សិក្សាត្រូវតាមចំណូលចិត្ត និងទីផ្សារ ជាចំណុចល្អមួយដែលអ្នកជំនាញផ្នែកអប់រំជាច្រើនបានផ្តល់យោបល់ តែទន្ទឹមនឹងនោះ យើងឃើញថាមានយុវជនជាច្រើនបានដឹងពីតម្រូវការរបស់ខ្លួនឯង តែមើលខុសពីតម្រូវការទីផ្សារទៅវិញ។ បញ្ហាប្រឈមមួយនេះបានធ្វើឱ្យនិស្សិតភាគច្រើនមានការខកចិត្តនៅពេលដែលពួកគេបានបញ្ចប់ការសិក្សា ព្រោះក្រោយពេលបញ្ចប់ការសិក្សា គាត់មិនអាចរកការងារតាមការរំពឹងទុករបស់គាត់បាន។
លោក ហួ តុលា នាយកគ្រប់គ្រងកម្មវិធីតស៊ូមតិ The Perspectives Cambodia បានលើកឡើងថាយុវជនមួយចំនួនបានចាប់ផ្តើមស្គាល់ទីផ្សារការងារខ្លះៗហើយ តែអ្វីដែលជាកត្តាប្រឈមសម្រាប់ពួកគេគឺគេមើលខុសពេលវេលា។ និស្សិតមួយចំនួនមើលឃើញជំនាញខ្លះសម្បូរការងារធ្វើក៏ចាប់ផ្តើមចូលរៀន ច្រើនគ្នា ខណៈគំនិតនេះមិនប្រាកដថាធ្វើឱ្យគេជោគជ័យនោះទេ ព្រោះថាទម្រាំរៀនចប់ពួកគេចំណាយពេលវេលាយ៉ាងហោចណាស់ 4ឆ្នាំ ហើយអាជីពដែលពួកគេសម្លឹងឃើញនោះ អាចនឹងលែងមានតម្រូវការខ្ពស់ក៏មានដែរ។ កត្តាទាំងនេះ ជាចំណុចប្រឈមមួយដែលនិស្សិតភាគច្រើនជួបប្រទះនិងទាមទារឱ្យពួកគេមានការគិតឱ្យបានស៊ីជម្រៅដើម្បីសម្រេចនូវក្តីប្រាថ្នាក្នុងជីវិតលើអាជីពការងារ។
លោក ហួ តុលា បាននិយាយថា៖ “សិស្ស និស្សិតគួរតាមដានការអភិវឌ្ឍសង្គម និងព្យាយាមស្វែងយល់ពីព័ត៌មានថ្មីៗដើម្បីបានដឹងថាតើសង្គមរបស់យើងបានអភិវឌ្ឍដល់ដំណាក់កាលណាខ្លះហើយ និងអ្វីជាតម្រូវការពិតប្រាកដនៅថ្ងៃអនាគត។
ស្ថាបនិកកម្មវិធីតស៊ូមតិសម្រាប់យុវជនខាងលើបានលើកឡើងផងដែរថា ប្រសិនបើយើងចង់មើលពីតម្រូវការទីផ្សារ យើងគួរមើលនៅពេលអនាគតខាងមុខ ហើយជាធម្មតាអ្នកដែលយល់ដឹងពីស្ថានការណ៍វិជ្ជមានច្រើនអាចទទួលបានភាពជោគជ័យក្នុងអាជីពការងារច្រើនជាងអ្នកដែលសិក្សាតាមគ្នា ឬសិក្សាដោយមើលឃើញតែពីតម្រូវការការងារក្នុងរយៈពេលខ្លី។ លោកបានបញ្ជាក់ផងដែរថា ការជ្រើសរើសជំនាញសិក្សាជាដំណាក់កាលសំខាន់មួយ ហើយការសិក្សាជំនាញមិនត្រឹមត្រូវក៏អាចធ្វើឱ្យយើងខាតបង់ពេលវេលា ថវិកា និងកម្លាំងកាយចិត្តផងដែរ ហេតុនេះការសម្រេចជ្រើសយកជំនាញណាមួយយ៉ាងច្បាស់លាស់មុនពេលចូលសិក្សាជាចំណុចល្អបំផុតដែលយុវជនគ្រប់គ្នាអាចធ្វើបាន។
លោក ម៉ៅ គង្គា ស្ថាបនិកកម្មវីធី អានន្ត ដែលជាកម្មវិធីរៀបចំសិក្ខាសាលាស្តីពីការរើសជំនាញធំប្រចាំឆ្នាំបានលើកឡើងថា នៅពេលបច្ចុប្បន្ននេះ យើងឃើញហើយថា មានក្រុមហ៊ុនឯកជនជាច្រើនបានបណ្តាក់ទុនវិនិយោគនៅកម្ពុជា ហើយការងារក៏មានលក្ខណៈទូលាយខ្លះដែរ តែអ្វីដែលជាចំណុចប្រឈមនោះគឺការងារដែលមានតម្រូវការតិចមានមនុស្សរៀនច្រើន ហើយការងារដែលមានទីផ្សារទូលាយបែរជាខ្វះមនុស្សធ្វើការទៅវិញ។
ជាក់ស្តែងដូចយើងបានឃើញហើយថា វិស័យសំណង់ និងឧស្សាហកម្មបានរីកចម្រើនខ្លាំង ហើយត្រូវការបុគ្គលិកជំនាញដើម្បីធ្វើការងារ តែអ្នកដែលសិក្សាជំនាញវិទ្យាសាស្ត្រ និងវិស្វកម្មមានចំនួនមិនច្រើនឡើយ តែអ្នកដែលសិក្សាលើផ្នែកគ្រប់គ្រងបែរជាមានចំនួនច្រើនខ្លាំងទៅវិញ។
លោក ម៉ៅ គង្គា បាននិយាយថា៖ “នៅពេលបច្ចុប្បន្ន និងទៅថ្ងៃអនាគត យើងឃើញថា អាជីពក្នុងវិស័យវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (STEM) ជាវិស័យដែលមានតម្រូវការខ្ពស់ ហើយភាគីពាក់ព័ន្ធដែលមានដូចជាក្រសួងអប់រំ និងស្ថាប័នជាច្រើនទៀតក៏ព្យាយាមគ្រប់លទ្ធភាពដើម្បីជំរុញឱ្យមានការសិក្សាលើជំនាញនេះដែរ តែចំនួនយុវជនមួយចំនួនហាក់ដូចជាមិនទាន់យកចិត្តទុកដាក់ខ្លាំងនៅឡើយ។
លោក ម៉ៅ គង្គា បានលើកឡើងផងដែរថាចំណុចដែលយុវជនកម្ពុជាគួរចាប់អារម្មណ៍មួយទៀតគឺជំនាញបច្ចេកទេស (TVET) ព្រោះជំនាញនេះ អាចនឹងនៅតែមានទីផ្សារខ្ពស់នៅរយៈពេលប៉ុន្មានឆ្នាំខាងមុខទៀត ព្រោះគម្រោងសំខាន់ៗចេះតែបន្ត ខណៈប្រទេសក៏កំពុងអភិវឌ្ឍទៅមុខដែរ។ ទីក្រុងត្រូវការការអភិវឌ្ឍ ហើយនៅពេលដែលមានគម្រោងស្ថាបនាសំខាន់ៗកើតឡើងយើងត្រូវការធនធានមនុស្សគ្រប់ផ្នែក ដែលក្នុងនោះមធ្យមបច្ចេកទេសក៏ជាផ្នែកដែលកំពុងខ្វះធនធានមនុស្សមួយដែរ ហេតុនេះប្រសិនបើយុវជនចាប់អារម្មណ៍ ជំនាញនេះអាចជាជម្រើសល្អ។ ថ្វីដ្បិតតែវាមិនមែនជាជំនាញនៅក្នុងម៉ាស៊ីនត្រជាក់ តែវាជាជំនាញដែលអាចជួយឱ្យជីវិតកាន់តែប្រសើរ ហើយអាចជួយសង្គមឱ្យកាន់តែមានការអភិវឌ្ឍកាន់តែលឿន។
ក្រសួងអប់រំ យុវជន និងកីឡា និងអង្គការ STEM បានបង្ហាញថា ជំនាញ STEM ជាជំនាញដែលមានតម្រូវការខ្ពស់ក្នុងរយៈពេល 10ឆ្នាំទៀត ហើយជំនាញនេះអាចនឹងមានសក្តានុពលក្នុងការប្រកួតប្រជែងលើទីផ្សារការងារក្នុងតំបន់អាស៊ានថែមទៀតផង ព្រោះថ្មីៗនេះអាស៊ានបានជំរុញឱ្យប្រទេសជាសមាជិករបស់ខ្លួនព្យាយាមជំរុញឱ្យទីក្រុងសំខាន់ៗរបស់ខ្លួនឱ្យក្លាយជាទីក្រុងឆ្លាតវៃ (Smart City) ដែលត្រូវការបច្ចេកវិទ្យាខ្ពស់៕
