ខ្សែប្រយុទ្ធដ៏មានឥទ្ធិពល Mohamed Salah របស់ក្រុម Liverpool បានទទួលស្គាល់ថា វានឹងក្លាយជា «សុបិនក្លាយមួយ» ក្នុងការបំពេញរដូវកាលទី1 ដ៏អស្ចារ្យរបស់គេនាកីឡដ្ឋាន Anfield តាមរយៈការបញ្ចប់ការគ្រប់គ្រងរបស់ Real Madrid ក្នុងក្របខ័ណ្ឌកំពូលអឺរ៉ុប ក្នុងការប្រកួត Champions League វគ្គផ្តាច់ព្រ័ត្រ នៅថ្ងៃសៅរ៍នេះ។
ប៉ុន្តែ ទោះបីជាយ៉ាងណា Salah បានបញ្ជាក់ថា រូបគេនឹងរីករាយ ប្រសិនបើ Roberto Firmino ឬ Sadio Mane រកបានគ្រាប់បាល់បញ្ចូលទីដែលនឹងជួយឲ្យក្រុមហង្សក្រហមរបស់ពួកគេ ឈ្នះពានកំពូលអឺរ៉ុប ជាលើកទី៦របស់ពួកគេ។ Salah បានឈ្នះពានកិត្តិយសជាបន្តបន្ទាប់ ខណៈដែលរូបគេរកបាន44គ្រាប់ ក្នុងចំណោមគ្រាប់បាល់សរុបទាំង៩០ដែលខ្សែប្រយុទ្ធទាំង៣របស់ក្រុម Liverpool រកបាននៅរដូវកាលនេះ។ ប៉ុន្តែ គ្រាប់បាល់ស៊ុតបញ្ចូលទីក៏បានកើតឡើងច្រើនផងដែរក្នុងការប្រកួតក្របខ័ណ្ឌ Champions League។
Salah បានប្រាប់គេហទំព័រ UEFA.com ថា៖ «វាមិនមានបញ្ហានោះឡើយចំពោះកីឡាកររូបណាដែលរកបានគ្រាប់បាល់បញ្ចូលទីនោះ។ ការឈ្នះការប្រកួត ការដណ្តើមបានពិន្ទុ នោះគឺជារឿងដ៏សំខាន់បំផុតសម្រាប់យើង ពីព្រោះដូចដែលអ្នកអាចឃើញស្រាប់ហើយ ខ្ញុំបានស៊ុតបាល់បញ្ចូលទី10គ្រាប់ ក្នុងក្របខ័ណ្ឌ Champions League កីឡាករ Sadio រកបាន9គ្រាប់ ហើយ Firmino រកបាន 10គ្រាប់ ហេតុនេះ យើងទាំងអស់គ្នាមានកម្រិតដូចគ្នា»។
តារាឆ្នើមអន្តរជាតិអេហ្ស៊ីបរូបនេះបានបន្ថែមទៀតថា៖ «គ្មាននរណាម្នាក់នៃយើង មានភាពអាត្មានិយម ឬចង់តែស៊ុតបាល់បញ្ចូលទីឡើយ។ យើងព្យាយាមជួយគ្នាទៅវិញទៅមកដើម្បីរកបានគ្រាប់បាល់»។ ការប្រកួតនេះនឹងចាប់ផ្តើមនៅម៉ោង1:45ទៀបភ្លឺ៕
ប្រភពពី៖ Channel News Asia
