ក្លិបទូកក្តោង Everton បានបំពេញការចុះហត្ថលេខាជាមូយនឹងខ្សែប្រយុទ្ធ Richarlison មកពីក្លិប Watford ក្នុងកិច្ចសន្យារយៈពេល 5ឆ្នាំ។ បើយោងតាមបណ្តាញសារព័ត៌មាន Sky Sports បានរាយការណ៍ថា ក្លិប Everton បានចំណាយប្រាក់ប្រមាណជា 40លានផោន (ស្មើនឹង 52.6លានដុល្លារអាមេរិក) សម្រាប់តារាឆ្នើមវ័យ 21ឆ្នាំរូបនេះ។
Richarlison នឹងក្លាយជាកីឡាករចំណូលថ្មីដំបូងគេរបស់លោក Marco Silva អ្នកចាត់ការទូទៅថ្មីរបស់ Everton ចាប់តាំងពីចូលកាន់តំណែងនៅកីឡដ្ឋាន Goodison Park ក្នុងរយៈពេលត្រឹមតែ 1ឆ្នាំ ក្រោយពីយកកីឡាកររូបនេះចេញពីក្លិប Fluminense ទៅកាន់ក្លិប Watford ។ Richarlison បានប្រាប់ទូរទស្សន៍ evertontv ថា៖ «ខ្ញុំចង់បានការជោគជ័យជាច្រើនជាមួយនឹង Everton។
ខ្ញុំគិតថា វានឹងក្លាយជារឿងដ៏សំខាន់សម្រាប់ខ្ញុំក្នុងការស្ថិតនៅនេះជាមួយនឹងលោក Marco Silva ម្តងទៀត។ ខ្ញុំនឹងរៀនឱ្យបានច្រើនបន្ថែមទៀត ពីព្រោះខ្ញុំនៅតែរៀនក្នុងនាមជាកីឡាករម្នាក់ ហើយខ្ញុំចង់អភិវឌ្ឍ និងរីកចម្រើននៅទីនេះ»។ ខ្សែប្រយុទ្ធវ័យ 21ឆ្នាំរូបនេះបានបន្ថែមទៀតថា៖ «Everton បានដាក់ការជឿជាក់មកលើខ្ញុំ ហើយខ្ញុំមានបំណងក្នុងការផ្តល់កិត្តិយសដល់អាវរបស់ខ្ញុំនៅទីនេះ និងបង្ហាញនៅលើទីលានអំពីមូលហេតុដែលខ្ញុំបានមកទីនេះ»។
ការផ្ទេរនេះស្ទើរតែបានបំពេញកាលពីសប្តាហ៍មុនទៅហើយ ខណៈដែលEverton បានស្ថិតយ៉ាងប្រកៀកក្នុងការចុះហត្ថលេខាជាមួយនឹងខ្សែប្រយុទ្ធប្រេស៊ីលរូបនេះ ដែលធ្លាប់បានលេងឱ្យលោក Silva ក្នុងពេលលោកដឹកនាំនៅ Watford តែបច្ចុប្បន្នជាគ្រូបង្វឹករបស់ Everton៕
ប្រភពពី៖ Sky Sports
