ទំហំកម្ចី និងចំនួនប្រាក់បញ្ញើនៅក្នុងវិស័យមីក្រូហិរញ្ញវត្ថុកម្ពុជាបានបង្ហាញពីកំណើនគួរឱ្យកត់សម្គាល់នៅដើមឆ្នាំនេះ ខណៈចំនួនអ្នកខ្ចីនៅដដែល និងអត្រាកម្ចីមិនដំណើរការបានធ្លាក់ចុះបន្តិច។ ទិន្នន័យរបស់សមាគមមីក្រូហិរញ្ញវត្ថុកម្ពុជា(CMA)បានបង្ហាញថា កម្ចីរបស់សមាជិក CMA រួមគ្នាមានចំនួនជាង4ពាន់លានដុល្លារគិតត្រឹមចុងខែមីនាឆ្នាំនេះ កើនឡើងពីជាង3ពាន់លានដុល្លារធៀបនឹងរយៈពេលដូចគ្នាកាលចុងខែមីនាឆ្នាំ2017។ នេះបើយោងតាមទិន្នន័យបានមកពី CMA។
របាយការណ៍បានបង្ហាញថា ប្រាក់បញ្ញើនៅក្នុងវិស័យនេះមានចំនួន 2.12ពាន់លានដុល្លារកាលពីចុងខែមីនា ឆ្នាំ2018 កើនឡើងពី1.62ពាន់លានដុល្លារធៀបនឹងរយៈពេលដូចគ្នាកាលពីឆ្នាំមុន។ ទោះបីជាមានកំណើនគួរឱ្យកត់សម្គាល់នៃកម្ចីនៅក្នុងឧស្សាហកម្មនេះក៏ដោយ ក៏ចំនួនអ្នកខ្ចីមិនមានការប្រែប្រួលដែរ។ ទិន្នន័យរបស់ CMA នេះបានបង្ហាញថា ចំនួនអ្នកខ្ចីពី MFI ដែលជាសមាជិករបស់ CMA មានចំនួនសរុប 1.85លាននាក់គិតត្រឹមចុងខែមីនា ឆ្នាំនេះដូចគ្នានឹងកាលពីចុងខែមីនាឆ្នាំ2017ដែរ។ អ្នកដាក់ប្រាក់បញ្ញើនៅក្នុងឧស្សាហកម្មនេះបានកើនឡើងដល់ 1លាននាក់គិតត្រឹមខែមីនា។ លើសពីនេះទិន្នន័យ CMA បានបង្ហាញថា ផលបត្រស្ថិតក្នុងហានិភ័យ (PAR) ដែលជាសូចនាករសម្រាប់កម្ចីមិនដំណើរការធ្លាក់ចុះបន្តិចបន្តួចនៅឆ្នាំនេះ 1.67%កាលពីចុងខែមីនា ឆ្នាំ20117 មកនៅត្រឹម 1.37%កាលពីចុងខែមីនា ឆ្នាំនេះ។
យោងតាមរបាយការណ៍របស់ធនាគារជាតិ វិស័យមីក្រូហិរញ្ញវត្ថុបានប្រមូលប្រាក់បញ្ញើសរុបចំនួនប្រមាណ 8.1ទ្រីលានរៀល កើនឡើងចំនួន35.6%(ឆ្នាំលើឆ្នាំ)និងទទួលបានពីអ្នកផ្ញើប្រាក់ជាង1.7លាននាក់ និងបានផ្តល់ឥណទានសរុបមានចំនួនប្រមាណ15.9ទ្រីលានរៀល (កើនឡើងចំនួន25.5%)ដល់អតិថិជនចំនួន 1.75លាននាក់ក្នុងនោះអតិថិជនជាស្រី្តមានចំនួន 77.4%។ ឥណទានត្រូវបានបែងចែកទៅលើវិស័យកសិកម្មចំនួន26.9% ពាណិជ្ជកម្ម18.6% ក្រុមគ្រួសារ33.2% សេវាកម្ម10.3% ដឹកជញ្ជូន4.5%សំណង់3.3% ស្ថាប័នហិរញ្ញវត្ថុ0.1% និងផ្សេង2.2%។
វិស័យមីក្រូហិរញ្ញវត្ថុនៅតែបន្តរីកចម្រើនគួរឱ្យកត់សម្គាល់ ដែលអាចមើលឃើញបានតាមរយៈការពង្រីកវិសាលភាព និងទំហំប្រតិបត្តិការដល់ប្រជាពលរដ្ឋនៅតាមទីជនបទ ដោយបានរួមចំណែកក្នុងការលើកស្ទួយកម្រិតជីវភាពរស់នៅឱ្យមានភាពប្រសើរឡើង។ ក្រៅពីនេះគ្រឺះស្ថានមីក្រូហិរញ្ញវត្ថុបានធ្វើពិពិធកម្មសេវាហិរញ្ញវត្ថុ រួមមាន សេវាផ្ទេរប្រាក់ សេវាធនាគារចល័ត សេវាម៉ាស៊ីនដកប្រាក់ស្វ័យប្រវត្តិ និងសេវាណែនាំធានារ៉ាប់រងខ្នាតតូចជាដើម។ គ្រឹះស្ថានមីក្រូហិរញ្ញវត្ថុបានធ្វើប្រតិបត្តិការគ្របដណ្តប់ទូទាំង 25រាជធានី-ខេត្ត ដោយមានការិយាល័យនៅភ្នំពេញចំនួន76 ខេត្តចំនួន262 ក្រុងចំនួន200 និងស្រុកចំនួន768 ព្រមទាំងបានផ្តល់ការងារដល់បុគ្គលិកចំនួន 29,111នាក់។
ដោយឡែកពាក់ព័ន្ធនឹងកំណើនបច្ចេកវិទ្យានៃគ្រឺះស្ថានមីក្រូហិរញ្ញវត្ថុវិញ មន្ត្រីធនាគារជាតិនៃកម្ពុជាបានឱ្យដឹងថា គិតមកដល់បច្ចុប្បន្ននេះមានម៉ាស៊ីនដកប្រាក់ស្វ័យប្រវត្តិ(ATM)ជាង 1ពាន់គ្រឿងបាននិងកំពុងដាក់ឱ្យអតិថិជនប្រើប្រាស់នៅតាមទីសាធារណៈ និងនៅតាមគ្រឹះស្ថានធនាគារនិងហិរញ្ញវត្ថុនានា ខណៈការប្រើប្រាស់កាតឥណពន្ធ និងកាតឥណទានសរុបប្រមាណជាង 2.5លានកាត។
លោកបណ្ឌិត ឃូ វុឍ្ឍី អគ្គនាយករងបច្ចេកទេសធនាគារជាតិនៃកម្ពុជាមានប្រសាសន៍ថា៖“ចាប់ពីឆ្នាំ2008 មកដល់ខែកុម្ភៈឆ្នាំ2018នេះ ប្រទេសកម្ពុជាមានម៉ាស៊ីនATM ចំនួន1,518គ្រឿង ប័ណ្ណឥណពន្ធ(Debit Card)ចំនួន 1.8លាន និងប័ណ្ណឥណទាន(Credit Card) មាន 76ម៉ឺនប័ណ្ណ។
លោកបណ្ឌិតបន្តថា៖ “ស្របពេលដែលវិស័យធនាគារ និងហិរញ្ញវត្ថុមានការរីកចម្រើនខ្លាំង នៅតាមគ្រឹះស្ថានទាំងនោះមានបំពាក់នូវបច្ចេកវិទ្យាទំនើបៗដែលមុននឹងធ្វើការចាយវាយអ្វីមួយតាមATM ឬដកលុយពីក្រេឌីតកាត ត្រូវមានការយល់ព្រមតាមទូរស័ព្ទដើម្បីបញ្ជាក់ថា យើងជាម្ចាស់លុយពិតប្រាកដមែន” ។
លោកបណ្ឌិតបានបញ្ជាក់ថា៖ “បច្ចុប្បន្នធនាគារជាតិនៃកម្ពុជាមានការពង្រឹងសុវត្ថិភាពខ្លាំងទៅលើបច្ចេកវិទ្យា។ យើងអនុញ្ញាតឱ្យបច្ចេកវិទ្យារីកចម្រើន តែយើងពង្រឹងការត្រួតពិនិត្យលើផ្នែកនេះ។
លោកបន្តថា ការបំពាក់បច្ចេកវិទ្យាទំនើបនៅក្នុងវិស័យធនាគារ និងហិរញ្ញវត្ថុនៅកម្ពុជា គឺធ្វើទៅតាមប្រទេសអភិវឌ្ឍន៍ដើម្បីការពារសុវត្ថិភាព ព្រោះមានក្រុមចូលលួចលុយតាមបច្ចេកវិទ្យា ហើយករណីនេះជាបញ្ហាមួយដែលធនាគារជាតិបានពង្រឹងសុវត្ថិភាព និងសមត្ថភាពសម្បើមណាស់។ នៅប្រទេសផ្សេងៗ ពួកគេប្រឈមខ្លាំងនឹងការលួចលុយតាមបច្ចេកវិទ្យា ដូចជាប្រទេសបង់ក្លាដែសជាដើម មានគេលួចលុយពីធនាគារអស់មួយចំនួន។
បើតាមការវិវឌ្ឍនៃបច្ចេកវិទ្យានេះ ធនាគារ និងគ្រឹះស្ថានមីក្រូហិរញ្ញវត្ថុមួយចំនួនសុទ្ធតែបានបន្ថែមនូវម៉ាស៊ីនអេធីអឹមដែលបំពាក់បច្ចេកវិទ្យាទំនើប។ តាមរយៈវេបសាយ ធនាគារស្ថាបនាបានបង្ហាញនូវម៉ាស៊ីនអេធីអឹមដែលបានដាក់ឱ្យប្រើប្រាស់ចំនួន 73គ្រឿងនៅតាមសាខាផ្សេងៗក្នុងរាជធានីភ្នំពេញ និងទូទាំងប្រទេស ហើយពេលនេះកំពុងតែធ្វើការវិនិយោគលើម៉ាស៊ីនអេធីអឹមដែលបំពាក់បច្ចេកវិទ្យាថ្មីទំនើបចុងក្រោយបំផុតដោយនឹងត្រូវដំឡើងក្នុងពេលដ៏ខ្លីខាងមុខ ដើម្បីផ្តល់ភាពងាយស្រួលដល់អតិថិជនបន្ថែមទៀត។
ឯធនាគារកាណាឌីយ៉ាវិញ បច្ចុប្បន្ននេះបានបំពាក់ម៉ាស៊ីនអេធីអឹមថ្មីមួយកន្លែងបន្ថែមទៀតនៅក្នុងផ្សារម៉ាក្រូសម្រាប់បម្រើជូនអតិថិជន ហើយថ្មីៗនេះធនាគារមានម៉ាស៊ីនអេធីអឹមសរុបចំនួន 136គ្រឿងនៅទូទាំងប្រទេសកម្ពុជា ដែលនៅភ្នំពេញមាន 68គ្រឿង និងតាមខេត្តមានចំនួន 66គ្រឿង។
លោក យុន សុវណ្ណា នាយកប្រតិបត្តិនៃសមាគមមីក្រូហិរញ្ញវត្ថុកម្ពុជាបានឱ្យដឹងថា គ្រឹះស្ថានមីក្រូហិរញ្ញវត្ថុដែលមានអាជ្ញាប័ណ្ណទទួលប្រាក់បញ្ញើសន្សំពីធនាគារជាតិ មានម៉ាស៊ីន ATM ចំនួន 355គ្រឿង។
លោកបានបន្តថា៖ “យើងសង្កេតឃើញថា មួយរយៈកន្លងមកនេះ ការផ្តល់សេវាកម្មទៅដល់អតិថិជនរបស់ខ្លួនតាមរយៈម៉ាស៊ីនATM ឬប្រព័ន្ធធនាគារចល័តប្រើប្រាស់អុីនធើណិតជាដើម គឺដើម្បីបង្ខិតសេវាកម្មទៅជិតអតិថិជនរបស់ខ្លួន ឯគ្រឹះស្ថានមីក្រូហិរញ្ញវត្ថុដែលទទួលប្រាក់បញ្ញើក៏កំពុងព្យាយាមវិនិយោគលើបច្ចេកវិទ្យាដែរ ដែលនេះជាការអភិវឌ្ឍវិជ្ជមានមួយដើម្បីភាពងាយស្រួល និងសន្សំសំចៃពេលវេលារបស់អតិថិជន”៕
