តាមរយៈបណ្ដាញទំនាក់ទំនងសង្គម អ៊ីនស្ដាក្រាម មុននេះបន្តិចបានឱ្យដឹងថា កូនប្រុសច្បង លោក ព្រាប សុវត្ថិ ឈ្មោះថា សុវត្ថិ មុន្នីវណ្ណ កំពុងមានឈ្មោះល្បីល្បាញ និងមានរូបរាងស្រស់សង្ហារមិនចាញ់ឪពុកផងនេះ ខណៈបានបង្ហោះរូបថត 2 ខន្លឹកដោយភ្ជាប់មកជាមួយនិងចំនងជើងថា “និយាយសួស្តីទៅកាន់ Mercedes c63 AMG ថ្មីរបស់ខ្ញុំ” ។
តាមរយៈរូបថតនេះដែរ ត្រូវបានមើលឃើញថា ការប្រឡូកសិល្បៈមិនទាន់បានប៉ុន្មានផង តែបានសាងប្រជាប្រិយភាព និងមានតម្លៃខ្លួនខ្ពស់ស្មើនឹងតារាជើងចាស់មួយចំនួនទៅហើយ ទើបបានជាលោកហ៊ានសម្ញែងរយន្ដប្រណិតសេរីសន្លាងឱ្យមហាជនបានដឹង ដែលនៅក្នុងនោះអ្នកគាំទ្រមួយចំនួនក៏បានចូលខមមិនអបអរសាទរដល់ម្ចាស់បទ “ហេតុអ្វីចាកចោលបង” ជាមួយនិងសមាជិកថ្មីដ៏ស្រស់ស្អាតរបស់លោកផងដែរ។
សូមរំឭកផងដែរថា បើតាមប្រភពអ្នករៀបចំកម្មវិធីដែលសុំមិនបញ្ចេញឈ្មោះ ធ្លាប់បានទម្លាយឱ្យដឹងថា រាល់ពេលឡើងឆាកតន្រ្តីម្តងៗ កូនប្រុសទាំង2 គឺ សុវត្ថិ មុនីវណ្ណ និងសុវត្ថិ មុនីនាគ ត្រូវបានលោក ព្រាប សុវត្ថិ ជាឪពុកទារតម្លៃខ្លួនពីម្ចាស់កម្មវិធី ដល់ទៅជិត 4 ពាន់ដុល្លារអាមេរិកឯណោះ ដោយមិនរាប់បញ្ចូលទាំងកូនពៅរបស់លោកម្នាក់ទៀតនោះផង។ ប្រភពដដែលនោះក៏បានបង្ហើបឱ្យដឹងបន្ថែមទៀតដែរថា ប្រសិនបើមានការអញ្ជើញតែកូនប្រុសម្នាក់ដូចជា សុវត្ថិ មុនីវណ្ណ ឬក៏សុវត្ថិ មុនីនាគ ហើយឱ្យមានការសម្រួលតម្លៃខ្លួននោះ ក៏មិនបានដែរ ដាច់ខាតត្រូវតែអញ្ជើញទាំងពីរនាក់បងប្អូន ដែលមានការកំណត់កញ្ចប់តម្លៃដូចពោលខាងលើ(អ៊ឺហ៊ឺ!)។
យ៉ាងណាមិញ នេះគឺជាតម្លៃខ្លួនដ៏ខ្ពស់មួយ ដែលមានតែតារាល្បីៗប្រឡូកសិល្បៈយូរឆ្នាំប៉ុណ្ណោះ ទើបអាចទទួលបានតម្លៃខ្លួនក្នុងចំនួននេះបាន ក៏ប៉ុន្តែកូនប្រុសរបស់លោក ព្រាប សុវត្ថិ ទើបតែចូលខ្លួនបានប៉ុន្មានខែប៉ុណ្ណោះក៏មានតម្លៃខ្លួនខ្ពស់បែបនេះទៅហើយ៕
