ម្ចាស់មេដាយមាសអូឡាំពិកលើវិញ្ញាសាហែលទឹក 6សម័យកាល Ryan Lochte បានរងការពិន័យព្យួររយៈពេល 14ខែសម្រាប់ការប្រព្រឹត្តល្មើសនឹងច្បាប់ប្រឆាំងសារធាតុហាមឃាត់ ក្រោយពីរូបគេទទួលការព្យាបាលមួយដោយការចាក់បញ្ចូលតាមសរសៃឈាម។ នេះបើយោងតាមការបញ្ជាក់របស់ភ្នាក់ងារប្រឆាំងនឹងសារធាតុហាមឃាត់របស់អាមេរិក (USADA) កាលពីថ្ងៃចន្ទ។
បើទោះបី USADA បញ្ជាក់ថា Lochte មិនបានប្រើប្រាស់សារធាតុហាមឃាត់ក៏ដោយ ប៉ុន្តែអត្តពលិកទាំងអស់ត្រូវតែទទួលយកការចាក់ថ្នាំបញ្ចូលតាមសរសៃឈាមដែលជាផ្នែកមួយនៃការព្យាបាលផ្នែកសុខាភិបាល ឬតាមរយៈការព្យាបាលផ្សេងទៀតប្រកបដោយការជឿជាក់។ Lochte បានប្រាប់ក្នុងសន្និសីទសារព័ត៌មានមួយនៅ South Florida ថា៖ «ខ្ញុំមិនបានប្រើប្រាស់សារធាតុហាមឃាត់ឡើយ។ រាល់អ្វីៗទាំងអស់គឺស្របច្បាប់។ អ្នកអាចទទួលយកការព្យាបាល ប៉ុន្តែវាគឺស្របច្បាប់ ហើយអ្នកត្រូវតែគោរពច្បាប់ទាំងនោះ»។
កីឡាករហែលទឹករបស់អាមេរិកវ័យ 33ឆ្នាំរូបនេះ បានបង្ហោះរូបភាពមួយរបស់គេក្នុងពេលទទួលការព្យាបាលតាមសរសៃឈាម នៅលើបណ្តាញសង្គម កាលពីខែឧសភា ដែលបានធ្វើឱ្យ USADA បើកការស៊ើបអង្កេតមួយតែម្តង ខណៈដែល Lochte បានបញ្ជាក់ថា រូបគេបានចូលរួមសហការយ៉ាងពេញទំហឹងជាមួយនឹងមន្ត្រីច្បាប់របស់អង្គភាពនេះ៕
ប្រភពពី៖ Channel News Asia
