ស្របពេលដែលវិស័យអប់រំកំពុងធ្វើកំណែទម្រង់ និងអភិវឌ្ឍលឿន និស្សិតជាច្រើនបានចេញពីគ្រឹះស្ថានសិក្សានានានៅទូទាំងប្រទេសជារៀងរាល់ឆ្នាំដើម្បីបម្រើការងារនៅក្នុងវិស័យសំខាន់ៗនៅកម្ពុជាតែទោះជាយ៉ាងនេះក្តី បញ្ហាប្រឈមរបស់កម្ពុជានៅតែមាន ព្រោះនិស្សិតមួយចំនួនមិនបានជ្រើសរើសជំនាញឱ្យត្រូវនឹងទីផ្សារដែលកំពុងត្រូវការនោះទេ។
ឯកឧត្តម អុិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានលើកឡើងក្នុងទិវាជាតិបណ្តុះបណ្តាលបច្ចេកទេស និងវិជ្ជាជីវៈ ថា កត្តាចម្បងដែលម្ចាស់សហគ្រាស ឬអ្នកគ្រប់គ្រងវិស័យឯកជនកំពុងជួបប្រទះនាពេលបច្ចុប្បន្ននេះ គឺការខ្វះខាតបុគ្គលិកជំនាញដើម្បីបំពេញការងារក្នុងស្ថាប័នរបស់ខ្លួន ខណៈអ្នកជំនាញបច្ចេកទេសមានចំនួនតិច ហើយស្ថាប័នធំៗជាច្រើនដណ្តើមគ្នាទាញយកទៅធ្វើការងារ។ ចំណុចនេះ គឺបង្ហាញពីភាពមិនស៊ីចង្វាក់គ្នារវាងទីផ្សារការងារ និងធនធានមនុស្សដែលបានបណ្តុះបណ្តាល ព្រោះមានអ្នកស្វែងរកការងារមួយចំនួនមិនអាចរកការងារធ្វើបាន ខណៈប្រធានក្រុមហ៊ុនមួយចំនួនមិនអាចស្វែងរកបុគ្គលិកធ្វើការងារបាន។
ឯកឧត្តម អុិត សំហេង បានមានប្រសាសន៍ថា៖ “ការងារសំខាន់ៗដែលនិយោកជកកំពុងត្រូវការខ្លាំងនោះមានដូចជា ផ្នែកសណ្ឋាគារ និងការស្នាក់-នៅ ផ្នែកឡូជីស្ទិក និងការដឹកជញ្ជូន ផ្នែកសុខាភិបាល ផ្នែកអប់រំ និងបណ្តុះបណ្តាល ផ្នែកកែច្នៃម្ហូបអាហារ និងភេសជ្ជៈ ផ្នែកហិរញ្ញវត្ថុ និងធានារ៉ាប់រង ផ្នែកព័ត៌មានវិទ្យា ផ្នែកសំណង់ ផ្នែកវាយន-ភណ្ឌកាត់ដេរសម្លៀកបំពាក់ និងផលិតស្បែកជើង និងផលិតកម្មកៅស៊ូ និងប្លាសិ្ទក”។
បើតាមឯកឧត្តមរដ្ឋមន្ត្រី បានឱ្យដឹងផងដែរថាកង្វះធនធានមនុស្សនេះអាចធ្វើឱ្យនិយោជកជួបភាពរាំងស្ទះក្នុងការអភិវឌ្ឍក្រុមហ៊ុនរបស់ខ្លួន ព្រោះពួកគាត់មិនអាចអនុវត្តបានតាមផែនការផលិតកម្ម រាំងស្ទះការពង្រីកអាជីវកម្ម ការប្រើប្រាស់បច្ចេក-វិទ្យាថ្មី និងមានបញ្ហាផលិតភាពមិនទាន់ស្របតាមគោលដៅដែលចង់បាន ជាដើម។ ដើម្បីដោះស្រាយបញ្ហានេះ ក្រសួងខិតខំប្រឹងប្រែងក្នុងការធ្វើកំណែទម្រង់ស៊ីជម្រៅលើផ្នែកអប់រំបច្ចេកទេស និងវិជ្ជាជីវៈតាមរយៈការពង្រឹងភាពជាដៃគូ រវាងរដ្ឋ និងឯកជន ដើម្បីចូលរួមគាំទ្រការអភិវឌ្ឍជំនាញឱ្យឆ្លើយតបទៅនឹងទីផ្សារការងារជាក់ស្តែង។
រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ ឯកឧត្តម ពេជ សោភ័ន បានលើកឡើងថាទីផ្សារការងារនៅកម្ពុជាមានតម្រូវការខ្ពស់លើកម្លាំងពលកម្មផ្នែកជំនាញបច្ចេកទេស និងវិជ្ជាជីវៈ ព្រោះកម្ពុជាជាប្រទេសកំពុងអភិវឌ្ឍន៍ដែលត្រូវការកម្លាំងពលកម្មជាច្រើនសម្រាប់បំពេញឱ្យវិស័យឧស្សាហកម្ម សំណង់ និងវិស័យសំខាន់ៗជាច្រើនផ្សេងទៀត។ បច្ចុប្បន្ននេះ កម្ពុជាបានបង្កើតសាលាបណ្តុះបណ្តាលវិជ្ជាជីវៈថ្នាក់ជាតិធំៗជាច្រើនដែលមានសមត្ថភាពក្នុងការបណ្តុះបណ្តាល និងជាច្រកយ៉ាងសំខាន់សម្រាប់យុវជនកម្ពុជាក្នុងការអភិវឌ្ឍសមត្ថភាពការងារដើម្បីចូលរួមចំណែកអភិវឌ្ឍសង្គម និងបង្កើនកម្រិតនៃការរស់នៅឱ្យកាន់តែប្រសើរ ព្រោះការងារផ្នែកបច្ចេកទេស ជាការងារដែលអាចទទួលបានប្រាក់ឧបត្ថម្ភខ្ពស់ និងមានទីផ្សារទូលំទូលាយ។
ឯកឧត្តម ពេជ សោភ័ន បានមានប្រសាសន៍ថា៖ “បញ្ហាដែលយើងជួបប្រទះនាពេលបច្ចុប្បន្ននេះ គឺយុវជនមិនទាន់ចាប់អារម្មណ៍ខ្លាំងលើការជ្រើសរើសជំនាញបច្ចេកទេស ឬមធ្យមបច្ចេកទេសសម្រាប់សិក្សានៅឡើយ ហេតុនេះយើងត្រូវបន្តផ្សព្វផ្សាយ និងជំរុញឱ្យមានសកម្មភាពប្រកបដោយភាពវិជ្ជមានដើម្បីណែនាំឱ្យយុវជនកម្ពុជាចាប់អារម្មណ៍លើជំនាញយ៉ាងមានសារៈសំខាន់ទាំងអស់នេះ”។
បើតាមឯកឧត្តម ពេជ សោភ័ន ទិវាជាតិបណ្តុះបណ្តាលបច្ចេកទេស និងវិជ្ជាជីវៈ ជាផ្នែកយ៉ាងសំខាន់ក្នុងការជំរុញផ្សព្វផ្សាយអំពីសារៈសំខាន់នៃវិស័យអប់រំបច្ចេកទេស និងវិជ្ជាជីវៈនៅកម្ពុជាបច្ចុប្បន្នឱ្យបានយល់ពីតម្រូវការជាក់ស្តែងរបស់កម្ពុជា។ យុវជនកម្ពុជាគួរចាប់យកអាជីពលើវិស័យសំខាន់ៗមួយចំនួនដែលអាចរកប្រាក់ចំណូលខ្ពស់ និងត្រៀមខ្លួនក្លាយជាអ្នកជំនាញរបស់កម្ពុជា លើវិស័យសំខាន់ៗដូចជាជំនាញគ្រឿងយន្ត អគ្គិសនី អេឡិចត្រូនិក ជំនាញសំណង់ និងវិស្វករជាដើម។
គួរបញ្ជាក់ផងដែរថា ថ្មីៗនេះក្រសួងការងារ និងបណ្តុះបណ្តាលវិជ្ជាជីវៈ បានព្យាយាមសហការជាមួយដៃគូជាតិ និងអន្តរជាតិដើម្បីជំរុញឱ្យមានការបណ្តុះបណ្តាលបច្ចេកទេសវិជ្ជាជីវៈ ឱ្យបានកាន់តែខ្លាំង និងដោះស្រាយរាល់បញ្ហាប្រឈមនានាដែលកំពុងជួបប្រទះក្នុងវិស័យការងារ។ ហើយនៅពាក់កណ្តាលខែមិថុនានេះ ក្រសួងការងារក៏បានប្រកាសបង្កើតក្រុមប្រឹក្សាជំនាញតាមវិស័យ (Sector Skills Councils – SSCs) ដើម្បីជំរុញការអនុវត្តគោលនយោបាយជាតិបណ្តុះបណ្តាលបច្ចេកទេស និងវិជ្ជាជីវៈ ក្នុងគោលដៅធានានូវការឆ្លើយតបរវាងកម្លាំងពលកម្មជំនាញ និងតម្រូវការទីផ្សារផ្នែកបច្ចេកទេស និងវិជ្ជាជីវៈ៕