តារាឆ្នើមអូឡាំពិក Michael Phelps បានប្រើប្រាស់បណ្តាញសង្គម Twitter ដើម្បីអបអរដល់ Clark Kent Apuada ក្រោយពីកុមារាវ័យត្រឹមតែ 10ឆ្នាំរូបនេះបានបំបែកកំណត់ត្រារយៈពេលរបស់គេកាលពីរូបគេស្ថិតក្នុងវ័យ 23ឆ្នាំលើវិញ្ញាសាហែលទឹកបែបមេអំបៅចម្ងាយ 100ម៉ែត្រ ក្នុងព្រឹត្តិការណ៍ Far West International Championship កាលពីចុងសប្តាហ៍កន្លងទៅថ្មីៗនេះ។ Phelps ម្ចាស់មេដាយមាសអូឡាំពិក23គ្រឿងបានសរសេរនៅលើបណ្តាញសង្គម Twitter ថា៖ «សូមអបអរសាទរដល់ clark kent សម្រាប់ការបំបែកកំណត់ត្រានេះ។ សូមរក្សាការធ្វើបាននេះឱ្យល្អ និងសុបិនឱ្យធំទៅមុខទៀត»។
Apuada បានទទួលជ័យជម្នះក្នុងការប្រកួតហែលទឹកចម្ងាយ 100ម៉ែត្រ កុមារអាយុក្រោម 10ឆ្នាំ ដោយប្រើពេល 1នាទី និង9:38វិនា ពោលគឺតិចជាង 1វិនាទី បើធៀបទៅនឹងថិរវេលារបស់ Phelps ក្នុងព្រឹត្តិការណ៍ដូចគ្នានេះនៅរដ្ឋ California កាលពីឆ្នាំ1995។ Apuada ដែលបានហែលទឹកឱ្យក្រុម Monterey County Aquatic Team ក្នុងរដ្ឋ California បានប្រកួតហែលទឹកអស់រយៈពេល 4ឆ្នាំមកហើយ។ នេះបើយោងទៅតាមការបញ្ជាក់ពីគ្រូបង្វឹករបស់កុមារាដ៏ឆ្នើមរូបនេះ។ ការបង្ហាញពីទេពកោសល្យដ៏អស្ចារ្យរបស់គេ បានធ្វើឱ្យរូបគេបានទទួលរហស្សនាមថា Superman។
ទាក់ទងនឹងកីឡាករវ័យក្មេងដ៏ឆ្នើមម្នាក់នេះ រូបគេក៏មានជំនាញផ្នែកកុំព្យូរទ័រ និងវិទ្យាសាស្ត្រនៅសាលារៀនរបស់គេ និងរៀនសិល្បៈក្បាច់គុណ ក៏ដូចជារៀនចុចព្យ៉ាណូ លោក Dia Riana ដែលជាគ្រូបង្វឹក បានប្រាប់បណ្តាញសារព័ត៌មាន CNN ថា៖ «ក្មេងនេះ មិនដូចក្មេងណាផ្សេងដែលខ្ញុំធ្លាប់បានបង្រៀនឡើយ»៕
ប្រភពពី៖ Channel News Asia
