អ្នកចាំទី Igor Akinfeev បានក្លាយជាវីរបុរស ខណៈដែលក្រុមបាល់ទាត់ជម្រើសជាតិរុស្ស៊ី បានផ្តួលក្រុមម្ចាស់ជើងឯកឆ្នាំ2010 ដោយការស៊ុតបាល់ប៉េណាល់ទី ដើម្បីឈានទៅកាន់វគ្គ 8ក្រុមចុងក្រោយនៃព្រឹត្តិការណ៍ World Cup ជាមួយនឹងក្រុមជម្រើសជាតិក្រូអាស៊ី ដែលបានសង្គ្រោះខ្លួនឱ្យផុតពីការសោកសៅក្នុងការស៊ុតបាល់ប៉េណាល់ទី កាលពីថ្ងៃអាទិត្យ។
ក្រុមជម្រើសជាតិអេស្ប៉ាញរបស់លោក Fernando Hierro បានគ្រប់គ្រងការប្រកួតនេះស្ទើរតែទាំងស្រុង នាកីឡដ្ឋាន Luzhniki ក្នុងទីក្រុងម៉ូស្គូ ដោយមានអត្រាគ្រប់គ្រងបាល់ដល់ទៅ 74ភាគរយ ប៉ុន្តែបានបង្កើតឱ្យមានឱកាសតិចតួចប៉ុណ្ណោះ ក៏បានធ្លាក់ចូលក្នុងសម្ពាធក្នុងពេលឈានដល់ដំណាក់កាលដ៏សំខាន់បំផុតនៃការប្រកួត។
អ្នកចាំទីជើងចាស់ Akinfeev បានសង្គ្រោះបាល់ប៉េណាល់ទីពីការស៊ុតរបស់កីឡាករ Koke និង Iago Aspas ខណៈដែលរុស្ស៊ីបានទទួលជ័យជម្នះក្នុងការស៊ុតបាល់ប៉េណាល់ទីក្នុងលទ្ធផល 4-3 ដើម្បីឈានទៅវគ្គ 8ក្រុមចុងក្រោយជាលើកទី1 បើគិតចាប់តាំងពីឆ្នាំ1970 ដែលនៅពេលនោះពួកគេបានលេងក្នុងនាមជាសហភាពសូវៀត។ ការដណ្តើមបានជ័យជម្នះដ៏មិនគួរឱ្យជឿនេះ បានបង្កើតឱ្យមានសកម្មភាពដ៏គួរឱ្យរំជួលចិត្តជាច្រើន ខណៈដែលភ្លៀងបានធ្លាក់ចុះមកយ៉ាងខ្លាំង ហើយមានការអបអរសាទរយ៉ាងខ្លាំងក្នុងទីក្រុងម៉ូស្គូ ដោយប្រជាជនក្នុងតំបន់បានធ្វើការអបអរដោយគ្រវីទង់ជាតិ ចុចស៊ីភ្លេរថយន្ត និងស្រែកថា «រុស្ស៊ី»។
ស្របពេលជាមួយគ្នានេះ កាសែតកីឡាប្រចាំថ្ងៃ Marca របស់អេស្ប៉ាញ បានចេញផ្សាយថា៖ «ការធ្លាក់ចេញក្នុងវគ្គ 16ក្រុមចុងក្រោយ គឺជាទំព័រខ្មៅមួយផ្សេងទៀតក្នុងប្រវត្តិសាស្ត្ររបស់យើង»។ កាសែតដដែលបានបន្តថា៖ «ការប្រកួតនេះ ពិតជាផ្តល់នូវការភ្ញាក់ផ្អើល។
អេស្ប៉ាញ លេងបានយ៉ាងអន់ និងមិនគិតថា ខ្លួនចាកចេញឡើយនៅត្រឹមតែការស៊ុតបាល់ប៉េណាល់ទីចាប់ផ្តើម។ នេះគឺជាក្រុមដែលមានការបែកបាក់ដែលខ្វះនូវការស្រេកឃ្លានដើម្បីស៊ូទ្រាំនឹងការប្រជែងមួយដែលទាមទារឱ្យមានសំណាងច្រើន ប៉ុន្តែក៏មានការលើកទឹកចិត្តផងដែរ»។
ជ័យជម្នះនេះ នឹងធ្វើឱ្យក្រុមជម្រើសជាតិរុស្ស៊ី ធ្វើដំណើរទៅកាន់វគ្គ 8ក្រុមចុងក្រោយ ដោយត្រូវប៉ះជាមួយនឹងក្រុមជម្រើសជាតិក្រូអាស៊ី ដែលបានទម្លាក់ក្រុមជម្រើសជាតិដាណឺម៉ាក ដោយការស៊ុតបាល់ប៉េណាល់ទី 3-2 ក្រោយពីការប្រកួតបញ្ចប់ក្នុងលទ្ធផលស្មើ 1-1 ក្នុងរយៈពេល 120នាទី៕
ប្រភពពី៖ sport.yahoo.com