Richarlison នឹងត្រូវបំពេញការផ្ទេររបស់គេក្នុងតម្លៃខ្លួន 50លានផោន (ស្មើនឹង 65.5លានដុល្លារអាមេរិក) ទៅកាន់ក្លិប Everton ក្នុងរយៈពេល 24ម៉ោងទៀតចាប់ពីពេលនេះទៅ។
ខ្សែបម្រើស្លាបសញ្ជាតិប្រេស៊ីលរូបនេះ បានទទួលការពិនិត្យសុខភាពនៅ Everton កាលពីថ្ងៃចន្ទម្សិលមិញ ក្រោយពីក្លិបទូកក្តោងមួយនេះ បានយល់ព្រមលើការផ្ទេរមួយជាមួយនឹងក្លិប Watford កាលពីចុងសប្តាហ៍ថ្មីនេះ។ Richarlison វ័យ 21ឆ្នាំ នឹងក្លាយជាកីឡាករចំណូលថ្មីដំបូងគេរបស់លោក Marco Silva នៅក្នុងក្លិបនេះ ខណៈដែលរូបគេត្រូវដើរតាមអតីតគ្រូបង្វឹកសញ្ជាតិព័រទុយហ្គាល់របស់គេពីកីឡដ្ឋាន Vicarage Road។
Richarlison បានចូលរួមជាមួយនឹងក្លិប Watford ដោយចេញពីក្លិប Fluminense សម្រាប់តម្លៃខ្លួន 13លានផោន កាលពីខែសីហា និងបានបង្ហាញពីទម្រងលេងដ៏គួរឱ្យចាប់អារម្មណ៍ក្នុងរដូវកាលទី1 របស់គេក្នុងក្របខ័ណ្ឌ Premier League ដោយបានស៊ុតបាល់បញ្ចូលទី 5គ្រាប់ ក្នុងការបង្ហាញខ្លួន 12លើកដំបូងរបស់គេ។
Everton មិនទាន់ទិញចូលកីឡាករថ្មីណាម្នាក់នៅឡើយទេក្នុងពេលបើកទីផ្សារដោះដូរកីឡាករនៅពេលនេះ បើទោះបីជាធ្លាប់បានទាក់ទងជាមួយនឹងខ្សែការពារ Lucas Digne របស់ក្លិប Barcelona ក៏ដោយ។ Richarlison ត្រូវបានរំពឹងទុកថា នឹងចុះហត្ថលេខាលើកុងត្រារយៈពេល 5ឆ្នាំ និងចាប់ផ្តើមការហ្វឹកហាត់នៅមុនពេលបើករដូវកាលរបស់គេជាមួយនឹងក្លិបថ្មីនៅសប្តាហ៍នេះ៕
ប្រភពពី៖ Daily Star
