្នុងមួយគីឡូក្រាមក៏មានដែរ។ ប៉ុន្តែសម្រាប់រដូវដែលកំពុងប្រមូលផលនេះ អាចលក់បានចន្លោះពី 13,000រៀល ទៅដល់16,000រៀល ដែលលក់រាយខ្លះ និងមួយចំនួនទៀតបោះឱ្យម៉ូយយកទៅលក់បន្តនៅក្នុងរាជធានីភ្នំពេញ។
អ្នកស្រីបញ្ជាក់ថា នៅរៀងរាល់ពេលដែលមៀនផ្តល់ទិន្នផល គ្រួសារគាត់តែងដើរប្រមូលទិញផ្លែមៀនពីអ្នកភូមិ ដែលជាមៀនធម្មជាតិគ្មានជាតិគីមី100% យកមកលក់រាយបន្តមួយចំនួន និងមួយចំនួនធំបោះឱ្យម៉ូយមកទិញដល់កន្លែង ដោយមិនចាំបាច់ដឹកទៅលក់នាំខាតពេលនោះទេ ហើយអាចរកប្រាក់ចំណូលបានគួរសមសម្រាប់ដោះស្រាយជីវភាពនៅក្នុងគ្រួសារផងដែរ។
គួរបញ្ជាក់ថា អ្នកភូមិចំពុះក្អែក និងអ្នកភូមិកោះក្របី និយមដាំដើមមៀនតាមរបៀបធម្មជាតិនៅមុខផ្ទះ ឬក្រោយផ្ទះក្នុងដីឡូត៍នីមួយៗ ដើម្បីឱ្យមានម្លប់ត្រជាក់ដល់ការរស់នៅផង និងផ្តល់ផ្លែផ្កាដើម្បីលក់បានប្រាក់ចំណូលច្រើនគួរសមសម្រាប់លើកកម្ពស់ជីវភាពគ្រួសារទៀតផង ដោយក្នុងមួយដើមៗ បើសិនជាម៉ៅដាច់ឱ្យម៉ូយក៏អាចបានប្រាក់ 100ដុល្លារជាងដែរក្នុងមួយរដូវ។
ដើមមៀនត្រូវបានគេដាំឆ្ងាយពីគ្នាពីមួយដើម ទៅមួយដើមៗប្រវែង 5ម៉ែត្រ ដែលការទុកចន្លោះដីឱ្យនៅសល់ធំបែបនេះ គឺដោយសារតែដើមមៀនជារុក្ខជាតិដែលមានមែកបែកសាខានៅពេលវាធំឡើង។
ចាប់តាំងពីពេលដាំ ប្រសិនបើគេឧស្សាហ៍ជ្រុំដីដាក់ជីនៅតាមគល់របស់វា នោះដើមមៀននឹងឆាប់ធំ ហើយត្រឹមតែមួយឆ្នាំកន្លះប៉ុណ្ណោះ វានឹងផ្តល់ផលជាបណ្តើរៗ ហើយដើមមៀនជារុក្ខជាតិដែលមានអាយុវែង និងហុចផលឱ្យយើងប្រមូលបានដល់ 30ឆ្នាំក៏មិនទាន់ងាប់ដើមទៅវិញផង៕
