បច្ចុប្បន្ន Android គឺជាប្រព័ន្ធដំណើរការរបស់ Google ដែលមានអ្នកប្រើប្រាស់ច្រើនជាងគេ ប៉ុន្តែអ្វីដែលប្លែកនោះគឺថា ថ្មីៗនេះក្រុមហ៊ុន Google បាននិងកំពុងតែសម្ងំផលិតប្រព័ន្ធដំណើរការថ្មី ដែលនឹងចូលខ្លួនមកជំនួសតំណែង Android ក្នុងរយៈពេល 5ឆ្នាំខាងមុខ។
យោងតាមការចេញផ្សាយរបស់សារព័ត៌មាន The Next Thing បានឱ្យដឹងថា ក្រុមហ៊ុន Google បានប្រើប្រាស់វិស្វករប្រមាណជា 100នាក់ដើម្បីផលិតប្រព័ន្ធដំណើរការថ្មីមួយដែលមានឈ្មោះថា “Fuchsia” ហើយគម្រោងនេះបានចាប់ផ្ដើមតាំងពី 2ឆ្នាំមុនមកម្ល៉េះ។
ប្រព័ន្ធដំណើរការថ្មីមួយនេះ គឺមិនដូចគ្នានឹង Android ដែលផ្ដោតសំខាន់តែទៅលើស្មាតហ្វូន និងឧបករណ៍ Touchscreen នោះទេ តែផ្ទុយទៅវិញ Fuchsia គឺដាក់បញ្ចូលមុខងារគ្រប់គ្រងដោយសំឡេង (Voice-control) និងបច្ចេកវិទ្យា AI ហើយប្រហែលជាប្រើជាមួយនឹងទូរទស្សន៍ រថយន្ត និងទូទឹកកក។
អ្វីដែលជាចំណុចសំខាន់នោះគឺ Fuchsia មិនប្រើប្រព័ន្ធ Linux ដូច Android ទេ តែវាប្រើ Zircon ដែលជាហេតុធ្វើឱ្យមានការពិបាកធ្វើការជាមួយនឹង Hardware ចាស់ៗ ប៉ុន្តែវាក៏ជាការល្អម្យ៉ាងដែរ ព្រោះវានឹងនាំមកនូវបច្ចេកវិទ្យាថ្មីៗច្រើន៕
