បច្ចុប្បន្នមានអ្នករកស៊ីក្នុងវិស័យអចលនទ្រព្យជាច្រើនបានធ្វើជាភ្នាក់ងារអចលនវត្ថុដោយគ្មានអាជ្ញាប័ណ្ណ និងជំនាញវិជ្ជាជីវៈត្រឹមត្រូវធ្វើឱ្យទីផ្សារនេះជះឥទ្ធិពលមិនល្អដល់ក្រុមហ៊ុនស្របច្បាប់មួយចំនួន ព្រមទាំងអតិថិជនជាអ្នកទិញទៀតផង ហេតុនេះដើម្បីដោះស្រាយបញ្ហាចំពោះមុខ សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា (CVEA) នឹងបើកវគ្គបណ្តុះបណ្តាលមួយនៅពាក់កណ្ដាលខែមិថុនានេះ។ នេះបើតាមការថ្លែងនៅក្នុងកិច្ចប្រជុំប្រចាំត្រីមាសរបស់លោកបណ្ឌិត គីម ហ៊ាង ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា។
ទោះបីជាយ៉ាងណា សម្រាប់ពេលបច្ចុប្បន្ននេះគ្រប់គ្នានៅតែអាចធ្វើជាឈ្មួញកណ្តាល ឬជាភ្នាក់ងារទិញ-លក់អចលនទ្រព្យបាន បើទោះជាគ្មានអាជ្ញាប័ណ្ណក៏ដោយ។ ប៉ុន្តែសម្រាប់ពេលអនាគតឆាប់ៗខាងមុខ ប្រសិនបើគ្មានអាជ្ញាប័ណ្ណទេ ភ្នាក់ងារអាចប្រឈមនឹងការមិនទទួលបានកម្រៃជើងសា។
លោកបណ្ឌិត គីម ហ៊ាង បានឱ្យដឹងថា បច្ចុប្បន្ននេះនរណាៗក៏អាចគួកជេរដីបានដែរ។ ពេលលក់បាន យកលុយដាក់ហោប៉ៅ គ្មានបង់ពន្ធអ្វី 1រៀលហើយអត់មានអាជ្ញាប័ណ្ណទៀត។ តែនៅពេលឆាប់ៗខាងមុខនេះ រឿងនេះនឹងត្រូវបញ្ចប់ហើយ។ នេះមិនមែនជាការព្រមានទេ ប៉ុន្តែយើងត្រូវធ្វើទៅតាមច្បាប់ព្រោះប្រទេសគេរីកចម្រើន គឺគេធ្វើទៅតាមច្បាប់ ប្រទេសយើងក៏ត្រូវតែធ្វើទៅតាមច្បាប់ដែរ។
លោកបានបញ្ជាក់ថា៖ “អ្នកណាដែលចង់ធ្វើជាអ្នកគួកជេរដីធ្លី ជាភ្នាក់ងារអចលនវត្ថុ ទី1 ត្រូវតែរៀនពេលរៀនហើយត្រូវប្រឡងយកសញ្ញាបត្រ (certificate)មានវិញ្ញាបនបត្រហើយ ត្រូវប្រឡងយកអាជ្ញាប័ណ្ណ ពេលមានអាជ្ញាប័ណ្ណហើយ ត្រូវជ្រកក្រោមស្លាកក្រុមហ៊ុនដីធ្លីស្របច្បាប់ណាមួយ។ ពេលមានលក្ខខណ្ឌគ្រប់ហើយ ទើបអ្នកនោះអាចលក់ និងមានសិទ្ធិយកកម្រៃជើងសា (កុំមីស្យុង) បាន។ ពេលឱ្យកុំមីស្យុងនេះគេត្រូវមើលលេខកូដសម្គាល់យើងជាភ្នាក់ងារអចលនវត្ថុលេខប៉ុន្មាន? បើជាភ្នាក់ងារអចលនវត្ថុស្របច្បាប់ទើបទទួលបានកម្រៃជើងសាត្រឹមត្រូវ។
ដោយមើលឃើញពីភាពរីកចម្រើននៃវិស័យអចលនទ្រព្យកម្ពុជាដែលបានជំរុញសន្ទស្សន៍នៃការទិញ-លក់ដីធ្លី និងលំនៅឋានពីសំណាក់ប្រជាជនទាំងក្នុងស្រុក និងក្រៅស្រុក ក្រសួងសេដ្ឋកិច្ច និងហិរញ្ញវត្ថុកាលពីពេលថ្មីៗនេះបានចេញប្រកាសមួយដែលតម្រូវឱ្យអ្នករកស៊ីក្នុងវិស័យនេះត្រូវតែមានសញ្ញាបត្រជំនាញវិជ្ជាជីវៈច្បាស់លាស់ ទើបពួកគេអាចទទួលបានអាជ្ញាប័ណ្ណពីក្រសួងសម្រាប់ប្រកបវិជ្ជាជីវៈនេះ។ ហេតុនេះទើបសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាកំពុងសហការជាមួយសាកលវិទ្យាល័យសេដ្ឋកិច្ច និងហិរញ្ញវត្ថុដើម្បីបង្កើត និងរៀបចំវគ្គបណ្តុះបណ្តាលវិជ្ជាជីវៈមួយឡើងសម្រាប់ក្រុមហ៊ុន និងភ្នាក់ងារអចលនវត្ថុដែលចង់ប្រកបអាជីវកម្ម/រកស៊ីក្នុងវិស័យអចលនទ្រព្យដោយភាពស្របច្បាប់នៅកម្ពុជា។
លោក ឃាង ពុទ្ធី អគ្គនាយកក្រុមហ៊ុនអចលនទ្រព្យស្លឹករឹតបានថ្លែងថា៖ “ពេលណាមានធនធានមនុស្សច្រើនក្នុងវិស័យនេះនឹងធ្វើឱ្យការអភិវឌ្ឍក្នុងវិស័យនេះកាន់តែមានភាពល្អប្រសើរ និងធានាបាននូវទំនុកចិត្តពីអ្នកវិនិយោគ។ ការបើកសាលា ឬវគ្គបណ្តុះបណ្តាលវិជ្ជាជីវៈក្នុងវិស័យនេះច្រើន គឺជាការណ៍ដែលគួរតែធ្វើ មិនថាអ្នកណាបើកនោះទេ ព្រោះបើយើងបង្កើតសាលាបានច្រើនយើងនឹងបណ្តុះបណ្តាលធនធានមនុស្សបានច្រើនដែលវានឹងជួយដល់វិស័យនេះបានកាន់តែល្អប្រសើរដែរ។
ចំពោះកម្មវិធីសិក្សាវិញ សម្រាប់ជំហានដំបូង ដើម្បីក្លាយជាភ្នាក់ងារលក់អចលនទ្រព្យនឹងត្រូវសិក្សារយៈពេល 75ម៉ោង រីឯភ្នាក់ងារវាយតម្លៃអចលនទ្រព្យវិញនឹងត្រូវសិក្សារយៈពេល 100ម៉ោង។ ហើយសមាគមជាអ្នករៀបចំកម្មវិធីសិក្សា និងចាត់ចែងបញ្ជូនគ្រូជំនាញ ទាំងគ្រូខ្មែរ និងជនបរទេសសម្រាប់វគ្គសិក្សាទាំងមូល។ ជំហានបន្ទាប់ (អាចក្នុងរយៈពេល2 ឬ3ឆ្នាំខាងមុខ) នឹងត្រូវរៀបចំកម្មវិធីសិក្សាជាថ្នាក់បរិញ្ញាបត្ររង និងបរិញ្ញាបត្រទៅតាមលក្ខខណ្ឌតម្រូវថែមទៀត។
បើតាមលោកប្រធានសមាគមឱ្យដឹង គឺសាលាមានស្រាប់ហើយ នៅតែបញ្ជូនគ្រូ និងបង្កើតកម្មវិធីឱ្យគាត់ប៉ុណ្ណោះ “សមាគមនឹងបើកវគ្គបណ្ដុះបណ្ដាលរយៈពេល 75ម៉ោងមួយ ដើម្បីអូសទាញអ្នកមិនទាន់មានអាជ្ញាប័ណ្ណឱ្យបានរៀនសូត្រត្រឹមត្រូវដើម្បីទទួលបានអាជ្ញាប័ណ្ណស្របច្បាប់ ថ្ងៃក្រោយនរណាដែលចង់បានកុំមីស្យុង ទាល់តែទៅរៀនយកវិញ្ញាបនបត្រសិន ទើបអាចធ្វើការយកកុំមីស្យុងបាន។ តែការរៀន 75ម៉ោងមិនគ្រប់ទេ ត្រូវប្រឡងឱ្យជាប់ទៀតហើយត្រូវយកវិញ្ញាបនបត្រទៅសុំអាជ្ញាប័ណ្ណនៅក្រសួង និងទៅធ្វើការនៅក្រុមហ៊ុនស្របច្បាប់ណាមួយផងដែរ។
អគ្គនាយិកាក្រុមហ៊ុន AMATAK Property service Co, Ltd លោកស្រី តាំង ហួរ បានថ្លែងឱ្យដឹងតាមទូរស័ព្ទថា កម្មវិធីនេះពិតជាអាចទៅមុខបាន ពីព្រោះកម្មវិធីនេះក៏មានការគាំទ្រពីក្រសួងសេដ្ឋកិច្ចនិងហិរញ្ញវត្ថុផងដែរ។ កម្មវិធីនេះល្អ ព្រោះវានឹងជួយដល់ភ្នាក់ងារអចលនវត្ថុឱ្យមានការយល់ដឹងពីការងារទាក់ទងអចលនទ្រព្យ ដូចជាប្រភេទដី វាមានប្រភេទខុសគ្នា និងគេហដ្ឋាន រួមទាំងអចលនទ្រព្យផ្សេងៗទៀត ព្រោះវាមានតម្លៃទីផ្សារក៏ខុសគ្នាដែរ។
លោកស្រី តាំង ហួរ បានបញ្ជាក់ដឹងដែរថា៖ “អត្ថប្រយោជន៍នៃការបណ្តុះបណ្តាលនេះ គឺដើម្បីឱ្យយើងធ្វើអ្វីមួយមានភាពច្បាស់លាស់ ពេលគាត់មានជំនាញវិជ្ជាជីវៈច្បាស់លាស់ មានអាជ្ញាប័ណ្ណស្របច្បាប់ គាត់ពិតជាមានការយល់ដឹងពីទីផ្សារដែលអាចចៀសវាងនូវការបោកប្រាស់ ការក្លែងបន្លំដែលកន្លងមកធ្លាប់មានកើតឡើងនូវភាពមិនច្បាស់លាស់ពីភ្នាក់ងារមួយចំនួនដែលពុំមានអាជ្ញាប័ណ្ណ អ្នកខ្លះពុំស្គាល់ទាំង shop house ថាយ៉ាងម៉េចផងក្នុងវិស័យអចលនទ្រព្យ។ ជាហេតុនាំឱ្យប៉ះពាល់ដល់វិស័យនេះ។ ដូច្នេះយើងនឹងធ្វើឱ្យអ្វីដែលជាភាពមិនច្បាស់លាស់ និងមិនស្របច្បាប់ទាំងនោះ មានភាពរលូន និងប្រសើរឡើងជាងមុន។
លោកស្រីបានឱ្យដឹងថា ការចូលរៀនតម្រូវឱ្យបង់ប្រាក់ តែមិនច្រើនទេសម្រាប់ចំណេះដឹងដើម្បីបម្រើឱ្យក្រុមហ៊ុនយើង ព្រោះដើម្បីជំរុញដល់ការអភិវឌ្ឍវិស័យអចលនទ្រព្យប្រកបដោយចីរភាពយើងទាមទារឱ្យមានធនធានមនុស្សជាមូលដ្ឋានគ្រឹះ និងការប្រកួតប្រជែងដោយភាពស្របច្បាប់ជាមួយនឹងវិជ្ជាជីវៈត្រឹមត្រូវ។
លោកឧកញ៉ា ចេង ខេង ប្រធានក្រុមប្រឹក្សាភិបាល CVEA បានថ្លែងថា ដោយសារកម្ពុជាមិនទាន់មានច្បាប់កំណត់ពីជំនាញអ្នករកស៊ីដីធ្លីដូចបណ្ដាប្រទេសជាច្រើនលើពិភពលោក ទើបអ្នកគ្មានអាជ្ញាប័ណ្ណអាចចូលមកប្រកួតប្រជែងជាមួយអ្នកមានអាជ្ញាប័ណ្ណបាន។ “អ្នករកស៊ីគ្មានអាជ្ញាប័ណ្ណបានបង្កហានិភ័យច្រើនណាស់ក្នុងវិស័យនេះ ហេតុនេះអ្នកមានបំណងចង់ជួល-ទិញ-លក់គួរស្វែងរកការពិគ្រោះយោបល់ជាមួយក្រុមហ៊ុនអចលនវត្ថុដែលមានអាជ្ញាប័ណ្ណត្រឹមត្រូវ។ ការធ្វើការជាមួយអ្នករកស៊ីដែលមានអាជ្ញាប័ណ្ណ និងមានជំនាញច្បាស់លាស់នឹងធ្វើឱ្យពួកគាត់អាចកាត់បន្ថយហានិភ័យ និងអាចស្វែងរកផលចំណេញក្នុងវិស័យនេះបាន”៕
