ឆ្នាំជូត (ពងទេវតាប្រុស ធាតុទឹក)៖ រាសីស្រុតចុះយ៉ាងខ្លាំង។ នៅខែនេះ លោកអ្នកគប្បីរក្សាភាពស្ងៀមស្ងាត់ ដោយមិនត្រូវតបតជាមួយក្រុមមនុស្សក្បែរខ្លួន ឬសូម្បីតែពីចម្ងាយក្តីទើបមិនមានបញ្ហាចោទឡើង។ អ្នកប្រកបរបររកស៊ីជួញដូរ ការរកផលចំណូលមិនត្រូវឱ្យអតិថិជនជំពាក់ប្រាក់ច្រើនទ្បើយ ប្រយ័ត្នជួបរឿងដូចពាក្យចាស់ពោលថា ពេលឱ្យធូរដូចទឹកហូរ ឯការសងមកវិញតឹងដូចអូសឫស្សីបញ្ច្រាសចុង។ ការធ្វើដំណើរឆ្ងាយជិតមិនសូវមានសុវត្ថិភាពទេ គប្បីប្រយ័ត្នប្រយែងបញ្ហាចរាចរណ៍បន្តិច។ រីឯបញ្ហាសម្ពន្ធស្នេហាកំលោះក្រមុំកុំចង់ទុំមុនស្រគាល ពុំនោះទេ បើកើតរឿងធំគឺគ្មាននរណាជួយកើតឡើយ៕
ឆ្នាំឆ្លូវ (ពង្សមនុស្សប្រុស ធាតុដី)៖ រាសីឡើងខ្ពស់ត្រដែត។ នៅខែនេះផ្តល់ផលល្អសម្រាប់លោកអ្នកដំណើរកិច្ចការងារដែលពាក់ព័ន្ធជាមួយបញ្ហាប្រាក់កាស ឬបញ្ហាកិច្ចការងារសំខាន់អ្វីមួយ។ សម្រាប់អ្នកប្រកបរបររកស៊ីជួញដូរវិញនោះគឺមានសន្ទុះជឿនលឿនទៅមុខ ហើយត្រូវរក្សាភាពស្ងប់ស្ងាត់ដាច់ខាត បើធ្វើជំនួញបានកាក់កបល្អមិនត្រូវក្អេងក្អាងឡើយ បើពុំនោះទេអាចហុចផលអាក្រក់មកវិញជាពុំខាន។ ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តដូចសព្វមួយដង។ រីឯបញ្ហាគូគ្រងប្តីប្រពន្ធ ឬគូស្នេហ៍ប្រុសស្រីមានភាពស្រស់ស្រាយប្រៀបដូចត្រីក្នុងទឹក៕
ឆ្នាំខាល (ពង្សយក្ខិនី ធាតុឈើ)៖ រាសីល្អជាមធ្យម។ នៅខែនេះដួងរាសីរបស់លោកអ្នកឃើញថាមានការចម្រើនលូតលាស់សន្សឹមៗទៅមុខ ហើយធ្វើអ្វីក៏តែងសម្រេចជោគជ័យ វិលត្រឡប់មកវិញដែរ។ ទាំងស្ត្រី ទាំងបុរស ការប្រកបការងារលោកអ្នកត្រូវធ្វើដោយសេចក្តីស្ងប់ ហើយមិនត្រូវយកភាពមោហៈទោសៈដាក់ខ្លួនឡើយទើបប្រសើរ។ ចំពោះអ្នកប្រកបរបររកស៊ីជួញដូរការចេញធ្វើជំនួញមិនថាផ្លូវគោក ផ្លូវទឹក ផ្លូវអាកាសក្តី តែងមានភាពសុខដុម ហើយផលកម្រៃទៀតសោតបានគ្រាន់បំពេញបំពង់កអីុចឹងដែរ។ រីឯបញ្ហាសេចក្តីស្នេហាប្រុសស្រីមានការខ្វាយខ្វល់ និងប្រចែប្រចណ្ឌច្រើន ដោយសារម្នាក់ៗមិនសូវយកចិត្តទុកដាក់គ្នាឡើយ៕
ឆ្នាំថោះ (ពង្សមនុស្សស្រី ធាតុឈើ)៖ រាសីស្រុតចុះយ៉ាងខ្លាំង។ នៅខែនេះការប្រកបកិច្ចការងារអ្វីឃើញថា មានការរាំងស្ទះ និងជួបបញ្ហាជាឧបសគ្គច្រើន ពិសេសងាយកើតរឿងរ៉ាវទៀតផង។ ចំពោះអ្នកប្រកបរបររកស៊ីជួញដូរ លោកអ្នកជួបផលលំបាកក្នុងការរកប្រាក់ចំណូលបន្តិច ហើយការជួញជិតឆ្ងាយទៀតសោតជួបតែភាពរកាំរកូស ដូចនេះចូរប្រយ័ត្នកើតជម្លោះមួយហើយមួយទៀត។ រីឯបញ្ហាស្នេហាកំលោះក្រមុំ ឬពោះម៉ាយ មេម៉ាយក្តី ចូរប្រយ័ត្នភាពប្រចែប្រចណ្ឌកើតជម្លោះវិវាទឈានដល់ការបែកបាក់៕
ឆ្នាំរោង (ពង្សទេវតាប្រុស ធាតុមាស)៖ រាសីឡើងខ្ពស់ត្រដែត។ នៅខែនេះឃើញថា ការប្រកបកិច្ចការងារអ្វីតែងមានការជឿនលឿន និងផ្តល់ជាផ្លែផ្កាមកវិញគ្រាន់ជាទីកក់ក្តៅផ្លូវចិត្តគួរសម។ ក្នុងខែនេះដែរលាភសំណាងមានច្រើនគួរសម ដូចនេះជាឱកាសល្អក្នុងការពង្រីកមុខជំនួញ ព្រោះផ្លែផ្កាហុចមកវិញឃើញថា អាចឆ្លើយតបគួរជាទីពេញចិត្ត ប៉ុន្តែយ៉ាងណាក្តីមិនត្រូវលោភលន់ពេកនោះទេ។ ការធ្វើដំណើរឆ្ងាយជិតមានតែក្រុមមនុស្សជួយយកអាសារ។ រីឯបញ្ហាប្រុសស្រីលោកអ្នកមិនគប្បីលង់លក់តែក្នុងរឿងសេចក្តីស្នេហាខុសរបៀបដែលនាំឱ្យខូចអនាគតដោយប្រការណាមួយ៕
ឆ្នាំម្សាញ់ (ពង្សមនុស្សប្រុស ធាតុភ្លើង)៖ រាសីឡើងខ្ពស់ត្រដែត។ នៅខែនេះដួងរាសីឡើងខ្ពស់ដូចនេះ បើទោះបីលោកអ្នកធ្វើអ្វីមួយក៏ដោយពិសេសស្ត្រីតែងទទួលផលឆ្លើយតប និងមានជោគមានជ័យជានិច្ច។ ការប្រកបការងារ បើលោកអ្នកខ្លះធ្លាប់តែជួបបញ្ហាមិនល្អនឹងអាចប្រែប្រួលមកជាល្អឡើងវិញ ដូចនេះត្រូវតែក្តោបក្តាប់ឱកាសនេះកុំឱ្យឆ្លងផុតដោយឥតប្រយោជន៍ឡើយ។ ចំពោះអ្នកប្រកបរបររកស៊ីជួញដូរក្នុងខែនេះការចេញធ្វើជំនួញមិនថាផ្លូវគោក ផ្លូវទឹក ផ្លូវអាកាសក្តី មានភាពលូតលាស់ប្រពៃ ហើយបើលោកអ្នកចង់បើករបរថ្មីក៏ជាឱកាសល្អប្រពៃណាស់ដែរ។ រីឯបញ្ហាសេចក្តីស្នេហាប្រុសស្រីមានការចេះអត់ឱនឱ្យគ្នា និងផ្អែមល្ហែមប្រពៃណាស់៕
ឆ្នាំមមី (ពង្សទេវតាស្រី ធាតុភ្លើង)៖ រាសីស្រុតចុះយ៉ាងខ្លាំង។ នៅខែនេះដំណើរជីវិតរបស់លោកអ្នកមានឧបសគ្គរារាំងច្រើន ម៉្លោះហើយទោះធ្វើអ្វីត្រូវមានចិត្តត្រជាក់ទើបមិនមានបញ្ហាអាក្រក់ណាមួយឈានចូលរួច។ អ្នកប្រកបរបររកស៊ីជួញដូរវិញ ទោះជួញទីជិតឆ្ងាយ ខ្សត់ខ្សោយក្នុងការរកកម្រៃបន្តិចហើយទាល់តែខិតខំខ្លាំងទើបរកផលកម្រៃគ្រប់គ្រាន់ចិញ្ចឹមឆ្នាំងបាយទៅរួច។ ការធ្វើដំណើរចូរប្រយ័ត្នបញ្ហាក្រុមមនុស្សប៉ងអាក្រក់ដោយប្រការណាមួយ។ រីឯបញ្ហាសេចក្តីស្នេហាវិញជួបនូវឧបសគ្គជានិច្ច ហើយតែងកើតនូវរឿងរ៉ាវរកាំរកូសមិនតិចឡើយ៕
ឆ្នាំមមែ (ពង្សទេវតាស្រី ធាតុមាស)៖ រាសីល្អជាមធ្យម។ នៅខែនេះលោកអ្នកធ្វើអ្វីក៏ដោយតោងតែប្រយ័ត្ន ពិសេសការប្រកបការងារ ឬធ្វើអ្វីមួយមិនត្រូវឱ្យសំខាន់ពេកទេ ពីព្រោះថាផលប៉ះទង្គិចនោះក៏មានច្រើនចំពោះមុខផង។ ការរស់នៅងាយមានបញ្ហាអាក្រក់ជាមួយអ្នកដទៃណាស់ គប្បីប្រយ័ត្នប្រយែង។ អ្នកប្រកបរបររកស៊ីជួញដូរនៅខែនេះវិញ លោកអ្នកមានដំណើរជីវិតជួបផលប៉ះទង្គិចច្រើន ដូចនេះទោះធ្វើអ្វីក៏ដោយប្រយ័ត្នថ្លោះធ្លោយចាញ់បោកគេ។ សម្ពន្ធស្នេហាប្រុសស្រីមានភាពសោះកក្រោះងាយទាំងកើតជម្លោះវិវាទ និងងាយទាំងត្រូវរ៉ូវគ្នា៕
ឆ្នាំវក (ពង្សយក្សប្រុស ធាុតដែក)៖ រាសីល្អជាមធ្យម។ នៅខែនេះមិនថាការប្រកបការងារ ឬការរស់នៅ លោកអ្នកត្រូវចេះរក្សាភាពស្លូតបូត ឬធ្វើចរិកឱ្យរាបសារបន្តិចទើបជីវិតមានភាពសុខដុម។ អ្នកប្រកបការងារទីខ្ពស់ ពិសេសកម្មករសំណង់ ចូរប្រយ័ត្នប្រយែងការទ្បើងទីខ្ពស់ក្រែងភ្លាត់ដៃជើងធ្លាក់ចុះគ្រោះថ្នាក់ដោយប្រការណាមួយ។ ចំណែកអ្នកអាជីវករត្រូវបើកចិត្តទូលាយ មិនត្រូវបង្កបញ្ហាជាមួយអ្នកមានមុខរបរដូចគ្នាឬអ្នកក្បែរខាងទើបមិនមានបញ្ហាចោទឡើង។ រីឯបញ្ហាសម្ពន្ធស្នេហាប្រុសស្រីមានភាពស្រុះស្រួលគ្នា និងផ្អែមល្ហែមប្រពៃណាស់៕
ឆ្នាំរកា (ពង្សមនុស្សប្រុស ធាតុដែក)៖ ាសីល្អជាមធ្យម។ នៅខែនេះបើទោះបីធ្វើអ្វីក៏តែងមានការចម្រើនលូតលាស់ និងផ្តល់ផលល្អមកវិញមួយចំនួនផងដែរ។ អ្នកប្រកបរបររកស៊ីជួញដូរមិនថាការជួញទីជិតឆ្ងាយទោះផ្លូវទឹកផ្លូវគោក ឬផ្លូវអាកាសក្តីផលកម្រៃមានហូរចូលខ្លះៗ គ្រាន់ផ្សើមបំពង់កអីុចឹងដែរ តែយ៉ាងណាការក៏ដោយធ្វើអ្វីមិនអាចលោភលន់បានទេ ព្រោះភាពស៊យក៏មានតាមជាប់មិនទៅណាឆ្ងាយនៅឡើយ។ ការធ្វើដំណើរឆ្ងាយជិតជួបភាពសុខដុមទាំងពេលទៅ និងត្រឡប់មកវិញ។ រីឯបញ្ហាគូស្នេហ៍កំលោះក្រមុំកើតការរកាំចិត្ត និងមានភាពសៅហ្មងចំពោះគ្នាច្រើន៕
ឆ្នាំច (ពង្សយក្ខិនី ធាតុដី)៖ រាសីល្អជាមធ្យម។ នៅខែនេះដោយសារដំណើរជីវិតជួបលើកំណាត់ផ្លូវរដិបរដុបច្រើន ម៉្លោះហើយមិនថាបញ្ហាការងារ និងប្រាក់កាសជួបបញ្ហាលំបាកច្រើន។ ចំពោះអ្នកប្រកបរបររកស៊ីជួញដូរទោះជួញទីជិតឆ្ងាយផលចំណូលមានហូរចូលតក់ៗគ្រាន់ផ្សើមបំពង់កអីុចឹងដែរ ប៉ុន្តែអ្នកជួញឆ្ងាយចូរប្រយ័ត្នចាញ់បោកគេ។ ការធ្វើដំណើរទីជិតឆ្ងាយ ចូរប្រយ័ត្នរោគជំងឺបៀតបៀនយាយីដោយប្រការណាមួយ។ រីឯបញ្ហាសេចក្តីស្នេហាកំលោះក្រមុំកើតមានការប្រចែប្រចណ្ឌ និងចាប់កំហុសគ្នាច្រើន៕
ឆ្នាំកុរ (ពង្សមនុស្សស្រី ធាតុទឹក)៖ រាសីឡើងខ្ពស់ត្រដែត។ នៅខែនេះដំណើរជីវិតរបស់លោកអ្នកភ្លឺថ្លា ទោះធ្វើអ្វីក៏ឃើញថាចម្រើនលូតលាស់គួរសម។ បើលោកអ្នកប្រកបការងារ បើក្រុមមានមនុស្សបង្កបញ្ហាក៏មិនអាចធ្វើអ្វីលោកអ្នកកើតដែរ ឬឆាប់រលាយអស់ទៅវិញដែរ។ នៅខែនេះផងដែរ បើជាអ្នកប្រកបរបរកស៊ីជួញដូរមានការទិញចូលលក់ចេញរស់រវើកគួរសម ហើយផលកម្រៃទៀតសោតអាចរកបានគ្រាន់កក់ក្តៅ។ បញ្ហាសេចក្តីស្នេហាកំលោះក្រមុំបើលោកអ្នកចង់ចូលស្តីដណ្តឹង ឬចូលសាសងជាមួយអ្នកជាទីស្រឡាញ់ណាម្នាក់ក៏ជាពេលវេលាល្អប្រពៃបំផុត៕
