អ្នកប្រដាល់ម្ចាស់ខ្សែក្រវាត់ទម្ងន់ធ្ងន់ពិភពលោក Anthony Joshua របស់ចក្រភពអង់គ្លេស ត្រូវបានកំណត់រយៈពេលឱ្យ 24ម៉ោង ដើម្បីយល់ព្រមទទួលយកការប្រកួតមួយជាមួយនឹងកីឡាករប្រដាល់រុស្ស៊ី Alexander Povetkin បើមិនអ៊ីចឹងទេ គេអាចត្រូវប្រឈមមុខនឹងការបាត់បង់ខ្សែក្រវាត់ជើងឯកមួយខ្សែរបស់គេ។
Joshua ទើបតែបានទទួលខ្សែក្រវាត់របស់អង្គការកីឡាប្រដាល់ពិភពលោក ឬហៅកាត់ថា WBO ទម្ងន់ធ្ងន់មួយខ្សែទៀតថែមពីលើខ្សែក្រវាត់របស់ស្ថាប័ន WBA និង IBF ដែលរូបគេកំពុងគ្រប់គ្រងស្រាប់ហើយ នៅពេលដែលរូបគេបានផ្តួលកីឡាករជនជាតិនូវែលសេឡង់ Joseph Parker ក្នុងទីក្រុង Cardiff កាលពីខែមីនាកន្លងទៅ។ ចាប់តាំងពីពេលនោះមក លោក Eddie Hearn ដែលជាអ្នករៀបចំការប្រកួតរបស់ Joshua បានព្យាយាមរៀបចំការប្រកួតដណ្តើមខ្សែក្រវាត់រួមមួយ ជាមួយនឹងអ្នកប្រដាល់ Deontay Wilder ប៉ុន្តែនៅមិនទាន់បានចុះកិច្ចព្រមព្រៀងណាមួយជាមួយនឹងភាគីរបស់អ្នកប្រដាល់អាមេរិករូបនោះនៅឡើយ ហើយស្ថាប័ន WBA ពិតជាធុញទ្រាន់នឹងការរង់ចាំនេះខ្លាំងណាស់ ដោយបច្ចុប្បន្ន WBA បានប្រាប់ Joshua ថា រូបគេត្រូវតែឡើងប្រកួតជាមួយ Povetkin ដែលជាគូប្រជែងកើតចេញពីការជ្រើសរើសរបស់ពួកគេ។
លោក Gilberto Mendoza ប្រធានស្ថាប័ន WBA បានឱ្យដឹងនៅក្នុងសេចក្តីថ្លែងការណ៍មួយ កាលពីថ្ងៃអង្គារ ថា៖ «នៅថ្ងៃនេះ WBA បានស្នើសុំចម្លើយពីក្រុមរបស់ Anthony Joshua ទាក់ទងនឹងការប្រកួតរបស់គេជាមួយនឹងអ្នកប្រជែងដណ្តើមខ្សែក្រវាត់ Alexander Povetkin»។ ប្រធានរូបនេះបានបន្ថែមទៀតថា៖ «WBA បានអនុញ្ញាតឱ្យមានការពន្យារពេលរយៈពេល 1ខែដើម្បីធ្វើការចរចាជាមួយនឹង Povetkin និងការពិភាក្សាកំពុងបន្តជាមួយនឹង Deontay Wilder។ វាហាក់បង្ហាញថា ក្រុមការងាររបស់ Wilder មិនចង់ចុះកុងត្រា ហេតុនេះការប្រកួតរវាង Joshua និង Povetkin ត្រូវតែកើតឡើងភ្លាមៗ»៕
ប្រភពពី៖ Sport24
