បច្ចុប្បន្នតម្លៃដីនៅខេត្តព្រះសីហនុកំពុងឡើងថ្លៃខ្ពស់ខ្លាំង ដោយសារវិនិយោគិនចូលទៅបណ្តាក់ទុនជាច្រើននៅទីនោះ ហើយបន្ទាប់ពីខេត្តមួយនេះខេត្តមួយចំនួនទៀតក៏មានសក្តានុពលខ្លាំងដែរ ដូចជាខេត្តសៀមរាប កំពត ក្រុងប៉ោយប៉ែត ខេត្តបន្ទាយមានជ័យ និងក្រុងបាវិតខេត្តស្វាយរៀង ជាដើម។
លោក គឹម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថាបន្ទាប់ពីខេត្តព្រះសីហនុ គឺខេត្តសៀមរាបដែលមានចរន្តដីធ្លី និងសំណង់ខ្លាំងទន្ទឹមគ្នាដែរ ដោយសារខេត្តនោះមានសក្តានុពលខ្លាំងខាងវិស័យទេសចរណ៍ដែលធ្វើឱ្យសំណង់សណ្ឋាគារ ផ្ទះសំណាក់ ផ្ទះល្វែង និងសកម្មភាពពុះដីឡូត៍លក់នៅទីនោះកំពុងមានសកម្មភាពខ្លាំងដូចទីក្រុងធំៗផ្សេងទៀតដែរ។
លោកថា បន្ទាប់ពីខេត្តសៀមរាប គឺខេត្តកំពត ជាខេត្តជាប់មាត់សមុទ្រដូចខេត្តព្រះសីហនុដែរ និងមានសក្តានុពលខាងវិស័យទេសចរណ៍ខ្លាំងផងដែរធ្វើឱ្យសកម្មភាពទិញ-លក់អចលនទ្រព្យនៅទីនោះកំពុងកញ្ជ្រោលឡើងខ្លាំង ខណៈដែលអ្នកវិនិយោគធំៗជនជាតិខ្មែរ និងជនបរទេសចាប់ផ្តើមបោះទុនសម្រាប់ទិញអចលនទ្រព្យនៅទីនោះដើម្បីទុកលក់បន្ត ឬពុះឡូត៍លក់ស្វែងរកប្រាក់ចំណេញទៅថ្ងៃខាងមុខ។
ក្រៅពីខេត្តទេសចរណ៍ខាងលើ ក្រុងប៉ោយប៉ែតដែលជាតំបន់ជាប់ព្រដែនជាមួយប្រទេសថៃក៏វិស័យអចលនទ្រព្យមានសក្តានុពលខ្លាំងដូចគ្នាដែរ ដោយសារវាជាច្រកអន្តរជាតិ និងជាសរសៃឈាមសេដ្ឋកិច្ចដ៏សំខាន់ក្នុងការដឹកជញ្ជូនទំនិញឆ្លងកាត់ព្រំដែនកម្ពុជា-ថៃ។ បច្ចុប្បន្នក្រុងប៉ោយប៉ែតបានក្លាយជាមជ្ឈមណ្ឌលសេដ្ឋកិច្ចមួយសំខាន់ដែលមានការរីកលូតលាស់ខ្លាំងផ្នែកខាងសំណង់សណ្ឋាគារ កាស៊ីណូ រោងចក្រ សហគ្រាសនានា រីកដុះដាលយ៉ាងលឿននៅទីនោះ។ ផ្អែកលើការរីកដុះដាលខាងសំណង់នេះ បានធ្វើឱ្យតម្លៃដីនៅតំបន់ព្រំដែនភាគខាងលិចប្រទេសកម្ពុជាមួយនេះកំពុងមានសក្តានុពលខ្លាំងដែរ តាមរយៈការសាងសង់សំណង់ផ្ទះល្វែង និងការពុះដីឡូត៍លក់កំពុងមានការគាំទ្រខ្លាំងពីអតិថិជន។ ក្រុងប៉ោយប៉ែតសម្បូរទៅដោយអ្នកចំណាកស្រុកមកពីបណ្តាខេត្តផ្សេងៗទៅរស់-នៅទីនោះ ដើម្បីប្រកបមុខរបរអាជីវកម្មផ្សេងៗទៅតាមជំនាញរបស់គ្រួសារនីមួយៗ ដែលពូកគាត់មានតម្រូវការចាំបាច់ក្នុងការទិញផ្ទះ ឬទិញដីសាងសង់ផ្ទះរស់នៅផ្ទាល់ខ្លួនសម្រាប់រក្សាលំនឹងគ្រួសារ ជាជាងជួលផ្ទះគេរស់នៅបណ្តោះអាសន្ននោះ។
បន្ទាប់ពីក្រុងប៉ោយប៉ែត តំបន់ព្រំដែនដែលមានសក្តានុពលមួយទៀត គឺក្រុងបាវិត ខេត្តស្វាយរៀង ជាច្រកព្រំដែនអន្តរជាតិកម្ពុជា-វៀតណាម ស្ថិតភាគខាងកើតនៃប្រទេសកម្ពុជាដែលបច្ចុប្បន្ន នៅទីនោះក៏មានសកម្មភាពរស់រវើកក្នុងការដឹកជញ្ជូនទំនិញឆ្លងកាត់ព្រំដែន និងជាទីប្រជុំជនដែលមានមនុស្សរស់នៅច្រើន។ ងាកមកវិស័យសំណង់វិញ ក៏មានការ-រីកដុះដាលជាបន្តបន្ទាប់ដែរ ដូចជាសំណង់សណ្ឋា-គារ កាស៊ីណូ និងមានការសាងសង់ផ្ទះល្វែង ការពុះដីឡូត៍សម្រាប់លក់បង់រំលស់ដូចនៅទីក្រុងភ្នំពេញដែរ។ ត្រង់ចំណុចនេះលោក គីម ហ៊ាង បញ្ជាក់ថា “ស្រុកកំណើតខ្ញុំ គឺនៅទីនោះ កាលពី20មុន ដីតំបន់នោះ 1ហិកតាតម្លៃ1ជីមាស ក៏មិនមានអ្នកទិញដែរ ព្រោះមិនមានអ្នកណាដឹងថា វានឹងឡើងថ្លៃដូច្នេះឡើយ។ ពីមុនដីធ្លីនៅទីនោះជាកន្លែងដែលកសិករធ្វើស្រែ និងដើរចាប់ត្រី ប៉ុន្តែមកទល់ពេលនេះដីទាំងអស់នោះបានឡើងថ្លៃយ៉ាងខ្លាំង 1ហិកតា 30
ម៉ឺនដុល្លារ រហូតដល់ 3លានដុល្លារ ដោយគ្មានអ្នកណាម្នាក់អាចនឹកស្មានដល់”។
ក្រៅពីសំណង់ទាំងនោះ ក្រុងបាវិតក៏មានសក្តានុពលខ្លាំងក្នុងវិស័យឧស្សាហកម្មដែរ មានរោងចក្រសហគ្រាស មានតំបន់សេដ្ឋកិច្ចពិសេស បង្កឱ្យមានសកម្មភាពរស់រវើក និងរីកចម្រើនខ្លាំងក្នុងវិស័យឧស្សាហកម្ម បន្ទាប់ពីរាជធានីភ្នំពេញ ដែលអាចផ្តល់ការងារ និងប្រាក់ចំណូលដល់ពលរដ្ឋនៅក្នុងតំបន់ និងអ្នកចំណាកស្រុកឱ្យពួកគេបានដោះស្រាយជីវភាព និងសន្សំប្រាក់មួយចំនួនទិញដីយកចំណេញ ឬទិញដីសាងសង់ផ្ទះសម្រាប់ស្នាក់នៅផ្ទាល់ខ្លួនផងដែរ។
អ្វីដែលជាការកត់សម្គាល់មួយទៀតគឺ ខេត្តកណ្តាលក៏មានសក្តានុពលខ្លាំងផងដែរ ក្នុងការពុះដីឡូត៍ និងសាងសង់ផ្ទះល្វែងលក់ ស្ទើរមិនចាញ់រាជធានីភ្នំពេញឡើយ ខណៈដែលក្រុមហ៊ុនធំៗបានទៅបោះទីតាំងមានសក្តានុពលសាងសង់សំណង់បុរីទំនើបៗ និងអគារខុនដូខ្ពស់ស្កឹមស្កៃនៅមាត់ទន្លេបាសាក់បង្កើតជាមជ្ឈមណ្ឌលពាណិជ្ជកម្ម ខណៈខេត្តមួយនេះមានទីតាំងនៅជិតរាជធានីភ្នំពេញ ងាយស្រួលក្នុងការធ្វើដំណើរទៅ-មកបំពេញការងារ និងប្រកបរបរផ្សេងៗ ហើយខេត្តនេះក៏មានច្រកទ្វារអន្តរជាតិមួយផងដែរ គឺច្រកព្រំដែនជ្រៃធំក្នុងការ-ដោះដូរទំនិញជាមួយប្រទេសវៀតណាម។
ទោះជាដូច្នេះក្ដី លោក គឹម ហ៊ាង បានបញ្ជាក់ថាមិនមែនមានត្រឹមតែខេត្ត ឬច្រកព្រំដែនខាងលើប៉ុន្មាននោះទេដែលមានសក្តានុពលដីធ្លី ខេត្តបាត់ដំបងដែលជាខេត្តមួយល្បីល្បាញខាងផលិតស្រូវ និងខេត្តកំពង់ចាមដែលមានសក្តានុពលខាងដំណាំកៅស៊ូ និងដំណាំកសិកម្មផ្សេងទៀត បច្ចុប្បន្នក៏មានសក្តានុពលខ្លាំងផងដែរក្នុងការសាងសង់សំណង់សណ្ឋាគារ ផ្ទះសំណាក់ ឬផ្ទះល្វែងសម្រាប់លក់ទៅឱ្យអតិថិជន ដែលអាចធ្វើឱ្យទីក្រុងទាំងនោះកំពុងមានការផ្លាស់ប្តូរមុខមាត់របស់ខ្លួនកាន់តែប្រសើរឡើងៗដែរ៕
