តាមរយៈបណ្ដាញទំនាក់ទំនងសង្គមហ្វេសប៊ុកនៅពេលថ្មីៗនេះ តារាចម្រៀង និងជាអាយដលនៅក្នុងដួងចិត្តប្រិយមិត្តជាច្រើន គឺលោក សៅ ឧត្តម បានសម្ញែងរថយន្តប្រណីតមួយគ្រឿងថ្មោងថ្មី នៅលើបណ្តាញសង្គមហ្វេសប៊ុកខ្លួន ដែលគេអាចមើលឃើញថាជារថយន្ដពណ៌ខ្មៅដ៏ថ្មីសន្លាងតម្លៃខ្ទង់ម៉ឺនដុល្លារគួរឱ្យស្ញប់ស្ញែង។
បន្ទាប់ពីក្លាយខ្លួនជាតារាចម្រៀងក្ដោបបានប្រជាប្រិយភាពច្រើន តែក្នុងរយៈពេលមួយប៉ប្រិចភ្នែកប៉ុណ្ណោះ ម្ចាស់បទចម្រៀង «សុំទោស» រូបនេះ ហាក់ដូចជាមានការមមាញឹកច្រើនជាមួយនឹងវិថីសិល្បៈខ្មែរ អ្វីដែលកាន់តែពិសេសទៅទៀតនោះគឺ តារាចម្រៀងរូបនេះ កាន់តែមានរូបរាងស្រស់សង្ហាឆក់ទាញបេះដូងនារីៗជាច្រើនឱ្យលង់ស្នេហ៍ទៀតផង។ គួរបញ្ជាក់ផងដែរថា អតីតបេក្ខជនដ៏មានសមត្ថភាពនៃកម្មវិធីលំដាប់ពិភពលោក Cambodian idol រដូវកាលទី1 សៅ ឧត្តម ពិតជាមានយីអ៊ុនឡើងស្រឺតៗមែន ហើយក៏កំពុងតែទទួលបានភាពល្បីល្បាញយ៉ាងខ្លាំងពីសំណាក់ទស្សនិកជន ក្រោយពីលោកបានបញ្ចេញបទចម្រៀងបែបមនោសញ្ចេតនាចាក់ដោតបេះដូងមហាជនយ៉ាងពីរោះៗជាច្រើនបទកន្លងមក។
ជាការពិតណាស់ មកទល់ពេលនេះ ម៉ោងនេះ តារាចម្រៀងសម្បុរស្រអែមរូបសង្ហាវ័យ 29 ឆ្នាំរូបនេះ នៅមិនទាន់មានដំណឹងស្នេហ៍ជាមួយក្រមុំណាម្នាក់នៅឡើយទេ ឬមួយក៏លោកយកចិត្តទុកដាក់តែរឿងការងារសិនក៏ថាបាន ព្រោះកន្លងមកលោកធ្លាប់បានបង្ហើបពីប្រវត្តិតស៊ូនៅក្នុងវិថីសិល្បៈអស់រយៈពេលជាច្រើនឆ្នាំ ទម្រាំតែទទួលបានជោគជ័យនាពេលចុងក្រោយនេះ ដូច្នេះទើបហាក់បីដូចជាលោកផ្ដោតលើតែរឿងការងារដែលសំខាន់ជាងរឿងស្នេហាហ្នឹងឯង៕
