នៅក្នុងអំឡុងខែឧសភានេះ មានតារាជាច្រើនរូបដែលចាប់កំណើតនៅក្នុងខែនេះ ប៉ុន្តែយើងសូមលើកយកតារាល្បីៗនៅក្នុងផលិតកម្មរស្មីហង្ស ដែលជាតារាចម្រៀងនៅក្នុងដួងចិត្តមិត្តយុវវ័យចំនួន 4ដួងដែលបានកើតនៅក្នុងខែដូចគ្នា ដើម្បីបង្ហាញអ្នកគាំទ្រឱ្យបានដឹង។ នៅក្នុងនោះដែររួមមាន អ្នកនាង សុគន្ធ នីសា លោក យក់ ដួងតារា លោក ហ្សូណូ និងលោក នីកូ។ បើទោះបីជាយើងបានដឹងពីថ្ងៃ-ខែកំណើតរបស់តារាទាំង 4ដួងនេះហើយក្ដី ក៏ពួកគេម្នាក់ៗព្យាយាមលាក់បាំងមិនព្រមប្រាប់ពីអាយុពិតរបស់ខ្លួនដែរ។
1-អ្នកនាង សុគន្ធ នីសា កើតនៅថ្ងៃទី1 ខែឧសភា
នៅក្នុងថ្ងៃកំណើតរបស់តារាស្រី សុគន្ធ នីសា គេសង្កេតឃើញមានតែពាក្យជូនពរពីសំណាក់អ្នកគាំទ្ររបស់នាងតែប៉ុណ្ណោះ មិនឃើញមានរូបភាព ឬសកម្មភាពនៃពិធីខួបកំណើតរបស់នាងអណ្ដែតនៅលើបណ្ដាញសង្គមហ្វេសប៊ុកនោះទេ នេះប្រហែលមកពីអ្នកនាងមានភាពមមាញឹកជាមួយការសម្ដែងភាពយន្ដ និងការងារជាច្រើនទៀតក៏ថាបាន។ តែយ៉ាងណាក្ដី អ្នកនាង សុគន្ធ នីសា នៅតែមានសម្រស់ស្រស់សោភាដដែល បើទោះបីជាពេលវេលាចេះតែរំកិលទៅមុខក៏ដោយ ពោលគឺ ក្មេងជាងវ័យតែម្ដង ( ហិហិ…)។
2- លោក យក់ ដួងតារា កើតនៅថ្ងៃទី20 ខែឧសភា
តារាមួយដួងនេះពិតជាមានក្ដីរំភើបខ្លាំង ខណៈដែលអ្នកគាំទ្ររបស់ខ្លួនជាច្រើនបានសរសេរជូនពរលោកយ៉ាងហូរហែនៅក្នុងថ្ងៃកំណើត រហូតដល់លោកបាននិយាយឡើងថា «អរគុណយ៉ាងអនេកប្បការ ការជូនពររបស់បងប្អូនពិតជាធ្វើឱ្យខ្ញុំមហារំភើបរីករាយរកអ្វីប្រៀបស្មើពុំបាន សូមថ្លែងអំណរគុណចំពោះក្រុមហ៊ុន ហង្សមាស ដែលបានដាក់ Cover រូបរបស់ខ្ញុំនៅក្នុងថ្ងៃនេះ ដែលខ្លួនខ្ញុំផ្ទាល់ភ្លេចគិតថា ថ្ងៃនេះជាថ្ងៃកំណើតរបស់ខ្ញុំ ពិតជាភ្ញាក់ផ្អើលមែនទែន សូមបួងសួងដល់វត្ថុសក្ត័សិទ្ធិក្នុងលោក ជួយបីបាច់ថែរក្សាបងប្អូន ជាពិសេសលោកអគ្គនាយក អគ្គនាយករង ក្រុមហ៊ុនហង្សមាស ព្រមទាំងក្រុមគ្រួសារ បុគ្គលឹកទាំងអស់សមប្រកបនូវពុទ្ធពរ បួនប្រការ គឺ អាយុ វណ្ណ: សុខ: ពល: កុំបីឃ្លៀងឃ្លាតឡើយ»។
3-លោក ហ្សូណូ កើតនៅថ្ងៃទី21 ខែឧសភា
តារាប្រុសសង្ហាមួយដួងនេះវិញ ក៏មិនធម្មតាដែរ នៅថ្ងៃខួបកំណើតគេសង្កេតឃើញមានអ្នកគាំទ្រជាច្រើន បានរៀបចំពិធីខួបកំណើត ពញ្ញាក់អារម្មណ៍លោក រួមមានទាំងនំ និងផ្កាជាច្រើនបាច់។ មិនតែប៉ុណ្ណោះ ខាងផលិតកម្មរស្មីហង្សមាសក៏បានធ្វើការពញ្ញាក់អារម្មណ៍ចំពោះ ហ្សូណូ ដោយការចេញបទចម្រៀងតភាគគ្នាពីតារាស្រី សុគន្ធ នីសា ដែលមានចំណងជើងថា «ឱ្យអូនអស់ចិត្ត តែមិនដឹងអូនអស់ចិត្ត» គឺចេញចំថ្ងៃកំណើតរបស់លោកតែម្ដង។ លោក ហ្សូណូ បាននិយាយថា «ជាបឋមខ្ញុំសូមថ្លែងអំណរគុណដល់ក្រុមគ្រួសារ មិត្តភ័ក្តិ និងគ្រួសាររួមផលិតកម្មរស្មីហង្សមាស សម្រាប់ពិធីជប់លៀងខួបកំណើត។ វាពិតជាអស្ចារ្យណាស់សម្រាប់ខ្ញុំ។ អ្នកទាំងអស់គ្នាគឺពិតល្អបំផុត។ សម្រាប់អ្នកដែលមិនបានចូលរួម តែសូមអរគុណចំពោះការជូនតាមរយៈ SMS និង Chart មកជូនពរដោយផ្ទាល់។ អ្នកទាំងអស់គ្នាគឺពិតជាធ្វើឱ្យខ្ញុំមានអារម្មណ៍ពិសេសខ្លាំងណាស់។ សូមអរគុណ»។
4- លោក នីកូ កើតនៅថ្ងៃទី22 ខែឧសភា
បើទោះបីជា នីកូ ជាតារាចំណូលថ្មីរបស់ផលិតកម្មរស្មីហង្សមាសក៏ដោយ តែអ្នកគាំទ្ររបស់លោកក៏កាន់តែមានច្រើនឡើងដូចគ្នាដែរ។ ជាពិសេសនៅក្នុងថ្ងៃកំណើតរបស់លោក នីកូ តារាចម្រៀង និងសម្ដែងស្រី ពេជ្រ សូលីកា បានធ្វើរឿងមួយឱ្យលោកភ្ញាក់ផ្អើលខ្លាំងថែមទៀតផង។ កញ្ញា សូលីកា បានបង្កើតកម្មវិធីជួបជុំអ្នកគាំទ្ររបស់ខ្លួន (Fan Meeting) ដើម្បីអបអរក្នុងឱកាសខួបកំណើតរបស់ នីកូ ដែលធ្វើឱ្យតារាប្រុសរូបនេះ ត្រេកអរ រំភើបដល់ថ្នាក់ឱបនាងមិនលែងដៃឡើយ៕
