Arsenal ត្រៀមធ្វើការតែងតាំងលោក Unai Emery ជាអ្នកជំនួសកន្លែងរបស់លោក Arsene Wenger។ ក្លិបនេះបានចាប់ផ្តើមដំណើរការនៃការជ្រើសរើស ខណៈដែលពួកគេសម្លឹងរកអ្នកជំនួសកន្លែងរបស់លោក Wenger ដែលជាអ្នកចាត់ការទូទៅរបស់ពួកគេអស់រយៈពេល 22ឆ្នាំមកហើយ និងបានចាកចេញក្នុងពេលបញ្ចប់រដូវកាលនេះ។
លោក Mikel Arteta ធ្លាប់ត្រូវបានចាត់ទុកជាបេក្ខភាពនាំមុខគេកាលពីសប្តាហ៍មុន។ ប៉ុន្តែ ទោះបីជាយ៉ាងណា សញ្ញាផ្សេងៗកាលពីថ្ងៃចន្ទ បានបង្ហាញថា លោក Emery ដែលជាអតីតអ្នកចាត់ការទូទៅរបស់ក្លិប Paris St-Germain និងSevilla ត្រូវបានជ្រើសរើសរួចរាល់ហើយ។ ក្លិបនេះ បានធ្វើការពិភាក្សាជាមួយនឹងលោក Emery ហើយការសម្រេចចិត្តមួយត្រូវបានរំពឹងទុកថា នឹងត្រូវប្រកាសនៅសប្តាហ៍នេះ។ លោក Emery គឺជាបេក្ខភាពដ៏ស័ក្តិសមបើនិយាយពីបទពិសោធរបស់លោក ក្រោយពីបានដឹកនាំឱ្យក្រុម PSG ឈ្នះពានក្នុងស្រុក 3 នៅរដូវកាលនេះ និងធ្លាប់បានជួយឱ្យ Sevillaលើកពានក្របខ័ណ្ឌ Europa League ដល់ទៅ 3លើក។
បណ្តាញសារព័ត៌មាន BBC បានចេញផ្សាយថា ដំណើរការនៃការជ្រើសរើសគ្រូបង្វឹកថ្មី ត្រូវបានដឹកនាំដោយលោក Ivan Gazidis នាយកប្រតិបត្តិរបស់ក្លិប Arsenal លោក Raul Sanllehi ប្រធានទំនាក់ទំនងកីឡាបាល់ទាត់ និងលោក Sven Mislintat ប្រធានផ្នែកជ្រើសរើស។ លោក Emery បានចាកចេញពី PSG នៅពេលដែលកិច្ចសន្យារបស់លោកអស់សុពលភាព នៅចុងបញ្ចប់នៃរដូវកាលនេះ៕
ប្រភពពី៖ The Guardian
