សម្រាប់អ្នកដែលនិយមការតុបតែងខ្លួន តែងតែបង្ហើបឱ្យដឹងថា ការតុបតែងមុខស្អាត ឬមិនស្អាតនោះ គឺត្រូវសង្កត់ធ្ងន់ទៅលើភ្នែក ប្រសិនបើអ្នកគូសភ្នែកបានស្អាតនោះ ការតុបតែងមុខរបស់អ្នកក៏នឹងមានភាពលេចធ្លោទៅតាមនោះដែរ។ មិនមែនរាល់ការគូសត្រេភ្នែកទាំងអស់សុទ្ធតែអាចមើលទៅស្អាតបានគ្រប់ៗគ្នានោះទេ ព្រោះថា ដើម្បីទទួលបាននូវភាពស្រស់ស្អាតប្លែកពីគេនោះ អ្នកគួរតែដឹងពីគន្លឹះនៃការតុបតែងមួយចំនួនដែលអ្នកមិនធ្លាប់បាននឹកដល់កាលពីមុន។ ចង់ឱ្យការគូសត្រេភ្នែករបស់អ្នកមើលទៅស្អាតលេចធ្លោនោះ អ្នកត្រូវ ៖
គូសត្របកភ្នែកទាំងផ្នែកខាងលើ និងផ្នែកខាងក្រោមឱ្យបានត្រង់ស្មើគ្នាល្អ ដោយការចាប់ផ្តើមពីផ្នែកខាងចុងអូសទៅដល់គល់ភ្នែក ដោយឱ្យផ្នែកខាងចុងមានពណ៌ច្បាស់ជាងគេ ហើយធ្វើឱ្យវាមានពណ៌ស្រាលជាងមុនបន្តិចម្តងៗ ចាប់ពីកណ្តាលភ្នែកទៅដល់គល់ភ្នែក។
ក្នុងពេលដែលអ្នកកំពុងគូសរឹមត្របកភ្នែកអ្នកគួរប្រើម្រាមដៃទាញបន្តឹងត្របកភ្នែករបស់អ្នក ដើម្បីឱ្យការគូសត្រេភ្នែកកាន់តែមានភាពងាយស្រួល ស្អាត ត្រង់ល្អ ព្រមទាំងអាចមើលឃើញកន្លែងដែលអ្នកចង់គូសបានកាន់តែច្បាស់ទៀតផង។ ប្រើខ្មៅដៃគូសភ្នែកដែលមានមុខទន់ និងទាលបន្តិច ដើម្បីកុំឱ្យអ្នកមានអារម្មណ៍ថាឈឺ ដូច្នេះអ្នកមិនគួរចិតវាឱ្យស្រួចពេកនោះទេ។ ប្រសិនបើអ្នកចង់ឱ្យខ្មៅដៃគូសត្រេភ្នែករបស់អ្នកមានភាពទន់ និងងាយស្រួលគូសនោះ អ្នកត្រូវយកវាទៅជ្រលក់ក្នុងក្រែមរលោង ឬក្រែមផ្តល់សំណើមជាដើមក៏បាន។ ការធ្វើបែបនេះអាចជួយឱ្យខ្មៅដៃមានមុខទន់ជាងមុន ងាយស្រួលគូស ព្រមទាំងគូសបានស្អាតថែមទៀតផង៕
